Come le foglie al vento
|
C'l artìcul chè 'l è scrit in
Miranduléś |
 Written on the Wind
| ||
| Come le foglie al vento | ||
 Hudson e la Bacall in na figùra dal film | ||
| Cuma dal fój a 'l vènt 1956 | ||
|---|---|---|
| Regìa: Douglas Sirk | ||
| Scritōr: Robert Wilder • George Zuckerman | ||
| Atōr: Rock Hudson • Lauren Bacall • Robert Stack Dorothy Malone • Robert Keith • Harry Shannon Edward Platt • Robert J. Wilke • Grant Williams | ||
| Müsica: Frank Skinner | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
Come le foglie al vento (Cuma dal fój a 'l vènt) 'l è 'n film dramàtic dal 1956 ad Douglas Sirk trat da 'n rumànś ad Robert Wilder ad déś an prima.
'L è stâ candidâ a tri Prèmi Òscar, vinsénd qvél par l'atōra minga prutagunìsta, la Dorothy Malone.
Sunt
Kyle (Robert Stack) e Mitch Wayne (Rock Hudson) i èṅ carsû insém. Al prim 'l è 'l fiōl femnàr, bòṅdagnìnt e puòs dal ric industriàł texàṅ dal petròli Jasper Hadley (Robert Keith) ch'al gh'à sèmpar preferî invéci pròpria Mitch, inśgnēr a 'l sò servìsi.
Quànd Kyle al cgnós la segretària Lucy Moore (Lauren Bacall) al s inamóra 'd lē e 'l decìd ad far-ag la cōrt, prima c'n i bèsi e pò cun dal rumanticìśum, esénd-as persuàś ad far-as na famìja e 'd métar la tèsta a pòst. I dū i sa spóśan e Kyle 'l è finalmènt cuntènt. Al gh dà acsè 'n taj cun la butìglia, vlénd avēr sèg anc di fiōi.
Mitch, in segrét inamurâ dla Lucy, al vrév licensiàr-as p'r andàr a lauràr via ma 'l gh'à da far i cònt cun la Marylee (Dorothy Malone), la fiōla dal sò cap, ch'la gh'à butâ i òć adòs da quànd i éran baghét anc se lò al gh'à sèmpar dit ch'la pōl vansàr e 'd mét'r-as al cōr in paś.
Quànd dòp 'n an Kyle al vîṅ a savēr da 'l sò mèdag, al dutōr Paul Cochrane (Edward Platt), ch'i putèṅ i n rìvan minga p'r un sò prubléma 'd salùt, al và in depresiòṅ e 'l casca incóra in d'l alculìśum. Cal parēr lè al n è pò briśa véra tant che sò mujēr l'armàgn gravda. Quànd la Lucy la gh cònta la bèla nutìsia, Kyle a 'l inìsi al s arlìa sèg, cardénd ch'al pàdar al sia invéci Mitch, pò al gh dà dal bòti faghénd-ag pèrd'r al putèṅ, prima 'd èsar parâ via da Mitch.
Pîṅ 'd òdi in di sò cunfrònt, ch'a sò dita al gh'à purtâ via 'l amōr ad sò mujēr e 'l rispèt ad sò pàd'r e 'd sò surèla, Kyle al dmanda na pistòla a 'l sò barìsta 'd fidùcia, Dan Willis (Robert J. Wilke), p'r andàr a cupàr al sò amìg.