Casa a prima vista
|
C'l artìcul chè 'l è scrit in
Miranduléś |
 Casa a prima vista | ||
 | ||
| Cà a prima vista 2023/2025 | ||
|---|---|---|
| Gènar: Reality | ||
| Stagiòṅ: 6 | ||
| Epiśòdi: 215 | ||
| Regìa: Giuseppe Bianchi | ||
| Scritōr: Federico Albanese • Lorenzo Almansi Chiara Balza • Paolo Bordigoni Chiara Iacobelli • Valentina Monti Ambra Parodi • Veronica Pennacchio Maria Chiara Salvi • Daniele Rossi Ferdinando Sorbo • Alessandro Tascone | ||
| Atōr: Andrea Pellizzari (vōś) Ida Di Filippo • Gianluca Torre • Mariana D'Amico Blasco Pulieri • Nadia Mayer • Corrado Sassu Moira Quartieri • Matteo Nencioni • Nico Tedeschi | ||
| Mùśica: / | ||
| Duràda: 50 minùt | ||
| Léngua: Itagliàṅ | ||
| Nasiòṅ: Itàglia | ||
Casa a prima vista (Cà a prima vista) l'è na traśmisiòṅ televiśìva itagliàna dal gènar reality dal canàł Real Time ch'la tōś ispirasiòṅ da 'l format francéś Chasseurs d'appart ch'al và in ónda, cun tut gl'adatamènt dal caś, anc in dal Bélgi, Ulànda, Germàgna e Nurvégia.
Strutùra dal prugrama
[mudéfica la surzéia]In dal quartēr generàł ad Milàṅ o 'd Róma tri agînt imubiliàr (Torre, D'Amico e Di Filippo in Lumbardìa, Sassu, Mayer e Pulieri in dal Lasi) i sa sfìdan par catàr la cà parfèta par di cliènt sarnî da la prudusiòṅ (dla Blu Yazmine) ch'i gh fànan savēr c'n un filmâ registrâ prima e piutòst cic (dit “brief”) al caraterìstichi ch'i péscan par la sò abitasiòṅ, cuma i bèsi ch'la gh'à da custàr a 'l màsim, al quartēr ad riferimènt (o d'n àtar cumùṅ se fóra sità), i métar quàdar, al nùm'r ad cambri, se la cuśìna la gh'à da ès'r a vista in salòt o da par lē, al fat ch'a gh sia 'n garàǵ o 'n spasi estéran, e via dascurénd.
Subìt dòp gl'agînt i vàn'n in studi a pascàr la cà giùsta a sò giudìsi e pò, òṅ a la vòlta, i la fànan védar a i cliènt ch'in gènar i èṅ na còpia (dū spóś o muróś, al cumpradōr c'n un sò amìg o 'n genitōr insém a 'l fiōl). La vìsita l'è sèmpar cumpagnàda par na vōś estérna (la èx jéna Andrea Pellizzari) che da 'd fóra al descrìv al quartēr e la planimetrìa e 'l fà dal batùdi o di cumènt in dal méntar. Anc chi àtar dū agìnt i dìśan la sua, in culegamènt da 'n van parchegiâ lè darènt, faghénd nutàr tut i quèi negatìṿ dl'abitasiòṅ. A la fiṅ dla vìśita 'l agînt al fà savēr al prèsi a i cumpradōr ch'acsè i s pōlan far n'idéa.
Finìdi 'l preśentasiòṅ, i tri agînt i dascóran dal tri cà, anc bcand-as fra 'd lōr, in dal méntar ch'i cliènt i sarnìsan qvéla ch'la gh'è piaśùda da piò.
A la fiṅ dla puntàda i cliènt i dìśan davànti a tri agînt la cà ch'i aṅ sarnî. Chi lōr i n èṅ minga custrét a cumpràr-la ma, s'i al vōlan, i pōlan far-al. Par la Di Filippo al 40% dal cà i èṅ vindùdi dabòṅ.
'L agînt vinsidōr al s pòrta a cà un prèmi mént'r a i cliènt i gh vìnan rigalâ di prudót di sponsor.
In dal tèrsa e in dla quàrta stagiòṅ, su i tìtui 'd cóa, òṅ di agînt al dava di cunsìli a i spetadōr su cuma sarnìr na cà, su cuma cumpràr-la sénsa risć, su cuma tōr-la in afìt, su cuma preśentàr na pràtica edilìsia a 'l cumùṅ o in catàst, su 'l rògit, su 'l mutṿo e su di àt'r argumènt ligâ a la cà.
Agînt
[mudéfica la surzéia]In dal cōrs dal puntàdi dal vòlti i s èṅ śuntâ di agînt difarènt ch'i aṅ tòlt al pòst par na puntàda ad qvéi fis. Di atri vòlti la prudusiòṅ l'à misćiâ 'l carti mandànd 'n agînt ad Milàṅ a Róma (o anc a 'l cuntràri) o sinò faghénd di grup misć quànd a s è stâ custrét a cambiàr regiòṅ.
Qvist chè ' d sóta i èṅ tut i agînt ch'i s èṅ sfidâ durànt la traśmisiòṅ (in grasét qvéi fis):
- Gianluca Torre
- Ida di Filippo
- Mariana D'Amico
- Lorenzo Magni
- Damiano Gallo
- Blasco Pulieri
- Nadia Mayer
- Corrado Sassu
- Natalina Liguori
- Catia Sacconi
- Thomas Alan Wilkinson
- Moira Quartieri
- Matteo Nencioni
- Nico Tedeschi
- Edoardo Tommasi
- Paola Delpoio
Pòst
[mudéfica la surzéia]Óltar ch'a Milàṅ e Róma, la traśmisiòṅ l'à fat védar dal cà anc in di atri sità cuma Génoa, Brésa, Mónśa, Veróna, Nàpuli, Bèrgam, Còm, La Spèsia, Bulsàṅ o pòst cuma 'l Lituràł dal Cìrceo, al Lâg ad Garda o la Còsta amalfitàna.
In Emìglia i èṅ stâ dū vòlti a Parma e dū vòlti a Bulógna, pò a gh'è stâ anc di cliènt emigliàṅ ch'i pascàvan na cà a Milàn. Un pàdar mudnéś al vliva dar 'n apartamènt a sò fiōla ch'la studiàva là a l'università, dū bulgnéś i pascàvan na cà in sèntar par lōr e la sò putìna, un fraréś al gh'iva biśógn 'd un loft e dū mudèi śmèi arśàṅ i vlìvan na cà còmda p'r i sò viàś in aparéć. Durànt la puntàda, dòp avēr ciapâ incòst cun la tèsta a 'l sufìt dna mansàrda dimóndi basa, a òṅ a gh'è scapâ dit ch'al s éra “sturlato”, italianiśànd par śbali la paròla emigliàna “insturlàr-as”. Gl'agînt lumbàrd i n ìvan minga capî cuśa 'l vlis dir.
Ascōlt
[mudéfica la surzéia]I ascōlt ad Cà a prima vista i èṅ carsû in dal cōrs dal stagiòṅ, rivànd a 'l 3,6% ad mèdia e utsènt-mila spetadōr a puntàda, un sucès p'r un canàł cic cuma Real Time a òt óri e mèś dla sira in dua a gh'è dimóndi cuncurénsa. Al record 'l è stâ tucâ al 1 'd Avrìl dal 2025 c'n al 4,5% e 945.000 spetadōr.