Debbie Harry

C'l artìcul chè 'l è scrit in Miranduléś

«

Once I had a love and it was a gas, soon turned out, had a heart of glass, seemed like the real thing.»

(EN)(Heart of Glass, 1978)

«

Na vòlta a gh'ò abû 'n amōr e 'l éra 'n gas, prèst a s è vgnû a savēr ch'al gh'iva 'n cōr ad vēdar, a parìva 'n quèl véra.»

(MUD)

La Deborah Ann Harry, cgnusùda méj cuma Debbie Harry o Deborah Harry (Miami 1 ad Luj dal 1945, a s lèś [ˈdɛbi ˈhæri] in ingléś), l'è n'atōra e cantànta americàna.

Cuma mémbra dal grup di Blondie l'à fat vgnir fóra ùndas àlbum, da 'l 1976 a 'l 2017, cantànd di braṅ ad sucès cuma Heart Of Glass, One Way Or Another, Call Me e Maria, ma l'à anc catâ 'l tèmp ad dar vita in dal mèś a na caréra da par lē, cun di pès cuma Backfired, In Love with Love e Summertime Blues.

Cuma atōra l'à tòlt part a soquànt film tacànd da la cumèdia muśicàla Roadie - Le strade del rock (1980) giràda c'n i sò culéga Meat Loaf e Alice Cooper. In séguit 'l à laurâ cun David Cronenberg in dal film ad scarésa Videodrome (1983) e cun John Waters in dla cumèdia Grasso è bello (1988).

In dal 1989 l'à tòlt part a la pelìcula New York Stories giràda da Martin Scorsese, Francis Ford Coppola e Woody Allen méntar 'l an dòp l'è la stada la stria prutagunìsta dal film ad scarésa I delitti del gatto nero, seguìda da Body Bags - Corpi estranei, film a epiśòdi ad John Carpenter, Tobe Hooper e Larry Sulkis. In dal 1995 a l'ém vista in dal drama Dolly's Restaurant, a fiànc dla Liv Tyler e dla Shelley Winters, pò in dal 1997 l'à girâ al pulisiésc Cop Land cun Sylvester Stallone, ch'l iva mis sù di chilo par la part dal sierìf Heflin, Harvey Keitel, Ray Liotta e Robert De Niro.

In di an Dumìla l'à tòlt part a The Fluffer (2001), ambintâ in dal mónd di film pòran gay, a 'l pulisiésc Deuces Wild - I guerrieri di New York (2002), cun Stephen Dorff e Brad Renfro, a 'l noir Spun (2002), insém a Mickey Rourke e a John Leguizamo, e a 'l drama La mia vita senza me (2003).

In televiśiòṅ 'l à girâ 'n quàlc telefìm da i an Utànta in avànti cuma Muppet Show, Un salto nel buio, Sabrina, vita da strega e Difficult People.

Discugrafìa

Àlbum c'n i Blondie

1976 – Blondie
1977 – Plastic Letters
1978 – Parallel Lines
1979 – Eat to the Beat
1980 – Autoamerican
1982 – The Hunter
1999 – No Exit
2003 – The Curse of Blondie
2011 – Panic of Girls
2014 – Ghosts of Download
2017 – Pollinator

Àlbum da par lē

1981 – KooKoo
1986 – Rockbird
1989 – Def, Dumb and Blonde
1993 – Debravation
2007 – Necessary Evil

Filmugrafìa

1980 - Roadie - La via del rock (Roadie), regìa 'd Alan Rudolph
1981 - New York Beat Movie (Downtown 81), regìa 'd Edo Bertoglio
1983 - Videodrome, regìa ad David Cronenberg
1983 - Wild Style, regìa ad Charlie Ahearn
1988 - Grasso è bello (Hairspray), regìa ad John Waters
1989 - New York Stories, regìa ad Francis Ford Coppola, Woody Allen e Martin Scorsese
1990 - I delitti del gatto nero (Tales from the Darkside), regìa ad John Harrison
1993 - Body Bags - Corpi estranei (Body Bags), regìa ad John Carpenter e 'd Tobe Hooper – Film TV
1995 - Dolly's Restaurant (Heavy), regìa ad James Mangold
1997 - Cop Land, regìa ad James Mangold
2001 - The Fluffer, regìa ad Richard Glatzer
2002 - Deuces Wild - I guerrieri di New York (Deuces Wild), regìa ad Scott Kalvert
2002 - Spun, regìa ad Jonas Åkerlund
2002 - Tutto quello che voglio (All I Want), regìa ad Jeffrey Porter
2003 - La mia vita senza me (My Life Without Me), regìa dl'Isabel Coixet
2007 - Anamorph - I ritratti del serial killer (Anamorph), regìa 'd Henry S. Miller
2008 - Lezioni d'amore (Elegy), regìa dl'Isabel Coixet
2014 - River of Fundament, regìa ad Matthew Barney

Culegamènt estéran

(IT) La sò paśna su 'l IMDb

Àtar prugèt

Wikiquote contiene citazioni di o su Debbie Harry
Wikimedia Commons contiene file multimediali su Debbie Harry