Double Bang
|
C'l artìcul chè 'l è scrit in
Miranduléś |
 Double Bang | ||
 Adam Baldwin in na figùra dal film | ||
| Cōlp dópi 2001 | ||
|---|---|---|
| Regìa: Heywood Gould | ||
| Scritōr: Heywood Gould | ||
| Atōr: William Baldwin • Jon Seda • Adam Baldwin Elizabeth Mitchell • Byron Minns • Leonard Termo Sofia Milos • Richard Portnow • John Capodice Billy Mayo • Christian Camargol • Una Damon | ||
| Müsica: John Leftwich | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî | ||
Double Bang (Cōlp dópi) 'l è 'n film pulisiésc dal 2001 srit e dirèt p'r Heywood Gould, girâ a Los Angeles c'n un bidget ad siē migliòṅ ad dòlar.
In ingléś, un sasèṅ a pagamènt al fà 'n „Double Bang“ quànd al fà dū cōlp a 'l prèsi 'd òṅ.
Sunt
[mudéfica la surzéia]Billy Brennan (William Baldwin) al fà 'l pulisiòt a New York laurànd p'r al tenènt Shatkin (Richard Portnow) insém a i sò culéga McKracken (Billy Mayo), la Brenda (Suzanne Carney) e Vinnie Krailes (Adam Baldwin) ch'l è anc al sò cumpàgn in dal misiòṅ quànd i vaṅ fóra in dū. Chi lò, ch'al fà sèmpar la part d'l agìnt “catìṿ” ch'al dà i marùc a i delinquènt, 'l è dimóndi sò amìg e 'l gh'à di putèṅ e na mujēr ciamàda Carmela (Sofia Milos).
La dutōra Karen Winterman (Elizabeth Mitchell) l'è na strica-sarvèl ch'la lavóra par 'l ufìsi dla libertà cundisiunàda, tgnénd adrē a di pasiènt cun di prubléma cun la giustìsia. Fra 'd lōr a gh'è anc Brian Jacobs (Christian Camargo), un drugâ ch'al fà 'l gigolò p'r al sgnōri dna sèrta età. Na nòt i dū i finìs'n anc a lèt insém.
Durànt n'indàśin p'r un furt ad pelìsi, Billy e Vinnie i bècan prima 'n sèrt Richie Mauropides dit “al grèc” (Joe Sabatino) e pò Jukie (Dominic Oliver) ch'al fà 'l nóm ad Brian Jacobs cuma culaburadōr dal cap dna banda mafióśa 'd criminài cmandàda par Sally Pescatore dit Fish (Jon Seda). Chi lò 'l è sòlit ślungàr-ag dla dròga a gràtis in cambi dal sò ajùt e par psēr druàr un sò apartamènt ch'al gh'à a Brooklyn.
I dū pulisiòt i riv'n in d'l apartamènt ad Sally par ciapàr-al. Dòp avēr-al ligâ a 'l lèt, Vinnie al gh tira soquànt pugn in dla pansa par far-al dascórar in fiṅ tant che Fish al śibìs di bèsi, dimóndi bèsi, a i dū agìnt par srar 'n òć. Billy 'l è unèst e 'l gh diś ad vansàr ma Vinnie 'l è dl'idéa ch'a gh s pōl pinsàr, parchè al gh'à na famìja da mantgnìr e spéśi e buléti da pagàr. I pulisiòt i làsan l'apartamènt, Billy al n è minga 'd acòrd ma 'l lasa pèrdar par far un piaśēr a 'l sò amìg anc s'al gh diś ch'al s catarà 'n àtar partner.
Finî in dla réda 'd Pescatore, Vinnie a 'l inìsi al s bèca la sò part ma pò Sally al decìd ad far-al fóra, pagànd un sicàri ciamâ Edmund (Byron Minns) par cupàr-al. Chi lò, ch'l è 'l fiōl 'd un cantànt ad mùśica soul finî in daśgràsia prima 'd murìr, al riva in d'l albèrg in du a s cata Vinnie par sparàr-ag ma 'l s cata davànti di agìnt ad Shatkin ch'i éran lè p'r incastràr al pulisiòt mars. Edmund, prima 'd scapàr via, 'l in masa quàtar, frénd anc Vinnie. Chi lò al s sèra dèntar dgénd a i pulisiòt rivâ lè dòp al masàcar ch'al vōl dascórar sōl cun Billy. Quànd chi lò al riva, Vinnie al mōr faghénd in tèmp a dir-ag ch'al respunàbil 'l è Fish.
Dòp che Sally 'l à fat masàr Jacobs, dand a Edmund 'l incàr'g ad far fóra anc la Karen, Billy al decìd 'd andàr a dascórar c'n al sîṅ ad Fish, Frankie Carbonaro (John Capodice) mafióś anc lò, par dir ch'al vōl savēr al nóm dal sicàri par far giustìsia dal sò amìg.