Ewan McGregor

C'l artìcul chè 'l è scrit in Miranduléś

Ewan Gordon McGregor (Perth, 31 ad Mars dal 1971, a s lèś [ˈjuːən məˈɡɹɛɡɚ] in ingléś) 'l è 'n atōr scuséś. Al gh'à na stéla in dla Hollywood Walk of Fame e in dal 2012 'l è stâ numinâ Ufisiàł d'l Órdan d'l Impēr Britànic.

In dla sò caréra 'l è stâ bòṅ ad vìns'r un Golden Globe par la série televiśìva Fargo, su quàtar candidadùri, e anc 'n Emmy Award. In dal 2016 'l dirèt la Jennifer Connelly in dla pelìcula American Pastoral in du lò 'l à fat la part dal “Śvedéś”.

Biugrafìa

Ewan 'l è fiōl ad dū insgnànt e anvōd d'l atōr Denis Lawson e 'l è carsû a Crieff in Scòsia. A daśdòt an al và a star a Lóndra par studiàr a la Guildhall School of Music and Drama. Da sèmpar pasiunâ 'd teàtar, al taca la caréra da atōr lè ma anc in prudusiòṅ televiśìvi britànichi, faghénd pò al sò debùt a 'l cìnema in dal 1994 cun la cumèdia dramàtica Le cinque vite di Hector, cun Robin Williams, John Turturro e Vincent D'Onofrio, e in dal thriller Piccoli omicidi tra amici ad Danny Boyle. Sèmpar c'n al regìsta 'd Manchester al gira dū an dòp Trainspotting, film ch'l al fà cgnós'r anc a 'l èstar trat da 'l rumànś umònim 'd Irvine Welsh in du 'l fà 'n drugâ pódag e delinquènt in dal stradi 'd Edimbûrg, e pò la cumèdia Una vita esagerata a fiànc dla Cameron Diaz.

Sèmp'r in chi an lè al rècita in I racconti del cuscino ad Peter Greenaway (1996), in dla cumèdia dramàtica Grazie, signora Thatcher (1996), in dal thriller Nightwatch - Il guardiano di notte (1997), insém a la Patricia Arquette, Nick Nolte e Brad Dourif, e in dal film muśicàł ispirâ a David Bowie Velvet Goldmine (1998) su i an dal glam rock cuma muivènt cunturàł.

In dal 1999 'l è 'l prutagunìsta dal thriller The Eye - Lo sguardo, a fiànc dl'Ashley Judd e dla Geneviève Bujold.

Tulénd part a Star Wars - Episodio I - La minaccia fantasma (1999), a Star Wars: Episodio II - L'attacco dei cloni (2002) e a Star Wars: Episodio III - La vendetta dei Sith (2003), in dla part dal śōvan Obi-Wan Kenobi, al cata 'l sucès mundiàł. A 'l inìsi di an Dumìla al gira anc al drama muśicàł Moulin Rouge! (2001), in còpia cun la Nicole Kidman, al film ad guèra Black Hawk Down - Black Hawk abbattuto (2001), la cumèdia cun la Renée Zellweger Abbasso l'amore (2003), al drama eròtic Young Adam (2003), cun la Tilda Swinton, e 'l fantàstic Big Fish - Le storie di una vita incredibile (2003), film ad Tim Burton cun la Jessica Lange, la Marion Cotillard e Danny DeVito.

In dal 2007 'l à laurâ cun Woody Allen e Colin Farrell in dal thriller Sogni e delitti méntar 'l an dòp 'l à incruśâ Hugh Jackman in Sex List - Omicidio a tre. In dal 2009 'l à fat 'l amànt ad Jim Carrey in Colpo di fulmine - Il mago della truffa, un prevòstar in dal śal Angeli e demoni, a fiànc ad Tom Hanks, e 'n giurnalìsta in dla cumèdia L'uomo che fissa le capre, giràda insém a George Clooney, Jeff Bridges e Kevin Spacey.

In séguit 'l è stâ prutagunìsta dal thriller ad Roman Polański L'uomo nell'ombra (2010), dla cumèdia sentimentàla Il pescatore di sogni (2011), cun l'Emily Blunt, dal film 'd asiòṅ Knockout - Resa dei conti (2011), girâ cun Michael Fassbender, Bill Paxton, Antonio Banderas e Michael Douglas, e dal drama Son of a Gun (2014).

Fra i sò ùltim lavōr a 'rcurdém T2 Trainspotting (2017), séguit dal sò prim sucès dal 1996, La bella e la bestia (2017), film live action cun l'Emma Watson, Dan Stevens e Kevin Kline, e la pelìcula 'd scarésa Doctor Sleep (2019).

In televiśiòṅ a 'l ém vist in I racconti della cripta, E.R. - Medici in prima linea, Fargo (par déś epiśòdi), Obi-Wan Kenobi e Un gentiluomo a Mosca.

Dòp èsar stâ spuśâ da 'l 1995 a 'l 2020 cun la senógrafa Eve Mavrakis, in dal 2022 'l è dvintâ 'l marè dla Mary Elizabeth Winstead, atōra cgnusùda su 'l set ad Fargo. In tut al gh'à sinc fiōi (dū adutâ).