Vai al contenuto

Beau Bridges

Da Wikipedia.

C'l artìcul chè 'l è scrit in Miranduléś Emiliàn

Beau Bridges tòlt śò in dal 2011


Lloyd Vernet Bridges III, cgnusû méj sōl cuma Beau Bridges (Los Angeles, 4 ad Dicémbar dal 1941, a s lèś [ˌboʊ ˈbɹɪd͡ʒɪz] in ingléś), 'l è 'n atōr e regìsta americàṅ. In dla sò caréra, in dua l'è stâ impgnâ da la fîṅ di an Quarànta in duśènt e pasa prudusiòṅ fra cìnema e televiśiòṅ, 'l è stâ bòṅ ad vìnsar tri Emmy Award, dū Golden Globe e 'n Grammy Award. Al gh'à anc na stéla in dla Hollywood Walk of Fame.

Fiōl ad Lloyd Bridges e fradèl più grand ad Jeff, tut dū atōr, Beau 'l à tacâ a lauràr in dal mónd dal cìnema a sèt an tulénd part a la cumèdia Tra moglie e marito, a fiànc ad Dana Andrews e 'd Louis Jourdan, e a 'l noir Le forze del male cun prutagunìsta John Garfield.

Dvintâ grand, al gira 'l thriller New York: ore tre - L'ora dei vigliacchi, insém a Tony Musante e a Martin Sheen, e la cumèdia Chicago Chicago (1969) cun la Melina Merkouri e la Margot Kidder.

In di an Stanta a 'l ém vist in dla cumèdia Il padrone di casa (1970), in còpia cun la Lee Grant, in dla cumèdia dramàtica Una faccia di c... cun l'Elizabeth Taylor e Richard Burton, in dla part d'n infarmēr 'd un manicòmi, in dal drama Spirale d'odio (1972), cun prutagunìsta James Mason, in dal biugràfic Una finestra sul cielo (1975), cun lò ch'al fà 'l muróś dla Marilyn Hassett ch'la dvènta tetraplégica dòp 'n incidènt su i sî, in dal drama La libellula non deve volare (1976), in dua 'l è 'n èx malâ psichiàtric ch'al próa a 'rfàr-as na vita cun la Susan Sarandon, in dal thriller Panico nello stadio (1976), a fiànc ad Charlton Heston, John Cassavetes e Martin Balsam, e in dal drama Norma Rae (1979), in dal rōl d'n uperàj dal sud e secónd marè dla Sally Field, vinsidōra pò 'd un Prèmi Òscar.

Lò in dal 1992 insém a sò pàdar Lloyd Bridges

In di an Utànta 'l à recitâ in dal drama Fuga nella notte (1982), baśâ su la stòria véra ad dó famìji ch'in dal 1979 i èṅ scapàdi via da la Germàgna d'l Èst druànd dal mungulféri fati in cà, in dla cumèdia dramàtica Hotel New Hampshire (1984), cun la còpia Rob Lowe/Jodie Foster, e in dal film muśicàł I favolosi Baker (1989), in du 'l à laurâ cun sò fradèl Jeff ma anc cun la Michelle Pfeiffer e la Jennifer Tilly.

In dal 1996 'l à tòlt part a 'l drama spurtìṿ Jerry Maguire, pelìcula cun Cuba Gooding Jr. e Tom Cruise, méntar 'l an dòp 'l è stâ prutagunìsta dla cumèdia La seconda guerra civile americana in di pagn dal guvernadōr d'l Idaho che, srand i sò cunfîṅ intèran, al dà inìsi a la secónda guèra sivìla in di Stat Unî. Fra i sò ùltim lavōr a psém nutàr al drama Intrigo a Berlino (2006), in dla part dal culunèl Müller, al film 'd asiòṅ Max Payne (2008), cun Mark Wahlberg, e la cumèdia Paradiso amaro (2011), insém a George Clooney.

D'arcurdàr anc i sò lavōr in série televiśìvi cuma Io e i miei tre figli, Bonanza, Sorrisi e litigi, Storie incredibili, Will & Grace, Stargate Atlantis, Stargate SG-1, Desperate Housewives, Brothers & Sisters - Segreti di famiglia, Masters of Sex e Matlock.

Beau al s è spuśâ na prima vòlta in dal 1964 cun la culéga Julie Anne Landfield. Dòp avēr divursiâ sèg 'l à tòlt cuma mujēr la Wendy Treece in dal 1984. Al gh'à sinc fiōi, dū cun la mujēr ad prim lèt (òṅ adutâ).

Filmugrafìa

[mudéfica la surzéia]
Chicago Chicago (1969)

cuma atōr

[mudéfica la surzéia]

cuma regìsta

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Beau_Bridges&oldid=168478"