F.A.R.T. the movie
|
C'l artìcul chè 'l è scrit in
Miranduléś |
 Artiecgnusû anc cuma Big Wind on Campus | ||
| F.A.R.T. the movie | ||
 Seth Walther e la McComb in na figùra dal film | ||
| S.C.U.R.É.Ś.A. al film 2000 | ||
|---|---|---|
| Regìa: Matt Berman | ||
| Scritōr: Matt Berman | ||
| Atōr: Seth Walther • Kevin P. Farley • John Farley Heather McComb • Vin Penn • Rance Howard Christine Steel • Adrian R'Mante • Dee Wallace Daniel Cosgrove • Royce D. Applegate • Joe Virzi Leslie Easterbrook • Jack Serino • Deana Barone | ||
| Müsica: Jamie Dunlap • Scott Nickoley | ||
| Léngua: Ingléś | ||
| Dürä dal film: 86 minüt | ||
| Nasiōṅ: Stat Unî | ||
F.A.R.T. the movie (S.C.U.R.É.Ś.A. al film) l'è na cumèdia ad cretinìśia dal 2000 scrita e dirèta par Matt Berman ch'in Itàglia l'à tòlt al nóm da 'l tìtul dla sò edisiòṅ ingléśa e minga da 'l qvél uriginàł americàṅ ch'l è “Artie” (in séguit arfàt in “Big Wind on Campus”).
Al film 'l è stâ girâ c'n un budget 'd un migliòṅ ad dòlar.
Sunt
Frank Wilson (Daniel Cosgrove) 'l è dimóndi cuntènt parchè sò mujér Dana (Jackie Swanson) la gh'à 'd avér fiōl. A 'l uśdàł a nas un masć, ciamâ Arthur, ch'al tira subìt na scuréśa. Al dutōr Hugh Little (Gregory Cupoli) al gh fà i raś par védar s'al gh'à di prubléma in dla pansa e pò al cònta a i dū genitōr cum i èṅ i fat dabòṅ: al sò putèṅ 'l è pròpria 'n scurśòṅ patintâ, a n gh'è pròpria gnint da far.
Soquànt an dòp Artie (Seth Walther), dvintâ grand ma sémpar c'n al biśógn ad mulàr dal scuréśi a róta 'd còl, al và a 'l college insém a i sò amìg Kevin Cutterback (Kevin P. Farley), dit "Bear" (Órs) par la pansa ch'al gh'à, Scooter (John Farley) e Donnie (Chris Soldevilla). Artie 'l è inamurâ ad cla bèla figa dl’Andre'a Parker (Christine Steel) che però la n in vōl savēr anc parchè al muróś la gh 'l à bèla, Johnny Alpha (Adrian R'Mante). Inóltar par lē lì lò 'l è 'n sfigâ parfèt e basta. Anc al vìgil Clemmons (Royce D. Applegate) al gh dà sèmp'r adòs parchè al gh vōl sèmpar far dal multi cuma s'al fus 'n imbariagòs.
Un dè Artie al juta na studènta nóva rivàda lè da pôc, l’Emily Miller (Heather McComb), a dascargàr da la màchina la sò valìś ch'la péśa dimóndi, pò al śibìs a l’Andre'a e a la sò amìga Kristen (Jennifer Hammon) ad vgnir cla sira lè a na fèsta ch'i gh'aṅ da dar ma lōr i n s fànan minga védar da cla banda, s'almànc lē la saìs che Johnny al gh mét i còran pròpria cun la sò amìga! Piutòst l'è l’Emily ch'l'à butâ i òć adòs a Artie. Quànd al và a magnàr a cà di sò nunòṅ, al sgnōr Morton (Rance Howard) e sò mujér Gloria (Bunny Summers), par séna i gh daṅ da magnàr dla supa 'd càvui, sigóla e ravanèi e pò hotdog e faśōi, un diśàstar par lò parchè i gh fànan vgnir, i al sànan tut, di gas in dal budèli.
Trama dal DVD
La trama ch'la cumparìs in dl'edisiòṅ itagliàna dal DVD d'l “EP production” la n gh'éntra pròpria par gnint cun qvéla dal film parchè la fà riferimènt a n'atra pelìcula dal 1991 ad Ray Etheridge c'n al stés tìtul F.A.R.T.: The Movie.
Russell (?) al gh'à dū pasiòṅ: guardàr la TV (?) e scurśàr. Lì lò 'l è anc inamurâ dl’Heather (?) ch'la n s cumpatìs pròpria briśa 'l scuréśi! La dóna, stufa ad cla situasiòṅ lè, la gh dà 'n ultimatum: «O 't la muc, o 't và via 'd cà par sèmpar!» (?) Na sira al và a durmìr e in di sò insùni tut i quèi ch'i sucéd'n in televiśiòṅ, da 'l sitcom a 'l televéndidi, i gh'èntran c'n al scuréśi. (?)