Bulworth - Il senatore
|
C'l artìcul chè 'l è scrit in
Miranduléś |
 Bulworth | ||
| Bulworth - Il senatore | ||
 L'Halle Berry in na figùra dal film | ||
| Bulworth - Al senadōr 1998 | ||
|---|---|---|
| Regìa: Warren Beatty | ||
| Scritōr: Warren Beatty • Jeremy Pikser | ||
| Atōr: Warren Beatty • Halle Berry • Oliver Platt Don Cheadle • Paul Sorvino • Isaiah Washington Graham Beckel • Sean Astin • Christine Baranski Joshua Malina • Michéle Morgan • Aryan Johnson Jack Warden • Michael Clarke Duncan • Kirk Baltz Richard Sarafian • Jann Carl • William Baldwin | ||
| Müsica: Ennio Morricone | ||
| Léngua: Ingléś | ||
| Dürä dal film: 141 minüt | ||
| Nasiōṅ: Stat Unî | ||
Bulworth - Il senatore (Bulworth - Al senadōr) l'è na cumèdia dramàtica americàna dal 1998 scrita, dirèta e interpretàda par Warren Beatty, candidàda a i Prèmi Òscar par la senegiadùra. Custâ trénta migliòṅ ad dòlar, al film al 'n à pò muciâ sù praticamènt àtar tant.
In dla culòna sunóra, impinìda 'd braṅ rap e hip hop, a s cata 'l sucès Ghetto Supastar (That Is What You Are) ad Pras Michel feat. Mýa e Ol' Dirty Bastard.
Sunt
[mudéfica la surzéia]Jay Bulworth (Warren Beatty) 'l è 'n senadōr dla Califòrgna, spuśâ malvluntéra cun la Constance (Christine Baranski). P'r ès'r elèt incóra, al gh'à da vìns'r al primàri dal partî demucràtic cónt'r un śōvan pupulìsta méntar lò al gh'à dal puśisiòṅ muderàdi anc parchè al gh'à da diféndar gl'interès di sò finansiadōr cuma 'l cumpagnìi 'd asicurasiòṅ. A jutàr-'l in dla sò campàggna al fà afidamènt su Dennis Murphy (Oliver Platt).
Al fat 'l è che Bulworth però al n in pōl piò, 'l è sóta stress e dimóndi stuf, al fà fadìga a magnàr e a durmìr. Al decìd acsè ad far-la finìda pagànd 'n óm ciamâ Vinnie (Richard C. Sarafian) p'r urganiśàr al sò masamènt in manéra 'd psēr far avēr a sò fiōla a la fîṅ dla stòria i bèsi dl'asicurasiòṅ su la vita che lò 'l à fat cun 'l agìnt Graham Crockett (Paul Sorvino), òṅ di sò finansiadōr. Da cal mumènt lè Bulworth al taca a védar dapartùt 'n óm cun di uciài négar (Graham Beckel) ch'al gh tîṅ adrē ma par lò masàr-al 'l è 'n quèl dimóndi difìcil parchè al senadōr al gh'à sèmpar dla gint dintór'n a lò.
Da 'l cant suo Bulworth adès al s sènt sèmpar più lìbar ad dir qvél ch'al pénsa dabòṅ e 'l taca a dar adòs a 'l cumpagnìi di putènt che, pagànd al campàggni di pulìtig durànt gl'elesiòṅ, i faṅ in manéra ad diféndar sōl i sò interès e minga qvéi dla gint cumùna. Al senadōr al cgnós n'ativìsta 'd culōr, la Nina (Halle Berry), e 'l taca a 'ndàr fóra sèg par qvéla ch'la prév dvintàr na relasiòṅ. Anc sò mujēr però la s dà da far parchè 'n amànt la gh 'l à bèla (William Baldwin), in tut al manéri la còpia la stà insém sōl p'r interès pulìtig.
Adès ch'l è più cuntènt cun la Nina, e anc p'r al fat ad dascórar finalmènt a rōda libra, Bulworth al ciàma Vinnie par dir-ag ch'l à cambiâ idéa, ch'al n vōl minga murìr e che lò al pōl tgnir-as listés i bèsi ch'al gh'iva bèla dâ. Purtròp par lò Vinnie al gh'à subìt dòp 'n infàrt, finénd a 'l uśdàł in còma sénsa psēr dir a 'l sicàri ad lasàr pèrdar. Qvél ch'l è pèś 'l è che la Nina la lavóra pròpria par Vinnie parchè lē la gh'à biśógn ad pagàr un dèbit che sò fradèl Darnell (Isaia Washington) al gh'à cun L.D. (Don Cheadle).