Fire with Fire (film 2012)
|
C'l artìcul chè 'l è scrit in
Miranduléś |
 Fire with Fire | ||
.png) Josh Duhamel in na figùra dal film | ||
| Fōg c'n al fōg 2012 | ||
|---|---|---|
| Regìa: David Barrett | ||
| Scritōr: Tom O'Connor • Lowell Cauffiel | ||
| Atōr: Josh Duhamel • Vincent D'Onofrio Bruce Willis • Rosario Dawson • Vinnie Jones Julian McMahon • 50 Cent • Bonnie Somerville Arie Verveen • Eric Winter • James Lesure Richard Schiff • Kevin Dunn • Nnamdi Asomugha | ||
| Müsica: Trevor Morris | ||
| Léngua: Ingléś | ||
| Dürä dal film: 97 minüt | ||
| Nasiōṅ: Stat Unî | ||
Fire with Fire (Fōg c'n al fōg) 'l è 'n film 'd asiòṅ americàṅ dal 2012 ad David Barrett.
La pelìcula, giràda c'n un budget ch'l à pasâ i déś migliòṅ ad dòlar, l'è vgnuda fóra a 'l cìnema sōl in soquànt paéś cuma l'Itàglia, Purtugàl, Régn Unî, Mèsic, Perù, Bélgi, Culómbia, Braśìl e Emirâ Àrab Unî ma minga in di Stat Unî in dua 'l è finî diretamènt in dal marcâ d'l home video.
Sunt
Jeremy Coleman (Josh Duhamel) 'l è 'n śōvan califurgnàṅ ch'al fà 'l pumpēr a Long Beach insém a i sò amìg Craig (James Lesure) e Adam (Eric Winter). Na sira gh'i gh'ìvan da pasàr insém, méntar Jeremy 'l è in un negòsi par cumpràr dal scotch whisky, i rìvan dèntar di óm ch'i fànan part 'd un grup ad biànc neo-naśìsta, cmandâ da 'n sèrt David Hagan (Vincent D'Onofrio), ch'i cópan al pruprietàri e sò fiōl, gint ad culōr ch'i n ìvan minga vlû vénd'r-ag la butéga.
Jeremy al scampa a 'l masèl par miràcul e pò al finìs in dal prugràma 'd prutesiòṅ di testimòni parchè al gh'à d'arcgnós'r al sasèṅ a prucès. Hagan 'l è 'n delinquènt sénsa cōr ch'in pasâ 'l iva bèla masâ tut qvéi ch'i s éran mis cónt'r ad lò, cuma 'l pulisiòt ch'al lauràva in còpia cun 'l agìnt Mike Cella (Bruce Willis). Al pumpēr al càmbia cugnóm e vita, andànd a star a New Orleans in du 'l taca na relasiòṅ cun la US marshal ch'la gh tgniva adrē, la Talia Durham (Rosario Dawson).
Quànd l'è óra 'd tacàr al prucès, Jeremy al tórna in Califòrgna par testimuniàr ma purtròp Hagan in cal méntar 'l è stâ bòṅ ad cgnósar la sò identità nóva. Lò e la Talia i scàmpan a 'n atintâ 'd Robert (Julian McMahon), un sicàri a 'l servìsi 'd Hagan. Saénd 'd ès'r in perìcul, Jeremy al decìd ad far-as giustìsia da par lò, miténd da na banda la prutesiòṅ ch'la gh dava la pulisìa e cumprànd na pistòla na la banda 'd criminài négar dal pòst, i Eastside Crips ad Lamar (50 Cent).
Par rivàr a Hagan, Jeremy al masa prima un sò óm, Boyd (Vinnie Jones), pò al s fà dar 'l insirìs in du catàr-al da 'l sò avucàt Harold Gethers (Richard Schiff).