Barry Seal - Una storia americana
|
C'l artìcul chè 'l è scrit in
Miranduléś |
 American Made | ||
| Barry Seal - Una storia americana | ||
 La Sarah Wright in na figùra dal film | ||
| Barry Seal - Na stòria americàna 2017 | ||
|---|---|---|
| Regìa: Doug Liman | ||
| Scritōr: Gary Spinelli | ||
| Atōr: Tom Cruise • Domhnall Gleeson Sarah Wright • Jesse Plemons • Alejandro Edda Caleb Landry Jones • Lola Kirke • Jayma Mays Benito Martinez • Mauricio Mejía • Fredy Yate | ||
| Müsica: Christophe Beck | ||
| Léngua: Ingléś • Spagnōl | ||
| Dürä dal film: 115 minüt | ||
| Nasiōṅ: Stat Unî | ||
Barry Seal - Una storia americana (Barry Seal - Na stòria americàna) 'l è 'n film biugràfic americàṅ dal 2017 ad Doug Liman ch'al cònta la vita dal pilòta 'd aparéć Barry Seal interpretâ par Tom Cruise.
Custàda sinquànta migliòṅ ad dòlar, la pelìcula la 'n à pò muciâ sù dagnóra sènt-tréntasìnc.
Sunt
[mudéfica la surzéia]Barry Seal, pilòta 'd aparéć dla cumpagnìa Trans World Airlines, al stà a Baton Rouge cun sò mujēr, la Lucy (Sarah Wright), e tri fiōi pìcui da tiràr sù. Un dè al vîṅ farmâ da 'n sèrt Monty Schafer (Domhnall Gleeson) ch'al gh diś 'd èsar 'n agìnt segrét dla CIA e ch'al sà che lò 'l è sòlit purtàr in di Stat Unî di sìgar cubàṅ ad cuntrabànd, un quèl cóntar la léǵ. Par srar 'n òć Schafer al gh śibìs ad far un lavursèṅ p'r i servìsi segrét, qvél 'd andàr a tiràr śò da darènt dal baś di cumunìsta in Sentramèrica, druànd 'n aparéć pìcul e śvélt. Barry al gh astà, purtànd a la CIA dal fóto fati bèṅ. Ma durànt i sò viàś avànti e indrē, in du 'l à anc incruśâ 'l generàł Manuel Noriega (Alberto Ospino), Seal al s mét 'd acòrd cun Jorge Ochoa (Alejandro Edda) e Pablo Escobar (Mauricio Mejía), dal cartèl ad Medellín, par purtàr in dal sò paéś di càrag pēś ad dròga che pò lò al buta śò da 'l aparéć in di padói dla Luiśiàna prima d'l ateràǵ.
Barry al taca a far i bèsi ma 'n dè al vîṅ arestâ da la pulisìa in Culómbia p'r i sò tràfic muśnènt. La CIA al s mét in mèś e la gh la cava a far-al vgnir fóra 'd parśòṅ, in cambi però lò al gh'à da cuntinuàr a lauràr par lōr purtànd dgl'armi ad nascòst a i contras in Nicaràgua, in lòta c'n al regìm cumunìsta di sandinìsta, parchè al cungrès di Stat Unî al s éra mis cónt'r a 'l vlēr dal presidènt Ronald Reagan ad finansiàr-i diretamènt. La CIA la 'l trasferìs in un paiśèṅ d'l Arkànsas, Mena, quaciànd-'l ad bèsi che lò al n sà gnanc in du mét'r-i, tacànd anc a saplìr-i sót-tèra.
Méntar Seal al lavóra p'r i americàṅ, in dal stés tèmp al cuntìnua i sò tràfic ad dròga par cònt 'd Escobar, dand a lōr gl'armi destinàdi a i costras che, a dir-la tuta, i n gh'aṅ minga tanta vója 'd cumbàtar. Quànd pò al vîṅ farmâ da gl'agìnt d'l FBI e dla Drug Enforcement Administration, ch'i n saìvan minga dal sò lavōr par la CIA, Schafer al fà in manéra 'd jutàr-'l incóra par śibìr-ag na misiòṅ in Sentramèrica e in Sudamèrica p'r andàr a futugrafàr, sèmp'r in aparéć, al piantagiòṅ ad dròga di regìm cumunìsta, sta vòlta par cònt dla Cà Biànca. Al tradimènt vèrs al cartèl ad Medellín al gh custarà dimóndi câr.