Franco Mari
|
C'l artìcul chè 'l è scrit in
Miranduléś |
Franco Mari, cgnusû anc c'n al nóm 'd art ad Rupert Sciamenna (Milàṅ, 23 ad Śnar dal 1947 - Milàṅ, 25 'd Utóbar dal 2025), 'l è stâ 'n atōr e còmig itagliàṅ, famóś p'r i sò lavōr cun Maccio Capatonda.
Biugrafìa
[mudéfica la surzéia]Nâ da màdar lumbàrda e pàdar śvìsar, Franco da śōv'n al stùddia prima in un culég a Lucèrna e pò a Luśàna, laurànd pò in camp alberghēr.
Al s davśìna a 'l cìnema a 'l inìsi di an Utànta faghénd dal parti da cumpàrsa par Steno, Mario Monicelli e Neri Parenti. In séguit a 'l ém vist in Tutti gli uomini del deficiente (1999) ad Paolo Costella e in dó pelìculi 'd Maccio Capatonda, Italiano medio (2015) e Omicidio all'italiana (2017).
A s 'l arcurdém tut anc in televiśiòṅ in di sketch 'd Unreal TV in di pagn dal mâg Houdinese o 'd Italo Americano e pò incóra in dla soap opera Intralci in dua 'l fava 'l mèdag Julius Maceti, laurànd anc in prugràma cuma Mai dire Lunedì, Mai dire Martedì, e su i canài LA7 e All Music.
'L à recitâ anc in dla série La villa Di Lato in dla part d'n albergadōr dna vila “dagnóra maladìda” e fat al rōl ad Lord Micidial in dla série Mario, traśmìsa p'r MTV. 'L à tòlt part anc a soquànt vìddeo ad Piero Pelù, Francesco Baccini e Elio e le Storie Tese.
La sò recitasiòṅ còmiga l'è qvéla dal caraterìsta ad persunàǵ pîṅ 'd bèsi, preśuntuóś, ch'i sànan tut lōr, imbrujòṅ o catìṿ, che lò al rénd bèṅ cun la sò parlàda da “bauscia” patintâ, cun tut al sò ghigni e ridùdi.
Filmugrafìa
[mudéfica la surzéia]- 1983 - Mani di fata, regìa ad Steno
- 1985 - Lui è peggio di me, regìa 'd Enrico Oldoini
- 1995 - Facciamo paradiso, regìa ad Mario Monicelli
- 1998 - Cucciolo, regìa ad Neri Parenti
- 1999 - Tutti gli uomini del deficiente, regìa ad Paolo Costella
- 2015 - Italiano medio, regìa ad Maccio Capatonda
- 2017 - Omicidio all'italiana, regìa ad Maccio Capatonda