Faith Domergue

C'l artìcul chè 'l è scrit in Miranduléś

La Faith Marie Domergue (New Orleans, 16 ad Śugn dal 1924 - Santa Bàrbara 6 'd Avrìl dal 1999, a s lèś [feɪθ məˈriː doʊˈmɛərɡ] in ingléś), l'è stada n'atōra americàna.

In dla sò caréra l'à laurâ in na sinquantìna 'd prudusiòṅ fra cìnema e televiśiòṅ, fra qvéli più impurtànti a 'rcurdém Una rosa bianca per Giulia, fata insém a Robert Mitchum, Il culto del cobra, Il mostro dei mari e i śai itagliàṅ Una sull'altra ad Lucio Fulci cun Jean Sorel, la Marisa Mell e l'Elsa Martinelli e L'uomo dagli occhi di ghiaccio 'd Alberto De Martino cun Antonio Sabato e la Barbara Bouchet.

Par via dal sò pelìculi ad scarésa l'è cgnusùda anc p'r èsar stada una dal primi regìni di sîg dal cìnema.

In televiśiòṅ 'l à tòlt part a i telefìlm Perry Mason, Bonanza e àt'r incóra in di an Sinquànta e Ssanta.

Biugrafìa

Nada in Luiśiàna, da pìcula la va à star in Califòrgna cun la sò famìja. In séguit la firma 'n cuntràt cun la Warner Bros e la s làurea in dal 1942 ma un brut incidènt in màchina al la mét in a risć ad mandàr tut a gambi p'r ària. Durànt na fèsta su 'l yacht dal migliardàri Howard Hughes chi lò al s inamóra 'd lē e 'l decìd ad far-ag far di film cun la RKO, al prim 'l è La vendicatrice dal 1950 che però al n và minga bèṅ e la Domergue la decìd ad mulàr-al dand-ag la cólpa dal fiàsc par via dla pòca reclàm fata e ad soquànt prubléma in dla distribusiòṅ dla pelìcula. Inólt'r a la Faith a n gh andàva pròpria minga bèṅ che lò al s vdis anc cun l'Ava Gardner, la Rita Hayworth e la Lana Turner.

In dal stés an la rècita in còpia cun Robert Mitchum in dal noir Una rosa bianca per Giulia ma al New York Times al gh dà adòs. In dal 1953 la firma par la Universal Pictures e dū an dòp la gira da prutagunìsta al film ad scarésa Il culto del cobra ch'al gh'à 'n bèl sucès in di cìnema, muciànd sù un migliòṅ e sèt ad dòlar. In di an a vgnir l'à laurâ dimóndi in dal Régn Unî e in Itàglia, tulénd part anc a dal prudusiòṅ a 'l rispàrmi.

L'à pasâ i sò ùlt'm an a Palo Alto prima 'd murìr ad càncar ch'la gh'iva stanta-tri an. La Domergue la s è spuśàda tri vòlti e la gh'à abû dū fiōi.