David Warbeck

C'l artìcul chè 'l è scrit in Miranduléś

David Mitchell, cgnusû méj cuma David Warbeck (Christchurch, 17 ad Nuvémbar dal 1941 - Lóndra, 23 ad Luj dal 1997, a s lèś [ˈdeɪvɪd ˈwɔːrbɛk] in ingléś), 'l è stâ 'n atōr e mudèl neuśelandéś, cgnusû specialmènt par soquànti pelìculi ingléśi di an Stanta e p'r i film ch'l à girâ in Itàglia fra i an Utànta e Nuànta.

Da śōvan, dòp 'n inìsi a teàtar, 'l à studia a la Royal Academy of Dramatic Art ad Lóndra par via dna bórsa da studi ch'i gh'ìvan dâ. In séguit 'l à eśurdî a 'l cìnema in dal 1969 faghénd la part ad Robin Hood in Wolfshead: The Legend of Robin Hood, pelìcula pinsàda a 'l inìsi cuma 'n film pilòta par na série televiśìva dla Hammer Film Productions che pò la n è mai stada fata.

In di an Stanta, dòp avēr girâ dó puntàdi dal telefìlm UFO, 'l à catâ spasi in dal film ad scarésa Il terrore di Londra (1970), cun prutagunìsta la Joan Crawford, in dal stòrig Giù la testa (1971), cun Rod Steiger e Romolo Valli, in Le figlie di Dracula (1971), a fiànc ad Peter Cushing, in d'l eròtic Carne cruda (1973) ad Russ Meyer, in dla pelìcula da śgriśōr Il buio macchiato di rosso (1974), insém a Jack Palance, la Diana Dors e la Suzy Kendall, e in dla cumèdia Il comune senso del pudore (1976), in di pagn d'l atōr ch'al gh'à da giràr na séna 'd sès cun la Dagmar Lassander.

In di an Utànta 'l è stâ prutagunìsta ad soquànt film ad scarésa cuma ...e tu vivrai nel terrore! - L'aldilà (1981), in còpia cun la Catriona MacColl, Black Cat (Gatto nero) (1981), lavōr trat da 'n racònt 'd Edgar Allan Poe cun la Mimsy Farmer, 7, Hyden Park - La casa maledetta (1985), insém a Rossano Brazzi, e Quella villa in fondo al parco (1988) in dua 'l à incruśâ l'Eva Grimaldi e la Janet Agren. In chi an lè 'l à girâ dimóndi pelìculi 'd aventùra e 'd asiòṅ cuma L'ultimo cacciatore (1980), Fuga dall'arcipelago maledetto (1982) e Lassiter lo scassinatore (1984), cun Tom Selleck, la Lauren Hutton e Bob Hoskins. A 'l arcurdém anc in soquànti pelìculi 'd Al ragàs dal kimono 'd òr in di pagn dal pàdar dal prutagunìsta Ron Williams ch'l iva tòlt al pòst ad Kim Rossi Stuart.

'L è stâ lè lè anc p'r èsar tòlt par la part ad James Bond pò andàda a Roger Moore. In tut al manéri 'l è stâ pagâ listés par soquànt an p'r èsar prònt a tōr al sò pòst in caś ad prubléma, sénsa dir gnint a ninsòṅ. Quànd 'l è stâ óra ad catàr 'n àt'r agìnt segrét però lò 'l éra dvintâ tròp vèć e la prudusiòṅ 'l à sarnî Timothy Dalton.

'L è mòrt in Inghiltèra a sinquànta-sinc an p'r un càncar, paéś in du 'l éra andâ a star par vìv'r insém a sò mujēr, la Lois Shephard, spuśàda in dal 1965.