Daniela Doria
|
C'l artìcul chè 'l è scrit in
Miranduléś |
La Daniela Cormio, cgnusùda méj c'n al nóm 'd art ad Daniela Doria (Milàṅ, 22 ad Śugn dal 1957, a s lèś [daˈnjɛ.la ˈdɔːrja] in itagliàṅ) l'è n'atōra e balarìna itagliàna.
Da ragasōla l'à balâ a 'l Teàtar a la Scala 'd Milàṅ par tri an par pò dedicàr-'s a na caréra da atōra a la mità di an Stanta tacànd da 'l drama pulisiésc San Babila ore 20: un delitto inutile ad Carlo Lizzani faghénd la cumpàrsa. Sèmp'r in c'l an lè la tōś part a la cumèdia Classe mista, insém a Alvaro Vitali, Mario Carotenuto, Michele Gammino e Gianfranco D'Angelo, e a 'l film eròtic Le seminariste a fiànc ad Carlo Giuffrè.
'L an dòp la rècita in dla cumèdia spurcaciòna Il ginecologo della mutua in di pagn dna dóna ch'la mét i còran a sò marè Toni Ucci par far sès c'n al ginecòlug Renzo Montagnani. In dal 1978 a l'ém vista in dal drama eròtic Avere vent'anni in dua l'incróśa la Gloria Guida, la Lilli Carati, Ray Lovelock e Leopoldo Mastelloni vivénd in na “cumùna” insém a di hippy.
In séguit la taca 'n sudalìsi c'n al regìsta Lucio Fulci ch'al la sarnìs par quàtar dal sò pelìculi 'd scarésa: Paura nella città dei morti viventi (1980), in dua la fà na bruta fiṅ lagarmànd sànguv da i òć, Black Cat (Gatto nero) (1981), cun la Mimsy Farmer, Quella villa accanto al cimitero (1981), cun prutagunìsta la Katherine MacColl, e Lo squartatore di New York (1982), in dla part dla putàna Kitty.
Al sò ùltim lavōr 'l è stâ la cumèdia I camionisti (1982), c'n i bulgnéś Andrea Roncato e Gigi Sammarchi e la mantṿàna Luciana Turina. In dal 1983, par di mutìṿ famigliàr, l'è turnàda a Milàṅ dand-'g a muć c'n al mónd dal cìnema. In di an a vgnir la farà dal reclàm e di fotorumànś in Itàglia e in Frància.
Filmugrafìa
[mudéfica la surzéia]- 1976 - San Babila ore 20: un delitto inutile, regìa ad Carlo Lizzani
- 1976 - Classe mista, regìa ad Mariano Laurenti (1976)
- 1976 - Le seminariste, regìa ad Guido Leoni (1976)
- 1977 - Il ginecologo della mutua, regìa ad Joe D'Amato (1977)
- 1978 - Avere vent'anni, regìa ad Fernando Di Leo (1978)
- 1980 - Paura nella città dei morti viventi, regìa ad Lucio Fulci
- 1981 - Black Cat (Gatto nero), regìa ad Lucio Fulci
- 1981 - Quella villa accanto al cimitero, regìa ad Lucio Fulci
- 1982 - Lo squartatore di New York, regìa ad Lucio Fulci
- 1982 - I camionisti, regìa ad Flavio Mogherini