Francis Ford Coppola

C'l artìcul chè 'l è scrit in Miranduléś

Francis Ford Coppola (Detroit, 7 'd Avrìl dal 1939, a s lèś [ˈfɹænsɪs fɔɹd ˈkɒpɒlə] in ingléś) 'l è 'n regista, senegiadōr e prudutōr americàṅ. Al gh'à na stéla in dla Hollywood Walk of Fame.

'L è nâ in Mìchigan da na famìja uriginària dla Lucàgna. Sîṅ ad Nicolas Cage, 'l è 'l pàdar dal prudutōr e regìsta Gian-Carlo Coppola, dal regìsta Roman Coppola e dla regìsta e atōra Sofia Coppola, abû da sò mujēr Eleanor Jessie Neil mòrta in dal 2024.

In dla sò caréra 'l è stâ candidâ par sédas vòlti a i Prèmi Òscar in du al 'n à vins siē p'r i film Patton, generale d'acciaio in dal 1971 (senegiadùra uriginala), Il padrino in dal 1973 (senegiadùra minga uriginala) e Il padrino - Parte II in dal 1975 (film, regìa e senegiadùra minga uriginala), ólt'r a 'n Prèmi a la memòria 'd Irving G. Thalberg in dal 2011. In bisàca al gh'à anc siē Golden Globe, dó Palmi 'd Òr a 'l Fèstival ad Cannes (p'r al thriller La conversazione cun Gene Hackman e p'r al film ad guèra Apocalypse Now cun Martin Sheen e Marlon Brando) e 'n Lèòṅ 'd Òr a la caréra a 'l Fèstival ad Venèsia.

Fra i sò àtar sò film più impurtànt a 'rcurdém al drama I ragazzi della 56ª strada (1983), cun di śōvan Matt Dillon, Patrick Swayze, Rob Lowe, Emilio Estevez e Tom Cruise, al drama muśicàł Cotton Club (1984), cun prutagunìsta Richard Gere, al drama sentimentàł Peggy Sue si è sposata (1986), cun la còpia Kathleen Turner/Nicolas Cage, al film ad scarésa Dracula di Bram Stoker (1992), in dua 'l à ciamâ Gary Oldman, la Winona Ryder e Anthony Hopkins, al thriller dramàtic L'uomo della pioggia - The Rainmaker (1997), cun Danny DeVito, Matt Damon e Jon Voight, e 'l fantàstic Megalopolis (2024).

In dla sò vita 'l è stâ da spés vśèṅ a i demucràtic, avénd dâ 'l sò apòǵ a 'l èx guvernadōr dla Califòrgna Jerry Brown e a l'èx speaker dla Cambra Nancy Pelosi.

Filmugrafìa

1962 - Tonight for Sure
1963 - Terrore alla 13ª ora (Dementia 13)
1966 - Buttati Bernardo! (You're a Big Boy Now)
1968 - Sulle ali dell'arcobaleno (Finian's Rainbow)
1969 - Non torno a casa stasera (The Rain People)
1972 - Il padrino (The Godfather)
1974 - La conversazione (The Conversation)
1974 - Il padrino - Parte II (The Godfather Part II)
1979 - Apocalypse Now
1982 - Un sogno lungo un giorno (One from the Heart)
1983 - I ragazzi della 56ª strada (The Outsiders)
1983 - Rusty il selvaggio (Rumble Fish)
1984 - Cotton Club (The Cotton Club)
1986 - Peggy Sue si è sposata (Peggy Sue Got Married)
1987 - Giardini di pietra (Gardens of Stone)
1988 - Tucker - Un uomo e il suo sogno (Tucker: The Man and His Dream)
1980 - New York Stories insém a Martin Scorsese e a Woody Allen
1990 - Il padrino - Parte III (The Godfather Part III)
1992 - Dracula di Bram Stoker (Bram Stoker's Dracula)
1996 - Jack
1997 - L'uomo della pioggia - The Rainmaker (The Rainmaker)
2007 - Un'altra giovinezza (Youth Without Youth)
2009 - Segreti di famiglia (Tetro)
2011 - Twixt
2024 - Megalopolis

Culegamènt estéran

Àtar prugèt

Wikimedia Commons contiene file multimediali su Francis Ford Coppola