Basic (film)
|
C'l artìcul chè 'l è scrit in
Miranduléś |
 Basic | ||
.png) Brian Van Holt in na figùra dal film | ||
| Cōrs baś militàr 2003 | ||
|---|---|---|
| Regìa: John McTiernan | ||
| Scritōr: James Vanderbilt | ||
| Atōr: John Travolta • Samuel L. Jackson Connie Nielsen • Tim Daly • Brian Van Holt Giovanni Ribisi • Taye Diggs • Roselyn Sánchez Dash Mihok • Cristián de la Fuente • Nick Loren Harry Connick Jr. • Jonathan Rau • Steven Maye | ||
| Müsica: Klaus Badelt | ||
| Léngua: Ingléś | ||
| Dürä dal film: 98 minüt | ||
| Nasiōṅ: Stat Unî • Régn Unî | ||
Basic (Cōrs baś militàr) 'l è 'n śal dramàtic americàṅ dal 2003 ad John McTiernan.
La pelìcula in tut l'à muciâ sù dagnóra quarànta-tri migliòṅ ad dòlar a frònt 'd un cóst ad sinquànta.
Sunt
[mudéfica la surzéia]Al sergînt magiōr Nathan West (Samuel L. Jackson) 'l è a cap dna squàdra ad ranger cun 'l incàr'g ad far di adestramènt dimóndi pēś p'r i sò suldâ. Par n'eśercitasiòṅ in dla giùngla dal Pànama al s pòrta sèg al sóta-tenènt Levi Kendall (Giovanni Ribisi), fiōl 'd un generàł d'l eśèrcit, al sergînt Ray Dunbar (Brian Van Holt), al sergînt texàṅ Mueller (Dash Mihok), Jay Pike (Taye Diggs), la Nuñez (Roselyn Sánchez) e Castro (Cristián de la Fuente). Durànt al tirusìni a sucéd quèl, fórsi na litgàda, cun Dunbar che méntar 'l è drē a scapàr via c'n in spala Kendall ch'l è armàś frî, al spara a Mueller, masànd-al.
Dal grup i tórnan in di Stat Unî sōl Kendall, ch'al finìs a 'l uśdàł militàr, e Dunbar che però al n rispónd minga a 'l dmandi dla capitàna Julia Osborne (Connie Nielsen), esénd ch'al vōl dascórar sōl c'n un ranger sò para, cum al scriv ciàr e tónd su 'n bijét. Al culunèl Bill Styles (Tim Daly) al fà ciamàr 'n èx culéga 'd West, un ranger ch'al s éra dimìs da 'l sò incàrag par n'indàśin ad curusiòṅ ch'la n è incóra minga finìda, Tom Hardy (John Travolta). Chi lò al gh la cava a far-'s avēr al versiòṅ ad qvél ch'l è sucès prima da Kendall, in cura da 'l dutōr Peter Vilmer (Harry Connick Jr.), èx muróś dla Osborne, e pò anc da Dunbar. I dū i còntan che di suldâ i s ér'n arvultâ cóntar a West masànd-al, ma su i respunsàbii i dū racònt i èṅ dimóndi difarènt.
A n sènt punt Kendall al mōr a 'l impruvìś par n'emuragìa, dòp un śbóc ad sangṿ e gòmit fòrt. Prima ad srar i òć par sèmpar, chi lò al gh la cava però a sgnar c'n al sò sànguv 'n 8 su la maṅ dla Osborne, un sìmbul cumpàgn a qvél che Dunbar 'l iva scrit su 'l fujét durànt 'l interugatòri. A salta fóra che in dal grup ad West i gh'éran di ranger ch'ad nascòst i ér'n insaplâ in un tràfic ad dròga.