Edison City
|
C'l artìcul chè 'l è scrit in
Miranduléś |
 Edison | ||
| Edison City | ||
 LL Cool J e Timberlake in na figùra dal film | ||
| id. 1993 | ||
|---|---|---|
| Regìa: David J. Burke | ||
| Scritōr: David J. Burke | ||
| Atōr: Justin Timberlake • Morgan Freeman LL Cool J • Kevin Spacey • Dylan McDermott John Heard • Cary Elwes • Roselyn Sanchez Damien Dante Wayans • Garfield Wilson | ||
| Müsica: Machine Head | ||
| Léngua: Ingléś | ||
| Dürä dal film: 99 minüt | ||
| Nasiōṅ: Stat Unî • Germàgna | ||
Edison City (id.) 'l è 'n thriller americàṅ e tedésc dal 2005 scrit e dirèt par David J. Burke, cun prutagunìsta 'l cantànt Justin Timberlake, a 'l debùt cuma atōr, e 'l rapper LL Cool J, ólt'r a Morgan Freeman e a Kevin Spacey, a sò dita al film più brut ch'l àppia mai girâ. La culòna sunóra l'è stada scrita p'r al grup groove metal di Machine Head.
La pelìcula, preśentàda a 'l 30śum Fèstival Internasiunàł dal Cìnema ad Turònt, l'è stada 'n flop clamuróś avénd purtâ a cà sōl quàtar migliòṅ e òṅ ad dòlar a frònt 'd un cóst ad vint-sinc.
Sunt
[mudéfica la surzéia]In dla sità 'd Edison a gh'è na sesiòṅ curóta dla pulisìa ciamàda F.R.A.T. (First Response Assault e Tactical) ch'l'agìs fóra da 'l règhli, miténd insém di intervènt cónt'r al crìmin cun di asiòṅ arvèrsi a la léǵ cuma masamènt, tiràr dal bòti e ladrarìi. Gl'ultmi vitmi ad chi fat chè i èṅ dū spaciadōr négar bcâ ad nòt cun dla dròga: Rook (Garfield Wilson) e Isiaha Charles (Damien Dante Wayans). Dòp avēr-ag purtâ via 'n muć ad bèsi e tuta la dròga, par pò psēr véndar-la lò, 'l agìnt Lazerov (Dylan McDermott) al masa Rook custrinśénd Isiaha a ciapàr-as tuta la cólpa, giùst p'r armàgn'r in vita.
A 'l prucès a testimònia Raphael Deed dit Rafe (LL Cool J), un culéga 'd Lazerov ch'l éra là sèg cla nòt là ma ch'al n à minga abû 'l curàǵ a sparàr a sànguv fréd cónt'r i spaciadōr. Chi lò al cònta i fat a 'l giùdas, tgnénd adrē a la traplàda 'd Lazerov, sénsa però andàr-ag śò pēś. Quànd al giurnalìsta Joshua Pollack (Justin Timberlake) al sènt Isiaha ringrasiàr Deed, al capìs ch'a gh'è quèl ch'a traśa e ch'a gh'è sóta quèl.
Pollack al vrév scrìvar 'n artìcul andànd-'g a fónd ma 'l sò editōr Moses Ashford (Morgan Freeman) al n è minga 'd acòrd parchè al n vōl briśa insaplàr-as, par lò 'l è abàsta butàr śò quèl su 'l verdét e basta acsè. Quànd Pollack al và adrē incóra, lò prima 'l al licénsia ma pò al gh dà al sò apòǵ. Anc 'l investigadōr Levon Wallace (Kevin Spacey) 'l è da la sò banda e, par prutèś'r-al, 'l al lóga in na sò cà 'd campàggna dòp che i óm dla F.R.A.T. i 'l aṅ piciâ 'd brut, insém a la sò muróśa Willow (Piper Perabo), par dar-ag na lesiòṅ e par far-al vansàr 'd andàr avànti cun l'inchiésta esénd lò andâ a far dal dmandi a Isiaha in parśòṅ.
Anc Deed al taca a pintìr-as dal sò rōl a 'l intèran dla F.R.A.T., dòp tut qvél ch'l à vist, e 'l vrév far-as na famìja cun la sò muróśa, la Maria (Roselyn Sanchez). Ashford e Pollack, ch'l è scampâ par pôc a 'n tintatìṿ ad Lazerov ad cupàr-al, i tàc'n a 'vēr di suspèt su 'l prucuradōr distretuàł Jack Reigert (Cary Elwes), dimóndi ligâ a la pulìtica e a 'l còrp dla F.R.A.T., cmandâ p'r al curót Tilman (John Heard).