Eagle Eye (film)
|
C'l artìcul chè 'l è scrit in
Miranduléś |
 Eagle Eye | ||
.png) Shia LaBeouf e la Monaghan in na figùra dal film | ||
| Òć 'd àquila 2008 | ||
|---|---|---|
| Regìa: D.J. Caruso | ||
| Scritōr: John Glenn • Travis Wright Hillary Seitz • Dan McDermott | ||
| Atōr: Shia LaBeouf • Michelle Monaghan Rosario Dawson • Michael Chiklis • Anthony Mackie Ethan Embry • Billy Bob Thornton • Lynn Cohen Anthony Azizi • Cameron Boyce • Bill Smitrovich | ||
| Müsica: Brian Tyler | ||
| Léngua: Ingléś | ||
| Dürä dal film: 118 minüt | ||
| Nasiōṅ: Stat Unî • Régn Unî • Germàgna | ||
Eagle Eye (Òć 'd àquila) 'l è 'n thriller 'd asiòṅ americàṅ, tedésc e britànig dal 2008 ad D.J. Caruso, ch'al tōś ispirasiòṅ da 'l racònt Tut i guàj dal mónd 'd Isaac Asimov. La pelìcula, ch'l'à muciâ sù dagnóra sènt-utànta migliòṅ ad dòlar a frònt 'd un cóst 'd utànta, la gh'iva da èsar dirèta par Steven Spielberg, esénd sua l'idéa dal film, ma lò 'l éra impgnâ a giràr Indiana Jones e il regno del teschio di cristallo.
La vōś dal supercomputer ARIA l'è dla Julianne Moore.
Sunt
[mudéfica la surzéia]Dòp n'uperasiòṅ parmìsa da 'l presidènt di Stat Unî (Madison Mason) par cupàr di terurìsta in Afgànistan, andàda pò mâł e scunsiliàda fra 'l àtar da 'l supercomputer segrét dal pentàgun cun inteligénsa artifisiàla ARIA, un ragàs bòṅdagnìnt e buletàri ciamâ Jerry Shaw (Shia LaBeouf) al s cata a 'l impruvìś un muć ad bèsi su 'l sò cònt curènt ma anc dgl'armi in dal sò apartamènt, giusà purtàdi da chi. A n sèrt punt al ricév na ciamàda a 'l telefunèṅ da part dna dóna misterióśa ch'la gh diś che di agìnt d'l FBI i èṅ drē a rivàr lè p'r arestàr-al e ch'al gh'à pôc minùt par scapàr via in présia. Al ragàs, ch'al n gh créd minga, al vîṅ purtâ via da i pulisiòt federài e pò lasâ a 'l agìnt Thomas Morgan (Billy Bob Thornton) ch'al gh'à da interugàr-al.
In cal méntar la Rachel Holloman (Michelle Monaghan), na ragàsa separàda c'n un putèṅ pìcul da crésar ciamâ Sam (Cameron Boyce), sunadōr ad trómba, la ricév na telefunàda da la dóna ch'la s éra misa in cuntàt cun Jerry. La vōś a 'l telèfun la gh diś ad far di quèi per lē o sinò al putèṅ al farà na bruta fîṅ. Al prim fat da far 'l è qvél ad scarusàr luntàṅ Jerry che la dóna misterióśa l'à jutâ in na quàlc manéra a scapàr via da i óm d'l FBI.
La dóna dal telèfun la n è àtar che l'inteligénsa artifisiàla ARIA, prugramàda par cònt dal guèran da 'l tècnig infurmàtig Ethan Shaw (Shia LaBeouf), śmèl omośigôt ad Jerry, mòrt in cal mént'r in 'n incidènt in màchina. ARIA, ch'l'agìs par cònt ad “Nuàt'r al Pòpul”, la gh'à intensiòṅ ad far fóra tuta l'aministrasiòṅ pulìtiga ligàda a 'l presidènt, e specialmènt lò, in nóm dal prinsìpi scrit in dla Dichiarasiòṅ 'd Indipendénsa ch'la diś che tut al vòlti che na fórma 'd guèran basta ch'a sia la dvènta 'n perìcul, al pòpul al gh'à dirìt ad cambiàr-la o ad tiràr-la via. ARIA l'agìs dònca in nóm dal pòpul americàṅ e la vōl curèś'r i śbali dal presidènt fat cun l'uperasiòṅ sénsa critèri in Afgànistan. Par far-al, ARIA la gh'à di mèś dimóndi putènt, esénd bòna 'd cuntrulàr tut i dispuśitìṿ letrònic cuma computer, semàfur, telecàmeri, lìnei elètrichi, telefunèṅ e via dascurénd. L'è lē pò ch'l'à fat fóra Ethan ch'al vliva farmàr-la.
Al segretàri dla diféśa Callister (Michael Chiklis) al lasa a la Zoë Perez (Rosario Dawson) e a 'l magiōr William Bowman (Antonio Mackie) 'l incàrag 'd indagàr su la mòrt 'd Ethan. In cal méntar 'l agìnt Thomas Morgan al dà la casa a Jerry e a la Rachel, in fuga p'r i Stat Unî. ARIA al gh'à biśógn ad lōr par mét'r in òvra 'n atintâ a 'l presidènt a Washington, sénsa però che chi lōr dū i n sàvan gnint.