Bob Crane

C'l artìcul chè 'l è scrit in Miranduléś

Robert Edward Crane, cgnusû méj cuma Bob Crane (Waterbury, 13 ad Luj dal 1928 - Scottsdale, 29 ad Śugn dal 1978, a s lèś [ˈbɒb ˈkreɪn] in ingléś), 'l è stâ 'n disc jockey e atōr, famóś p'r avēr fat la part dal culunèl Robert E. Hogan in dla sitcom Gli eroi di Hogan (1965–1971).

Dòp avēr imparâ a sunàr la baterìa a scóla, 'l à tacâ a lauràr a la ràddio cuma cundutōr 'd un prugràma tut suo, prima in dal stat ad New York e pò in Connecticut, prima 'd andàr a star in Califòrgna in dua 'l éra 'l padròṅ 'd cà in na traśmisiòṅ dla matìna dla KNX 'd Hollywood.

In séguit 'l à tacâ anc a far 'l atōr par soquànti série televiśìvi cuma Alfred Hitchcock presenta, The Dick Van Dyke Show, L'ora di Hitchcock, The Donna Reed Show e Gli eroi di Hogan par la CBS in dla part dal prutagunìsta. Par cal telefìlm chè 'l è stâ numinâ par dó vòlti a i Grammy Award, in dal 1966 e in dal 1967.

Finìda cla série chè la sò caréra l'è andàda piàṅ piàn a śmursàr-as anc parchè i dū film girâ par la Disney (Dai papà... sei una forza! dal 1973 e Uno strano campione di football dal 1976) i éran piutòst lòfi. In di an Stanta a 'l ém vist in na quàlc puntàda in di telefìlm Ellery Queen, Quincy e Love Boat ma anc in soquànt spetàcui teatrài in di risturànt.

'L è stâ catâ mòrt a quarànta-nóṿ an in dal sò apartamènt in Ariśòna in du 'l éra andâ par na tournée a teàtar. Al gh'iva 'l crani śbragâ e la ghigna ruinàda ch'a s fava fadìga a 'rcgnós'r-al. P'r al delìt 'l è stâ mandâ a prucès un sò amìg ch'al lauràva par la Sony, John Henry Carpenter, ch'al gh'iva pasâ dla tecnulugìa par far dal filmìni in dua lò a s tiràva śò c'n al sò amànti in dal méntar ch'al fava sès sèg, esénd dvintâ dipendènt dal visi e dal pòran. Cal masamènt lè 'l è armàś sénsa culpévul parchè Carpenter 'l è stâ asòlt.

Chi fat chè, insém a la vita 'd Crane, i èṅ stâ cuntâ in dla pelìcula Auto Focus ad Paul Schrader cun Greg Kinnear in di sò pagn e Willem Dafoe in qvéi ad Carpenter.

Filmugrafìa

1961 - Ritorno a Peyton Place (Return to Peyton Place), regìa ad José Ferrer
1961 - Trappola per uomini (Man-Trap), regìa 'd Edmond O'Brien
1964 - Squadra d'emergenza (The New Interns), regìa ad John Rich
1968 - La minigonna proibita della compagna Schultz (The Wicked Dream s of Paula Schultz), regìa ad George Marshall
1969 - Arsenic and Old Lace, regìa ad Robert Scheerer - Film TV
1973 - Dai papà... sei una forza! (Superdad), regìa ad Vincent McEveety
1976 - Uno strano campione di football (Gus), regìa ad Vincent McEveety

Culegamènt estéran

(IT) Filmugrafìa in s'l IMDb

Àtar prugèt

Wikiquote contiene citazioni di o su Bob Crane
Wikimedia Commons contiene file multimediali su Bob Crane