Vai al contenuto

Don Cheadle

Da Wikipedia.

C'l artìcul chè 'l è scrit in Miranduléś Emiliàn

Don Cheadle tòlt śò in dal 2011


Donald Frank Cheadle Jr., cgnusû méj cuma Don Cheadle (Kànsas City, 29 ad Nuvémbar dal 1964, a s lèś [dɑn ˈt͡ʃiːdəl] in ingléś), 'l è 'n atōr, prudutōr e regìsta americàṅ, candidâ a i Prèmi Òscar dal 2005 par la part d'l imprendidōr ruandéś Paul Rusesabagina in dal stòrig Hotel Rwanda.

'L è cgnusû anc p'r avēr fat al persunàǵ ad War Machine in sèt film dla Marvel Comics, tacànd da Iron Man 2 (2010). Al gh'à na stéla in dla Hollywood Walk of Fame e 'l à vins anc dū Golden Globe.

Biugrafìa

Uriginàri dal Missouri, Don da pìcul al và a star cun la sò famìja in Culuràdo in du al s diplòma a la East High School ad Denver. In séguit al stùdia a la California Institute of the Arts tacànd anc a tōr part a série televiśìvi cuma L'ultimo cavaliere elettrico, Saranno famosi, Avvocati a Los Angeles, Hill Street giorno e notte e Giudice di notte.

Al fà 'l sò debùt a 'l cìnema in dal 1985 cun na part cica in dla cumèdia Scuola guida cun la Jennifer Tilly par pò catar spasi in dal film ad guèra Hamburger Hill: collina 937 ad John Irvin (1987), faghénd al suldâ Johnny Washburn, e in dal pulisiésc Colors - Colori di guerra cun prutagunìsta Sean Penn e Robert Duvall.

Lò in dal 2015

In di an Nuànta a 'l ém vist in dal drama Cosa fare a Denver quando sei morto (1995), a fiànc 'd Andy García e 'd Christopher Walken, in dal śal Il diavolo in blu (1995), in dla part d'l amìg da 'l grilét fàcil ad Denzel Washington, in dal biugràfic Boogie Nights - L'altra Hollywood (1997), ambintâ in dal mónd dal pòran califurgnàṅ dla fîṅ di an Stanta, in dla cumèdia Bulworth - Il senatore (1998), in dal rōl dal cap dna banda 'd spaciadōr ad dròga cuśèṅ dl'Halle Berry, e in dal noir Out of Sight (1998), cun la còpia George Clooney/Jennifer Lopez e dirèt par Steven Soderbergh. C'n al regìsta 'd Atlànta al girarà in séguit anc al thriller Traffic (2000), Ocean's Eleven - Fate il vostro gioco (2001), Ocean's Twelve (2004), Ocean's Thirteen (2004) e No Sudden Move (2021).

Fra i sò àtar film più impurtànt a 'rcurdém 'l aventuróś Mission to Mars (2000), cun Gary Sinise e Tim Robbins, al thriller Crash - Contatto fisico (2004), in dla part dal detective Graham Waters, al drama stòrig Hotel Rwanda (2004), su 'l genusìdi dal Ruànda durànt la guèra fra Hutu e Tutsi, al film ad spiunàǵ Traitor - Sospetto tradimento (2008), in dua 'l è suspetâ 'd ès'r un terurìsta iślàmic, al pulisiésc Un poliziotto da happy hour (2011), in dla part d'n agìnt d'l FBI ch'al và in Irlànda par farmàr un tràfic ad dròga, al drama Flight (2012), c'n al rōl d'n avucàt penalìsta ch'al difénd Denzel Washington, in dal frantàstic Avengers: Infinity War (2018), film campiòṅ 'd incàs dla Marvel Comics ch'l à pasâ i dū migliàrd ad dòlar, e in Space Jam: New Legends, faghénd l'inteligénsa artifisiàla dimóndi catìva Al-G Rhythmo.

Fra i telefìlm ch'l à girâ a psém nutàr E.R. - Medici in prima linea, House of Lies, The Falcon and the Winter Soldier e Secret Invasion. Da regìsta 'l à dirèt e senegiâ la pelìcula Miles Ahead (2015) in dua 'l à fat la part ad Miles Davis.

Da 'l 1992 al s è cumpagnâ cun l'atōra Bridgid Coulter ch'la gh'à dâ dó fiōli: lʼAyana Tai (1995) e lʼImani (1997).

Filmugrafìa

Un pulisiòt da happy hour (2011)

cuma atōr

cuma regìsta

Culegamènt estéran

Àtar prugèt

Estratto da "https://eml.wikipedia.org/w/index.php?title=Don_Cheadle&oldid=169270"