Elesiòṅ in di Stat Unî dal 2018

 Miranduléś

C'l artìcul chè 'l è scrit in Miranduléś

Riśultâ a la cambra: i séǵ demucràtic i èṅ in celèst (cunfermâ) e in blù (nóṿ), qvéi republicàṅ in ròśa (cunfermâ) e rós (nóṿ), in griś qvéi a 'l ricuntéǵ

Elesiòṅ di guvernadōr: i stat demucràtic i èṅ in blù (cunfermâ) e in blù ciàr (nóṿ), qvéi republicàṅ in maròṅ (cunfermâ) e rós (nóṿ), in griś ciàr i stat in du a n s è briśa vutâ

Gl’elesiòṅ in di Stat Unî dal 2018, ciamàdi “midterm elections” (elesiòṅ ad mità mandâ), i gh'èṅ stadi al 6 ad Nuvémbar dal 2018, al primi dòp l'elesiòṅ a presidènt ad Donald Trump in dal 2016 a part soquànti elesiòṅ speciàli par di séǵ lasâ lìbar in Kànsas in dal 2017, in Geòrgia in dal 2017, in Alabàma in dal 2017 e in Pennsylvania in dal 2018.

A gh'éra d'arnuvàr dal tut la Cambra di rapreśentànt (435 mémbar vutànt), 33 séǵ da senadōr dla prima class e 2 séǵ da senadōr dla secónda class in Minneśòta e in Alabàma (vacànt par dimisiòṅ). Inólt'r a gh'éra da elèśar trénta-nóṿ guvernadōr. Tuti e dū 'l cambri i ér'n in maṅ a i republicàṅ.

In dal stés mumènt i s èṅ tgnû da piò ad sènt-sinquànta referendum, urganiśâ in cal giōran là in trénta-sèt stat.

Riśultâ

I demucràtic i aṅ ciapâ 'l cuntròl dla cambra dòp òt an śgranfgnànd via almànc trénta-nóṿ séǵ a i republicàṅ (a gh'è da batśàr-'n incóra òṅ, qvél dla Califòrgna 21) pasànd dònca a 234 deputâ cóntar 200, muciànd sù al 53,22% di vōt cónt'r al 45,06%. I demucràtic i aṅ fat al pîṅ in Massachusetts (9-0), in Connecticut (5-0) e in dal Mèsic Nóṿ (3-0), avēnd un bèl sucès anc in Illinòis (13-5), Maryland (7-1), New Jersey (11-1), New York (21-6), Califòrgna (45-8) e Òregun (4-1). I republicàṅ i aṅ fat capòt in Arkànsas (4-0), in Virgìgna Ucidentàla (3-0) e in Nebràska (3-0), muciànd sù dimóndi anc in Alabàma (6-1), Indiàna (7-2), Kentucky (5-1), Luiśiàna (5-1), Carulìna dal Nòrd (10-3), Ohio (12-4) e Tèxas (23-13).

Da 'l cant suo i republicàṅ i aṅ mantgnû al senàt (53 a 47, a gh'è da batśàr-'n incóra òṅ), pardénd al séǵ ch'l éra stâ 'd John McCain in Ariśòna e anc qvél in Nevàda ma vinsénd in dal Dakòta dal Nòrd, in Indiàna, in Flòrida e in Missouri.

Dascurénd di guvernadōr, i demucràtic i aṅ purtâ via a i republicàṅ sèt stat sénsa pèrd'r-an (Illinòis, Kànsas, Maine, Mìchigan, Nevàda, Mèsic Nóṿ e Wiscònsin) mént'r i republicàṅ i aṅ vins in Alàska in du a gh'éra 'n guvernadōr indipendènt.

Anàliśi dal vōt

Dand 'n òć a i flus eleturài, p'r al partî republicàṅ i s èṅ mis i biànc (54 cóntar 44), i prutestànt e i cristiàṅ minga catòlic (58 cóntar 42), i veteràṅ ad guèra (58 cóntar 41) e i campagnōi (56 cóntar 42), da la banda di demucràtic i ér'n invéci al dóni (59 cóntar 40), i put (61 cóntar 37), i négar (90 cóntar 9), gl'aśiàtic (77 cóntar 23), gl'ispànig (69 cóntar 29), gl'ebrèj (79 cóntar 17), gl'àteo (70 cóntar 28), i śōvan (68 cóntar 31 sóta i vint-sinc an, 66 cóntar 33 da i vint-sinc a i vint-nóṿ an, 59 cóntar 37 da i trénta a i trénta-nóṿ an), i fnòć (82 cóntar 17), i laureâ specialiśâ (65 cóntar 34), i sitadèṅ (65 cóntar 32) e i pòvar sóta i trénta-mila dòlar 'l an (63 cóntar 34).

Reasiòṅ in Itàglia

Al guèr'n itagliàṅ, par bóca dal minìstar d'l intéran Matteo Salvini, al s è cungratulâ cun Trump p'r al sò triònf mént'r al prim minìstar Giuseppe Conte, pôchi óri prima ch'i sarìsan gl'urni, 'l à dit che par lò «Trump 'l è drē a far dimóndi bèṅ p'r al sò paéś ma a n vōj briśa tōr puśisiòṅ parchè i gh'aṅ incóra da vutàr e a n vój minga interferìr c'n un paéś aleâ».

Nòti