Flightplan - Mistero in volo
|
C'l artìcul chè 'l è scrit in
Miranduléś |
 Flightplan | ||
| Flightplan - Mistero in volo | ||
 La Foster, Sarsgaard e Bean in na figùra dal film | ||
| Flightplan - Mistēr in vōl 2005 | ||
|---|---|---|
| Regìa: Robert Schwentke | ||
| Scritōr: Peter A. Dowling • Billy Ray | ||
| Atōr: Jodie Foster • Peter Sarsgaard • Sean Bean Kate Beahan • Michael Irby • Assaf Cohen Erika Christensen • Greta Scacchi • Haley Ramm Shane Edelman • Mary Gallagher • Matt Bomer Marlene Lawston • Brent Sexton • Judith Scott | ||
| Müsica: James Horner | ||
| Léngua: Ingléś • Francéś • Tedésc Àrab • Itagliàṅ • Giapunéś | ||
| Dürä dal film: 98 minüt | ||
| Nasiōṅ: Stat Unî • Germàgna | ||
Flightplan - Mistero in volo (Flightplan - Mistēr in vōl) 'l è 'n thriller americàṅ e tedésc dal 2005 ad Robert Schwentke. Custâ sinquànta-sinc migliòṅ ad dòlar, al film al 'n à pò muciâ sù da piò ad duśènt-vint.
Sunt
Dòp la mòrt ad sò marè David (John Benjamin Hickey), cascâ śò da 'n palàs in Germàgna, l'inśgnēra aeronàutica Kyle Pratt (Jodie Foster) la decìd ad turnàr a cà in di Stat Unî insém a la sò putìna 'd siē an Julia (Marlene Lawston) e a la casa da mòrt c'n al sò spóś dèntar, tulénd un vōl su 'n aparéć dimóndi grand dirèt a New York.
A bōrd, insém a 'l capitàṅ Rich (Sean Bean) e a gl'hostess Stephanie (Kate Beahan) e Fiona (Erika Christensen), i vìàśan sèg fra i àtar Gene Carson (Peter Sarsgaard), agìnt ad pulisìa in segrét, al sgnōr Loud (Shane Edelman) insém a sò mujēr (Mary Gallagher), i àrab Obaid (Michael Irby) e Ahmed (Assaf Cohen), e la psico-terapèuta Lisa (Greta Scacchi).
A n sèrt punt la Kyle, dòp ès'r-as daśdàda da 'n sunèṅ, la fà a mènt che sò fiōla l'è sparìda. La dóna la s mét a pascàr-la dapartùt ma la putìna la n salta minga fóra. La Kyle la dmanda ajùt a i mémbar d'l equipàǵ ma a n gh'è gnint da far. A salta pò fóra che la Julia la n è minga stada registràda fra i pasegēr e Rich al taca a crédar ch'la dóna la s sia invindàda incòsa o anc ch'l'àppia pasâ un brut mumènt par via dal lut patî e che dònca la n sia minga tant in bóla. A gh'è anc da piò: al mèdag d'l ubitòri, ch'l à tgnû adrē a la mòrt ad David, al fà savēr che lò al s éra tòlt la vita butànd-as śò cun la putìna.
Carson, ch'al gh'à da tgnir adrē a la sicurésa dal vōl, al mét al manéti a la Kyle che però la gh la cava a scapàr via da 'l sò cuntròl dòp ès'r andàda in bagn, faghénd finta 'd avēr biśóg ad pisàr, e muntàda sù par n'arbàlta. La dóna la mét a frut al fat ch'al cgnós cum i èṅ fat i aparéć ad dèntar par via da sò mistēr, impgnànd-'s a pascàr da par lē sò fiōla cóntar tut, sicûra 'd èsar vitma 'd un cumplòt e che la Julia la sia viva da na quàlc banda.
Al capitàṅ ad decìd ad far 'n ateràǵ 'd emergénsa in 'n aeropòrt a Tèranóva e Làbrador méntar Carson al ciàma in ajùt 'l FBI.