Edward Furlong

C'l artìcul chè 'l è scrit in Miranduléś

Edward Walter Furlong (Glendale, 2 'd Agóst dal 1977, a s lèś [ˈɛdwərd ˈfɜːrlɒŋ] in ingléś) 'l è 'n atōr americàṅ.

Uriginàri dla Califòrgna, Furlong al taca a far al mistēr da atōr par caś a quatórd'ś an quànd 'l agìnt teatràł Mali Finn al gh buta i òć adòs, batśànd-al parfèt par far-ag far la part dal śōvan John Connor in dal film 'd asiòṅ Terminator 2 - Il giorno del giudizio cun prutagunìsta Arnold Schwarzenegger e la Linda Hamilton. La pelìcula la gh'à 'n sucès clamuróś e la caréra 'd Furlong la ciàpa 'l vōl.

'L an dòp al tōś part a 'l film ad scarésa Cimitero vivente 2 mént'r in dal 1992 a 'l ém vist in dal drama American Heart, a fiànc ad Jeff Bridges. In séguit 'l à fat al fiōl dla Kathy Bates in Una casa tutta per noi, la part ad Michael Bower in dal thriller fantasientìfig Brainscan - Il gioco della morte e 'l fradèl più pìcul dal criminàł Tim Roth in dal noir Little Odessa.

In dal 1995 'l è prutagunìsta ad Storie d'amore, cumèdia ambintàda in d'l Alabàma di an Quarànta cun la Sissy Spacek, la Piper Laurie, Walter Matthau e Jack Lemmon, méntar 'l an dòp 'l è in dal cast dal thriller Prima e dopo insém a la Meryl Streep e a Liam Neeson.

A la fiṅ di an Nuànta, in còpia cun la Christina Ricci, al gira 'l film indipendènt Pecker in dua 'l fà un ragàs ad Baltimòra cun la pasiòṅ par la futugrafìa e pò 'l thriller dramàtic American History X, in dla part 'd un ragàs ch'al gh'à dimóndi amirasiòṅ p'r al sò fradèl più grand e neo-naśìsta Edward Norton, e la cumèdia Detroit Rock City, in dla part 'd un fan di Kiss ch'al vōl a tut i cóst andàr a 'n cuncèrt dal grup a Detroit insém a i sò amìg.

In dal 2000 al lavóra in dal drama Animal Factory, pelìcula 'd Steve Buscemi cun Willem Dafoe e Mickey Rourke, méntar 'l an dòp al vîṅ sarnî da Pupi Avanti par la part dal prutagunìsta, al cavalēr Simon ad Clarendon, dal sò film stòrig I cavalieri che fecero l'impresa.

A vint-quàt'r an particamènt la sò caréra la finìs lè parchè Furlong al taca a 'vēr di prubléma sèri 'd alculìśum e cun la dròga (eruìna e cucaìna), inóltar al n éra minga bòṅ ad cuntrulàr-as in di cunfrònt ad sò mujēr Rachael Bella, màd'r ad sò fiōl Ethan Page, tant ch'l è stâ denunsiâ p'r avēr-la piciàda. Edwar 'l à cuntinuâ a recitàr in séguit, ma sèmp'r in film piculèṅ o in quàlc telefìlm cuma CSI: NY, faghénd al masadōr seriàł Shane Casey, pasànd anc dimóndi dè in parśòṅ e in clìnica per diśintusicàr-as.