Base artica Zebra
|
C'l artìcul chè 'l è scrit in
Miranduléś |
 Ice Station Zebra | ||
| Base artica Zebra | ||
 Rock Hudson e Tony Bill in na figùra dal film | ||
| Baś àrtica Zebra 1968 | ||
|---|---|---|
| Regìa: John Sturges | ||
| Scritōr: Alistair MacLean • Douglas Heyes Harry Julian Fink • W.R. Burnett | ||
| Atōr: Rock Hudson • Ernest Borgnine • Tony Bill Patrick McGoohan • Jim Brown • Lloyd Nolan Alf Kjellin • Gerald S. O'Loughlin • Ted Hartley Murray Rose • Ron Masak • Sherwood Price | ||
| Müsica: Michel Legrand | ||
| Léngua: Ingléś • Rus | ||
| Dürä dal film: 148 minüt | ||
| Nasiōṅ: Stat Unî | ||
Base artica Zebra (Baś àrtica Zebra) 'l è 'n film ad spiunàǵ americàṅ dal 1968 ad John Sturges trat da 'l rumànś umònim 'd Alistair MacLean. 'L è stâ candidâ a dū Prèmi Òscar, par la futugrafìa ad Daniel L. Fapp e p'r i efèt speciài.
Custâ da i òt a i déś migliòṅ ad dòlar, al film al 'n à pò muciâ sù quàt'r e siē in Nordamèrica.
Sunt
[mudéfica la surzéia]Al capitàṅ dal sotamarèṅ americàṅ “Tigerfish” James Ferraday (Rock Hudson), ch'al lavóra in na baś NATO in Scòsia, su órdan dal cmandànt Garvey (Lloyd Nolan) al gh'à da partìr in présia p'r andàr a salvàr i mémbar dna stasiòṅ sientìfica britànica a 'l pôl nòrd ciamàda Zebra esénd che là a gh'è na timpèsta 'd néṿ e gl'aparéć i n pōlan briśa vulàr.
Par cònt dal presidènt di Stat Unî, Ferraday in dal sotamarèṅ, ól'r a i sò óm, al gh'à da purtàr sèg anc 'n agìnt d'l intelligence dal Régn Unî ch'al s fà ciamàr David Jones (Patrick McGoohan), ch'in d'l Àrtic al gh'à da far na misiòṅ segréta, e pò anc al capitàṅ Leslie Anders (Jim Brown), che p'r órdan di militàr al gh'à da tōr al pòst dal tenènt Russell Walker (Tony Bill), e 'n agìnt rus ciamâ Boris Vaslov (Ernest Borgnine) ch'l à tradî i suviètig pasànd da la banda di americàṅ.
Rivâ a destinasiòṅ, a 'l incìrca a sincsènt chilómetar a nòrd-òvest dla baś danéśa ad Nord (Gruenlàndia), al sotamarèṅ al próa a śbragàr al giàs, prima cuciànd in sù e pò tirànd un silûr par scavśàr i iceberg. Durànt chi uperasiòṅ chè però in un sit dal sotamarèṅ a taca a vgnir dèntar dl'àqua par via 'd un sabutàǵ, miténd a risć la vita d'l equipàǵ. Sōl a 'l ùltim i óm ad Ferraday i gh la càv'n a srar al purtèl ch'a s éra avèrt. Ferraday al suspèta 'd Vaslov méntar Jones al gh'à invéci di dubi su Anders.
Quànd finalmènt al sotamarèṅ al gh la cava a śbuśìr al giàs in un punt in dua 'l è più sutìl, Ferraday, Vaslov, Anders, Jones e 'n grup ad marines i partìsan p'r andàr a salvàr i óm dla baś Zebra. Soquànt i èṅ catâ mòrt, di àtar i èṅ mis mâł par via dal fréd patî. Jones al cònta finalmènt a Ferraday i segrét dla sò misiòṅ: purtàr via dal pelìculi 'd un satèlit spia rus, presipitâ da cal bandi lè, ch'l iva tòlt śò di sit militàr americàṅ ma anc qvéi suviètig in dal vgnir śò. A gh'è da far in manéra che cal fóto lè i n finìsan minga in dal maṅ di cumunìsta. In cal méntar però anc chi lōr i èṅ drē a rivàr a la baś, cmandâ da 'l culunèl Ostrovsky (Alf Kjellin).