Christmas Bloody Christmas
|
C'l artìcul chè 'l è scrit in
Miranduléś |
 Christmas Bloody Christmas | ||
 La Riley Dandy in na figùra dal film | ||
| Nadâł insanguanènt 2022 | ||
|---|---|---|
| Regìa: Joe Begos | ||
| Scritōr: Joe Begos | ||
| Atōr: Riley Dandy • Sam Delich • Dora Madison Jonah Ray • Jeff Daniel Phillips • Jeremy Gardner Abraham Benrubi • Graham Skipper • Joe Begos Adam Dietrich • Kansas Bowling • Elliott Gilbert Josh Ethier • Matt Mercer • Aerial Washington | ||
| Müsica: Steve Moore | ||
| Léngua: Ingléś | ||
| Dürä dal film: 87 minüt | ||
| Nasiōṅ: Stat Unî | ||
Christmas Bloody Christmas (Nadâł insanguanènt) 'l è 'n film ad scarésa americàṅ dal 2022 scrit, dirèt e prudót par Joe Begos.
La pelìcula, giràda a Los Angeles e a Placerville, l'è pîna 'd parulàsi, a s 'n è cuntâ dagnóra sincsènt. L'à muciâ pò sù duśènt-sinquantamìla dòlar 'd incàs, cun na distribusiòṅ limitàda in di cìnema.
Sunt
[mudéfica la surzéia]La pruprietària 'd un negòsi ad disc e 'd caséti vìddeo, la Tori Tooms (Riley Dandy), la vrév festegiàr al Nadâł faghénd na gusàda c'n un tisi cgnusû su Tinder ma pò la decìd invéci 'd andàr a bévar quèl c'n al sò dipendènt Robbie Reynolds (Sam Delich) quànd chi lò al gh fà nutàr che c'l óm là al gh'à bèla na mujēr e di fiōi. I dū i s férman p'r un mumènt a far un salùt a di sò amìg, Jay (Jonah Ray) e la Lahna (Dora Madison), ch'i gh'aṅ un negòsi 'd śugàtui lè darènt e ch'i vōlan ciulàr a sò vòlta in butéga esénd bèla saràda.
Méntar chi lōr dū i fànan sès in un cantòṅ dal negòsi, un robot ad Pàdar Nadâł (Abraham Benrubi), mis lè par saludàr i cliènt e śvilupâ cun di difèt ad funsiunamènt da 'l eśèrcit americàṅ, al ciàpa vita. Dòp avēr catâ sù na manàra, al robot al decìd ad masàr i dū malnét, pò al s in và in gir lìbar par la sità par far àtar tant cun tut i cristiàṅ ch'l è bòṅ ad catàr.
In cal méntar la Tori, finî ad far-as dū cichét in dal bar ad Larry (Josh Ethier), la decìd 'd invidàr Robbie a cà sua par scultàr di disc ma specialmènt par far-as lcar la pasra, 'l ùnic quèl ch'la gh admànda 'l è qvél 'd a n far minga di stus parchè in cl'atra cambra a gh'è sò surèla, la Liddy (Kansas Bowling), insém a 'l sò ragàs Mike (Graham Skipper) ch'i pònsan. Purtròp par lōr Pàdar Nadâł mudèl Terminator 'l è rivâ pròpria in dal sò quartēr e, dòp avēr fat fóra i sò vśèṅ 'd cà, adès 'l è 'l sò tùran.