Bride of the Gorilla
|
C'l artìcul chè 'l è scrit in
Miranduléś |
 Bride of the Gorilla | ||
 La Barbara Payton e Burr in na figùra dal film | ||
| La mujēr dal Gurìla 1951 | ||
|---|---|---|
| Regìa: Curt Siodmak | ||
| Scritōr: Curt Siodmak | ||
| Atōr: Raymond Burr • Barbara Payton Lon Chaney Jr. • Tom Conway • Carol Varga Gisela Werbisek • Paul Cavanagh • Paul Maxey | ||
| Müsica: Raoul Kraushaar • Mort Glickman | ||
| Léngua: Ingléś | ||
| Dürä dal film: 70 minüt | ||
| Nasiōṅ: Stat Unî | ||
Bride of the Gorilla (La mujēr dal Gurìla) 'l è 'n film aventuróś dal 1951 scrit e dirèt par Curt Siodmak, girâ in biànc e négar.
La pelìcula l'è stada giràda in déś dè.
Sunt
Klaas Van Gelder (Paul Cavanagh) 'l è 'n americàṅ pîṅ 'd bèsi e vèć ch'al gh'à na piantagiòṅ darènt a la furèsta dl'Amaśògna. 'L à péna spuśâ la Dina (Barbara Payton), na biónda śōvna dimóndi bèla, e 'l è gelóś un muć ad lē, specialmènt ad Barney Chavez (Raymond Burr), un tisi ch'al lavóra par lò in di camp e ch'al gh'à butâ i òć adòs. A dir-la tuta anc un sò amìg mèdag put, al dutōr Viet (Tom Conway), 'l à fat àtar tant.
Na sira a séna Klaas al decìd ad licensiàr Barney esénd ch'l è dvintâ tròp periculóś p'r al sò matrimòni. Al cuntadèṅ al gh diś che par lò a n gh'è mia prubléma ma la Dina la gh admànda 'd armàgnar mént'r i èṅ da par lōr. Qvést chè 'l è 'l segnàł che 'l óm al spetàva, par mét'r-as sèg chi lò al mòla la Larina (Carol Varga), na ragàsa dal pòst ch'la fà i fat in cà p'r i Van Gelder.
Cla sira lè Klaas e Barney i s càtan fóra e i tàc'n a litgàr-as. Klaas al tira 'n casòt a Barney che però al gh dà 'n marùc in ghigna faghénd-al cascàr śò par tèra, pròpria in dua a gh'è 'n sarpènt ch'l al mòrśga masànd-al c'n al sò vlèṅ. Al fat 'l è vist ad nascòst da lʼAl-Long (Gisela Werbisek), na vècia parènta dla Larina espèrta in stiarìa négra. Chi lē par far-'g-la pagàr, anc p'r al fat ch'l à lasâ la Larina faghénd-la star mâł, la gh tira na maledisiòṅ druànd al fój dna piànta pruibìda che lē la gh fà bévar dasfàti in un bicér. La dóna la n cònta gnint a 'l cumisàri 'd pulisìa Taro (Lon Chaney Jr.) ch'l è sicûr che Barney al gh sia insaplâ in na quàlc manéra sénsa però avēr al próvi.
Barney e la Dina i sa spóśan ma la maledisiòṅ la taca a 'vēr di efèt. Dal vòlti, specialmènt ad sira, Barney al s trasfórma in na bèstia ciamàda sukara ch'la sumìlia dimóndi a 'n gurìla, ma più catìṿ e c'n al biśógn ad magnàr dla carna cuma cavri e cunèṅ. Barney quànd al dvènta na bèstia al sènt al biśógn ad lugàr-'s in dla furèsta, andànd via par dgl'óri sénsa dir gnint. La Dina, ch'l'è inamuràda 'd lò, l'è dimóndi in pinsēr. In cal méntar Viet, guardànd-'l in dal balòti d'l òć, al sènt ch'al gh'à quèl ch'a traśâ cuma s'al fus stâ drugâ.