Double Tap

Da Wikipedia.

C'l artìcul chè 'l è scrit in Miranduléś Emiliàn

Double Tap
Double Tap

Terrence Howard in na figùra dal film
Dópi tîr
1997
Regìa: Greg Yaitanes
Scritōr: Erik Saltzgaber • Alfred Gough • Miles Millar
Atōr: Stephen ReaHeather LocklearKevin Gage
Peter GreeneMykelti WilliamsonRobert LaSardo
Richard EdsonTerrence HowardGreg Collins
Müsica: Moby
Léngua: Ingléś
Dürä dal film: 87 minüt
Nasiōṅ: Stat Unî


«
Al prim cōlp 'l è 'n òblig, al secónd...»
(Tagline dal film)


Double Tap (Dópi tîr), cgnusû in Itàglia anc cuma “Il segno del killer” o cuma “Doppio tiro”, 'l è 'n thriller 'd asiòṅ dal 1997 ad Greg Yaitanes girâ a Los Angeles c'n un budget stimâ 'd òt migliòṅ ad dòlar.

La sò culòna sunóra l'è stada scrita p'r al cantànt Moby.

Sunt

Cypher (Stephen Rea) 'l è rivâ da pôc a Los Angeles e par campàr al śéga i prâ par sènt dòlar. Al sgnōr Fung Suk (Michael Paul Chan) 'l è 'n malandrèṅ dla màfia cinéśa ch'al gh'à di lucài a luś rósi ma ch'al fà anc di tràfic ad bèsi muśnènt da Hong Kong. L'agìnta d'l FBI Katherine Hanson (Heather Locklear) la próa a insfilsàr-'s in dla sò urganiśasiòṅ p'r andàr-'g a fónd ma na sira, mént'r i dascóran 'd afâr, a riva lè Cypher ch'al fà fóra lò e i sò óm tirànd-ag dū cōlp in cô, lasànd in vita lē.

I sò culéga pulisiòt Hamilton (Mykelti Williamson), Burke (Kevin Gage) e Rodriguez (Robert LaSardo) i 'l crédan òṅ ch'al vaga in gir a far-as giustìsia da par lò parchè al masa sōl dla bruta gint, na sinquantìna a vgnir a 'dès e mai di pulisiòt, e pò al gh lasa sèmpar lè 'd intór'n un śampèṅ ad cunèṅ. La Katherine, ch'la s divertìs a far di puzzle in dal tèmp lìbar, la pénsa invéci ch'al sia òṅ pagâ p'r al traficànt ad dròga mesicàṅ Johnny Escobar (A Martinez), òṅ ch'al s la fà rivàr lugàda in dla pansa di nimài, ma a n è pròpria minga acsè parchè Cypher al fà fóra anc chi lò. In tut al manéri 'l è ciàr che c'l óm misterióś là al gh l'à c'n i spaciadōr più impurtànt dla sità. Dòp i “grugn śai” e i “latinos” adès i gh càl'n i négar, Ulisse Jones (Terrence Howard) par dir-'n una. Chi lò al s bèca dū cōlp da 'n buś fat in dal pavimènt da 'l piàṅ ad sóta.

Cypher 'l è 'n èx pulisiòt, adès sasèṅ a pagamènt ma sōl ad bruti parsòni, di scaravàś e dal simśi a sò dita. 'L ùltim a dar-ag 'n incàrag 'l è stâ Nash (Peter Greene). Cypher l è sèmp'r andâ a barsàj sicûr a part un sèrt Fischer (Richard Edson) ch'al l'à fata franca parchè al gh'iva 'n pès ad fèr inciuldâ in dal crani da i tèmp dla guèra ch'al 'l iva prutèt. 'L óm al cònta a la Katherine che Cypher al gh'iva dit ch'l al vliva masàr parchè al s éra ciulâ la fiōla 'd un sò vśèṅ ad cà. Par ciamàr-'l a gh'è da rispónd'r a di anùnsi che lò al mét in si giurnài par di servìsi ad diśinfestasiòṅ. La pulisiòta la n pèrd minga tèmp e la gh dà apuntamènt in un bar dgénd-ag ch'l'è armàśa cuntènta dal sò lavōr fat c'n i cinéś. Qvél ch'la Katherine la n sà briśa 'l è ch'la gh'à 'n óm ad Nash in di garét, Nunns (Greg Collins).

Culegamènt estéran