Femmina folle
|
C'l artìcul chè 'l è scrit in
Miranduléś |
 Leave Her to Heaven | ||
| Femmina folle | ||
 La Gene Tierney in na figùra dal film | ||
| Fémna fóra 'd tèsta 1945 | ||
|---|---|---|
| Regìa: John M. Stahl | ||
| Scritōr: Jo Swerling • Ben Ames Williams | ||
| Atōr: Gene Tierney • Cornel Wilde • Jeanne Crain Vincent Price • Mary Philips • Reed Hadley Ray Collins • Gene Lockhart • Darryl Hickman Chill Wills • Gertrude Astor • Guy Beach | ||
| Müsica: Alfred Newman | ||
| Léngua: Ingléś | ||
| Dürä dal film: 110 minüt | ||
| Nasiōṅ: Stat Unî | ||
Femmina folle (Fémna fóra 'd tèsta) 'l è 'n thriller dramàtic americàṅ dal 1945 ad John M. Stahl, candidâ a quàtar Prèmi Òscar: atōra prutagunìsta (Gene Tierney), misa in séna, sunòr e futugrafìa, pò vins par Leon Shamroy. In dal 2018 cla pelìcula chè l'è stada sarnìda p'r èsar tgnuda dacàt in dal National Film Registry dla Bibliutéca dal Cungrès di Stat Unî.
C'n i sò òt migliòṅ ad dòlar 'd incàs, 'l è stâ al sucès più grand dla 20th Century Fox di an Quarànta.
Sunt
[mudéfica la surzéia]Richard Hartland (Cornel Wilde) 'l è 'n scritōr ad rumànś in viàś in trêṅ vèrs al Mèsic Nóṿ. Lè insìma al cgnós lʼEllen Berent (Gene Tierney), na ragàsa rica 'd famìja ch'la n psiva minga dastacàr i òć da lò esénd ch'al sumiliàva dimóndi a sò pàdar mòrt che lē l'éra dimóndi ma dimóndi ligàda a lē. Dòp ès'r-as fata avànti sèg, fra i dū a nas na simpatìa e pò anc 'l amōr e lʼEllen la mòla 'l sò muróś, al giurìsta Russell Quinton (Vincent Price), par lò.
La dóna l'éra in viàś par catàr sò màdar (Mary Philips) e sò cuśìna Ruth (Jeanne Crain), adutàda da i Berent da pìcula dvintànd acsè sò surèla, par stramnàr in muntàggna fra la natùra libra al séndri ad sò pàdar, cuma lò al vliva ch'a fus fat.
Richard e lʼEllen i sa spóś'n in présia a Warm Springs ma i n vànan minga in viàś ad nòsi parchè al scritōr al gh'à da tgnir adrē a sò fradèl Danny (Darryl Hickman), un ragasōl ch'al n è più bòṅ ad giràr da par lò parchè al s éra malâ 'd pòlio, e pò al gh'à anc da finìr al rumànś nóṿ ch'l è drē a scrìvar.
.jpg)
In séguit la còpia la pasa soquànt dè in vacànsa in dla cà che Richard al gh'à in dal Maine darènt a 'n lâg, cgnusû cuma Cantòṅ dla Luna par la sò fórma, ma sèmp'r insém a Danny e a 'n amìg ad lò ch'al fà 'l taja-légna, Leick Thome (Chill Wills). In dla cà i mur dal cambri da lèt i èṅ sutìi ch'a s sènt incòsa e lʼEllen l'è angustiàda da cal fat chè.
Quànd pò i rìvan lè anc i parènt dlʼEllen, pinsànd ad far-ag na bèla surpréśa, la dóna la taca a dvintàr dimóndi malmustóśa cun tut esénd che chi lē l'è dimóndi gelóśa 'd sò marè, la vrév armàgnar sèmpar insém a lò, sénsa dl'atra gint fra i pē, far-ag da magnàr e lavàr-'g i pagn. La n s cumpatìs pròpria minga che sò marè, ch'l è da spés da par lò a scrìvar, al pòsa pasàr dal tèmp cun di àtar o a dascórar cun amìg o parènt, specialmènt cun sò surèla.
Un dè, méntar da darènt la cumpàgna in barca Danny ch'al fà di eśercìsi in dl'àqua nudànd in dal lâg, lē la 'l spròna a 'ndàr a 'l larg, pò la sa śluntàna da lò lasànd-'l andgàr méntar lò al ciàma ajùt. La mòrt la pasa par na daśgràsia e la còpia la pasa di mumènt brut, cun Richard che vilî al dvènta più fréd cun sò mujēr.
LʼEllen la pénsa ch'avēr un putèṅ a prév purtàr dla cuntintésa in dla còpia ma pò, quànd l'armàgn insìnta dabòṅ, la s pintìs parchè al sò còrp al càmbia ma specialmènt parchè l'è gelóśa dal putèṅ ch'al gh'arà da nàsar. Par far-al fóra, la s buta śò p'r al scali, faghénd finta 'd èsar strabucàda in dal tapē, acsè 'd avēr 'n abòrt.
Méntar la dóna l'è in cura, Richard al finìs al sò rumànś, catànd anc dal tèmp par star cun la Ruth. Quànd lʼEllen la lèś la dédica che sò marè 'l à fat in dal lìbar péna finî, ch'a s capìs ch'l'è par sò surèla e minga par lē, la dóna la strulga la sò vindéta in di cunfrònt dla Ruth anc a cóst ad patìr un prèsi dimóndi élt a sò vòlta. La scriv na létra a 'l sò èx muróś dvintâ in cal méntar prucuradōr distretuàł, par pò tōr dal vlèṅ e murìr.