Elesiòṅ presidensiàli americàni dal 1984
|
C'l artìcul chè 'l è scrit in
Miranduléś |
Gl’Elesiòṅ presidensiàli americàni dal 1984 i gh'ènan stadi al 6 ad Nuvémbar dal 1984 fra 'l presidènt in carga, al republicàṅ Ronald Reagan, e 'l candidâ demucràtic dal Minneśòta Walter Mondale, èx vice-presidènt di Stat Unî a i tèmp ad Jimmy Carter, ch'l iva batû in dal primàri dal sò partî al senadōr dal Culuràdo Gary Hart e 'l reverénd d'l Illinòis Jesse Jackson.
Par la prima vòlta in dla stòria dla federasiòṅ òṅ di candidâ a la presidénsa 'l iva numinâ cuma sò vice na dóna, la Geraldine Ferraro p'r i demucràtic, méntar Reagan 'l iva sarnî George H. W. Bush dal Tèxas ch'in dal 1989 al dvintarà a sò vòlta 'l 41śum presidènt di Stat Unî.
Ronald Reagan l'à pò vins gl'elesiòṅ miténd-'s in bisàca 'l 58,8% di vōt cónt'r al 40,6% dal sò rivàl ma, qvél ch'a cònta dabòṅ, tut i sìngui stat a part al Minneśòta, pardû fra 'l àtar par sōi trimìla-setsènt vōt (al 0,18%), e 'l Distrét ad Culùmbia, al teritòri dla capitàl da sèmpar da la banda di demucràtic anc cun dal persentuàli ch'i pàs'n al 90%.
Par l'ultma vòlta 'd in alóra i stat dal Massachusetts, ad New York, d'l Òregun, dgl'Hawaii, dal Rhode Island e 'd Washington i aṅ dâ 'l sò apòǵ a 'n candidâ dal GOP.