Filippo Nigro

C'l artìcul chè 'l è scrit in Miranduléś

Filippo Nigro (Róma, 3 ad Dicémbar dal 1970, a s lèś [fiˈlippo ˈniɡro] in itagliàṅ) 'l è 'n atōr itagliàṅ, candidâ a 'n Nàstar 'd Argìnt in dal 2003 e a 'n Dàvid ad Dunatèl in dal 2009.

Biugrafìa

Nâ e carsû in dal quartēr „Trièst“ a Róma, da śōvan 'l à studiâ a 'l lìceo clàsic e pò stòria mediuevàla a l'università La Sapienza. In séguit al s è diplumâ a 'l Sèntar Sperimentàł ad Cinematugrafìa dla Lina Wertmüller par pò tacàr na caréra 'd atōr in di an Nuànta laurànd in di telefìlm I ragazzi del muretto, Un posto al sole, La dottoressa Giò e Il maresciallo Rocca e anc a teàtar catànd spasi in dl'òvra Camere da letto par la regìa ad Giovanni Lombardo Radice.

In dal 1998 al gira 'l sò prim film, la cumèdia Donne in bianco, ma 'l è in dal 2001 ch'al s fà cgnósar dabòṅ faghénd la part dal muróś 'd Ivan Bacchi in dal drama Le fate ignoranti ad Ferzan Özpetek cun prutagunìsta Stefano Accorsi e la Margherita Buy. Al regìsta turc 'l al ciàma anc dū an dòp par far-ag far la part dal marè dla Giovanna Mezzogiorno in La finestra di fronte.

In dal 2007 a 'l ém vist in dal drama sentimentàł Ho voglia di te, a fiànc dla còpia Riccardo Scamarcio/Laura Chiatti, méntar 'l an dòp 'l à recitâ in dla cumèdia Amore, bugie & calcetto, insém a Claudio Bisio e a la Claudia Pandolfi, e in dal drama Un gioco da ragazze, in di pagn 'd un prufesōr 'd Itagliàṅ ch'al gh'à da far i cònt cun na sò studènta dimóndi rabìda.

In dal 2009 'l à fat la part dal muróś ad Luca Argentero, candidâ pulìtig ad sinìstra, in dla cumèdia Diverso da chi?, e qvél dal fiōl ad Renato Pozzetto in Oggi sposi. Dòp avēr fat al scambìsta in dal dama E la chiamano estate (2012), cun la còpia Jean-Marc Barr e Isabella Ferrari, 'l è turnâ a lauràr cun Özpetek in dla cumèdia dramàtica La dea fortuna (2019) faghénd al demènt Filippo.

Filmugrafìa

1998 - Donne in bianco, regìa ad Tonino Pulci
2001 - Le fate ignoranti, regìa ad Ferzan Özpetek
2003 - La finestra di fronte, regìa ad Ferzan Özpetek
2004 - A luci spente, regìa ad Maurizio Ponzi
2007 - Ho voglia di te, regìa ad Luis Prieto
2008 - Amore, bugie & calcetto, regìa ad Luca Lucini
2008 - Un gioco da ragazze, regìa ad Matteo Rovere
2008 - Amore che vieni amore che vai, regìa ad Daniele Costantini
2009 - Diverso da chi?, regìa 'd Umberto Carteni
2009 - Oggi sposi, regìa ad Luca Lucini
2010 - Dalla vita in poi, regìa ad Gianfrancesco Lazotti
2012 - E la chiamano estate regìa ad Paolo Franchi
2012 - ACAB - All Cops Are Bastards, regìa ad Stefano Sollima
2015 - In fondo al bosco, regìa ad Stefano Lodovichi
2019 - La fuga, regìa dla Sandra Vannucchi
2019 - La dea fortuna, regìa ad Ferzan Özpetek
2020 - The Book of Vision, regìa ad Carlo S. Hintermann
2021 - Per tutta la vita, regìa ad Paolo Costella
2022 - The Boat, regìa 'd Alessio Liguori
2023 - La caccia, regìa ad Marco Bocci

Culegamènt estéran

Àtar prugèt

Wikimedia Commons contiene file multimediali su Filippo Nigro