Disastro a Hollywood
|
C'l artìcul chè 'l è scrit in
Miranduléś |
 What Just Happened | ||
| Disastro a Hollywood | ||
 La Keener e De Niro in na figùra dal film | ||
| Diśàst'r a Hollywood 2008 | ||
|---|---|---|
| Regìa: Barry Levinson | ||
| Scritōr: Art Linson | ||
| Atōr: Robert De Niro • Sean Penn • Bruce Willis Catherine Keener • John Turturro • Stanley Tucci Robin Wright • Kristen Stewart • Michael Wincott Jason Kravits • Mark Ivanir • Sam Levinson | ||
| Müsica: Marcelo Zarvos | ||
| Léngua: Ingléś • Francéś • Ebràic | ||
| Dürä dal film: 104 minüt | ||
| Nasiōṅ: Stat Unî | ||
Disastro a Hollywood (Diśàst'r a Hollywood) l'è na cumèdia dramàtica americàna dal 2008 ad Barry Levinson ispiràda a 'l lìb'r ad memòri What Just Happened? Storie amare dal fronte di Hollywood dal prudutōr Art Linson.
Al film, preśentâ a 'l Sundance Film Festival dal 2008 e a 'l 61śum Fèstival ad Cannes, 'l è custâ vint-sinc migliòṅ ad dòlar ma pò al 'n à fat sù sōl siē e òt.
Sunt
[mudéfica la surzéia]Ben (Robert De Niro), prudutōr ad sucès a Hollywood, 'l è drē a pasàr un brut mumènt a livèl prufesiunàł e persunàł. Al sò ùltim film, Fiercely, 'l è stâ 'n diśàst'r a na prujesiòṅ ad próa, specialmènt p'r al sò finàł shock in dua 'l prutagunìsta, interpretâ par Sean Penn (Sean Penn), dòp èsar ruślâ sò da na muntagnōla 'd gèra al vîṅ masâ da i catìṿ a cōlp ad pistòla acsè cuma 'l sò pòvar caṅ.
La dirigènta dal studi Lou Tarnow (Catherine Keener) la sà bèla ch'al film 'l è cundanâ a pèrd'r un muć ad bèsi e ch'al sarà 'n flop spavintóś, la ciàma acsè a dascórar sèg Ben e 'l regìsta Jeremy Brunell (Michael Wincott), un britànig minga tant gustóś, tignòṅ e pîṅ 'd caca ch'al s dà 'l śmalt a gl'ungi, dgénd a i dū ch'la preténd ch'a véggna cambiâ 'l finàł, tirànd via la mòrt dal caṅ sénsa sèns ch'la n è pròpria piaśùda par gnint a 'l pùblic. Jeremy però al fà i caprìs e 'l gh'à 'n scat 'd arlìa śbaténd i pugn su 'l tàvul dgénd ch'i pōlan vansàr. La Lou la salta sù par dir ciàr e tónd ch'l'è prònta a far lē 'l taj finàł a la pelìcula e a ritiràr-la da 'l Fèstival ad Cannes in du la gh'à da èsar mustràda in maǵ s'i n fànan minga qvél ch'l'à dit. Al regìsta 'l è custrét a cédar.
Ben al gh'à di prubléma anc su 'n àtar set parchè la star Bruce Willis (Bruce Willis), ch'l à firmâ par far al prutagunìsta 'd un sò film, 'l è rivâ cun na barba da hipster ch'al fà sèns sōl a guardàr-la, e al n gh'à pròpria minga intensiòṅ ad tiràr-la via. Al prudutōr al dmanda ajùt a 'l agìnt d'l atōr, Dick Bell (John Turturro), par cunvìs'r-al a druàr al raśōr saénd ch'al sucès dla pelìcula 'l è tròp impurtànt par la sò caréra, dòp i prubléma cun Fiercely, o sinò al sarà ruinâ.
Anc in famìja Ben 'l è mis mâł. Da la sò prima mujēr Jane (Dey Young) al gh'à na fiōla 'd darsèt an ciamàda Zoe (Kristen Stewart) ch'l'è in lut dòp ch'al sò muróś segrét, 'n agìnt ad cìnema ebrèj e femnàr ciamâ Jack (Dimitri Lekkos), al s è tòlt la vita. Al s è pò divìś da la sò secónda spóśa ch'l'à gh'à dâ dū fiōi pìcui, la Kelly (Robin Wright), anc s'al vrév turnàr-'g insém ma 'l è impusìbil parchè la dóna l'à tacâ in cal méntar na relasiòṅ cun Scott Solomon (Stanley Tucci), un senegiadōr ch'l à laurâ sèg in pasâ e ch'adès al gh'à śibî 'd far un film insém cun Brad Pitt in dla part 'd un vendidōr ad fiōr.
Ben al partìs par Cannes insém a Penn, a la Lou e a Jeremy par la prima dal film e chè a riva na bruta surpréśa. Al regìsta al n à minga fat qvél ch'l iva prumìs ma 'l è andâ óltar, lasànd al séni cun la mòrt dal caṅ e śuntànd-'g anc un minùt. Al pùblic 'l è arliâ, sōl un qualchidòṅ al pìcia 'l maṅ.
Turnâ in di Stat Unî p'r un servìsi su Vanity Fair su i trénta prudutōr ch'i cóntan dabòṅ a Hollywood, par la fóto d'l artìcul Ben al vîṅ mis in un cantòṅ tut da na banda ch'a s fà pròpria fadìga a véd'r-al.