Caccia a Ottobre Rosso
|
C'l artìcul chè 'l è scrit in
Miranduléś |
 The Hunt for Red October | ||
| Caccia a Ottobre Rosso | ||
 Tomas Arana in na figùra dal film | ||
| Casa a Utóbar Rós 1990 | ||
|---|---|---|
| Regìa: John McTiernan | ||
| Scritōr: Tom Clancy • Larry Ferguson Donald E. Stewart • David Shaber | ||
| Atōr: Sean Connery • Alec Baldwin • Sam Neill Scott Glenn • James Earl Jones • Peter Firth Joss Ackland • Richard Jordan • Jeffrey Jones Courtney B. Vance • Tim Curry • Stellan Skarsgård Timothy Carhart • Tomas Arana • Daniel Davis | ||
| Müsica: Basil Poledouris | ||
| Léngua: Ingléś • Rus | ||
| Dürä dal film: 135 minüt | ||
| Nasiōṅ: Stat Unî | ||
Caccia a Ottobre Rosso (Casa a Utóbar Rós) 'l è 'n thriller pulìtig ad spiunàǵ americàṅ dal 1990 ad John McTiernan, vinsidōr 'd un Prèmi Òscar p'r al muntàǵ sunôr su tré candidadùri.
Al film 'l è stâ bòṅ ad purtàr a cà da piò ad duśènt migliòṅ ad dòlar a frònt dna spéśa 'd trénta.
Sunt
[mudéfica la surzéia]Durànt i an dla guèra fréda, l'Ugnòṅ Suviética la gh la cava a finìr un prugèt 'd un sotamarèṅ nucleàr ciamâ “Utóbar Rós” ch'l è bòṅ ad mōv'r-as śvèlt e sénsa èsar vist da i sònar parchè al dróa un sistéma 'd prupulsiòṅ magnetidrodinàmica invéci ad qvél tradisiunàł a èlas. In segrét 'l eśèrcit suviétig 'l al mét in àqua faghénd-ag far na misiòṅ in d'l ucéan Atlàntic minga tant luntàṅ da l'Iślànda.
A cap dal sotamarèṅ a gh'è 'l lituàṅ Marko Ramius (Sean Connery) ch'l è armàś véduv da pôc e che da sèmpar 'l è 'l adestradōr di cmandànt di sotamarèṅ dla marìna dal sò paéś. Insém a lò, su “Utóbar Rós”, a gh'è anc 'l àtar capitàṅ Vasily Borodin (Sam Neill) e 'l tenènt ansiàṅ Ivan Yurevich Putin (Peter Firth), ch'al spartìs sèg i còdas p'r i atàc atòmig.
Mént'r i militàr americàṅ e 'l analìsta dla CIA Jack Ryan (Alec Baldwin) i guàrd'n al fóto dal sotamarèṅ, ch'i gh'aṅ pasâ i servìsi segrét britànig par capìr-'n al funsiunamènt, Ramius al scavśa 'l òs dal còl a Putin, faghénd-al pasàr par 'n incidènt, e pò 'l bruśa 'l carti dla misiòṅ, dand 'l órdan ad tiràr drit vèrs i Stat Unî, a n è mia ciàr se par diśertàr o se par dar inìsi a 'n bumbardamènt nucleàr anc se Ramius, prima 'd partìr, 'l iva mandâ na létra a Mósca dgénd a 'l cmandànd Juri Padorin (Peter Zinner) ch'al gh'iva intensiòṅ ad diśertàr.
La cumisiòṅ ad sicurésa americàna, vdénd un muimènt minga tant nurmàl ad sotamarèṅ rus in d'l Atlàntic, la créd ch'i cumunìsta i vójan dabòṅ tacàr na guèra, sōl Ryan al péns' invéci che Ramius al gh'àppia intensiòṅ ad vultàr a 'l spali a i suviétig. Chi lōr, a sò vòlta, i èṅ prònt a tut p'r impedìr a “Utóbar Rós” e a la sò tecnulugìa ad finìr in dal maṅ di americàṅ, anc tiràr-ag cóntar di silûr par far-al saltàr p'r ària.
Al guèran di Stat Unî al decìd ad mandàr Ryan in dal teàtar di uperasiòṅ, dand-ag tri dè a 'l màsim par védar se la sò pinsàda su Ramius l'è giùsta. Insém a i cmandànt Joshua Painter (Fred Thompson) e Charlie Davenport (Daniel Davis) al s unìs a 'l cmandànt dal sotamarèṅ USS Dallas Bart Mancuso (Scott Glenn) ch'al tîṅ adrē da darènt “Utóbar Rós”.