Debra Winger
|
C'l artìcul chè 'l è scrit in
Miranduléś |
La Debra Lynn Winger (Cleveland, 16 ad Maǵ dal 1955, a s lèś [ˈdɛbrə ˈwɪŋɡər] in ingléś) l'è n'atōra americàna, candidàda par tré vòlti a i Prèmi Òscar cuma atōra prutagunìsta: in dal 1983 p'r al drama sentimentàł Ufficiale e gentiluomo, in dal 1984 par Voglia di tenerezza e in dal 1994 p'r al biugràfic Viaggio in Inghilterra.
Biugrafìa
[mudéfica la surzéia]Uriginària dna famìja ebrèja d'l Ohio, sò pàd'r al lauràva in na pcarìa méntar sò màdar l'éra na manager, a siē an l'è andàda a star in Califòrgna. Dòp avēr ciapâ 'l diplòma, la s trasferìs in un kibbutz in Iśraēl. Turnàda in di Stat Unî la taca a studiàr recitasiòṅ faghénd i sò prim lavōr cuma stunt-woman par pò far al sò debùt a 'l cìnema in dal 1976 tulénd part a 'l film eròtic Slumber Party '57.
In dal 1980 a l'ém vista in dal western Urban Cowboy, cun prutagunìsta John Travolta, par pò far na part pìcula in E.T. l'extra-terrestre (1982). In chi an lè la gira pò soquànt di film più impurtànt dla sò caréra cuma Ufficiale e gentiluomo, in dua la fà la part dn'uperàja ch'la s inamóra dal cadét dla marìna Richard Gere, Voglia di tenerezza, in dla part dla fiōla arvèrsa dla Shirley MacLaine, e 'l pulisiésc Pericolosamente insieme, c'n al rōl dn'avucàta ch'la lavóra cun Robert Redford. A s l'arcurdém tut anc cuma prutagunìsta dal thriller La vedova nera (1987), in còpia cun la Theresa Russell, e in dal film ad spiunàǵ Betrayed - Tradita (1988) fat insém a Tom Berenger.
A gl'inìsi di an Nuànta la gira 'l thriller Alla ricerca dell'assassino (1990), in còpia cun Nick Nolte, al drama Il tè nel deserto (1990), par la regìa ad Bernardo Bertolucci, e Viaggio in Inghilterra (1993), pelìcula ch'la gh fruta la sò tèrsa e ultma nomination a i Òscar faghénd la part dna scritōra inamuràda 'd Anthony Hopkins.
In televiśiòṅ l'à laurâ in soquànti série televiśìvi cuma Wonder Woman, Law & Order - I due volti della giustizia, The Ranch e Patriot.
La Winger la s è spuśàda dó vòlti, da 'l 1986 a 'l 1990 c'n al culéga Timothy Hutton e in dal 1996 cun 'l atōr e regìsta Arliss Howard.
Filmugrafìa
[mudéfica la surzéia]
Culegamènt estéran
[mudéfica la surzéia]Àtar prugèt
[mudéfica la surzéia]
Wikimedia Commons contiene file multimediali su Debra Winger
