Barbara Bain
|
C'l artìcul chè 'l è scrit in
Miranduléś |
La Mildred Fogel, cgnusùda méj c'n al nóm 'd art ad Barbara Bain e dal vòlti anc cuma Barbara Monker (Chicago, 13 ad Setémbar dal 1931, a s lèś [ˈbɑːrbərə beɪn] in ingléś), l'è n'atōra, regìsta ad teàtar e èx mudèla americàna.
Biugrafìa
Uriginària d'l Illinòis da na famìja cun dal raìś rusi ad religiòṅ ebràica, la Bain l'à studiâ suciulugìa a l'Università d'l Illinòis - Urbana-Champaign faghénd anc di cōrs ad balét mudèran ch'al dvènta la sò pasiòṅ. Dòp la làurea la và a star a New York par studiàr in dla scóla dla balarìna e cureògrafa Martha Graham. In séguit la taca a far la mudèla e a studiàr recitasiòṅ, prima tgnénd adrē a 'l lesiòṅ d'l atōr Curt Conway e pò frequentànd anc 'l Actors Studio ad Lee Strasberg. In chi an lè la cgnós Martin Landau ch'la spuśarà in dal 1957. Da 'l matrimòni i nàsan dó fiōli, la Juliet e la Susan.
A la fîṅ di an Sinquànta e p'r i an a vgnir la Bain la taca a recitàr in soquànti série televiśìvi cuma Carovane verso il West, Indirizzo permanente e Mamma a quattro ruote par pò catàr al sucès faghénd la part dla Cinnamon Carter in dal telefìlm Missione impossibile (1966-1969), prugràma fat in còpia cun sò marè, ch'al gh fà vìnsar tri Emmy Award ad fila, c'n anc na candidadùra a i Golden Globe. In séguit, sèmpar cun Landau, la tōś part a 'l dó stagiòṅ dla série 'd fantasiénsa Spazio 1999, in di pagn dla dutōra Helen Russell, e a 'l film par la televiśiòṅ Savage (1979) par la regìa ad Steven Spielberg.
Fra i sò ùltim lavōr su i schérum pìcui a 'rcurdém soquànt puntàdi ad Moonlighting, La signora in giallo, Un detective in corsia, Walker Texas Ranger, Millennium, Squadra Med - Il coraggio delle donne, CSI - Scena del crimine e Code Black.
L'à laurâ na quàlc vòlta anc a 'l cìnema in pelìculi cuma 'l thriller Teste rasate (1989), su 'n grup ad śōvan neo-naśìsta, e i drama Panic (2000), a fiànc ad William H. Macy, dla Neve Campbell e 'd Donald Sutherland, American Gun (2002), insém a James Coburn e a la Virginia Madsen, e On the Rocks (2020), in dla part dla nunóna dla Rashida Jones.
Filmugrafìa
- 1971 - Murder Once Removed, regìa ad Charles S. Dubin - Film TV
- 1972 - Buonanotte amore mio (Goodnight, My Love), regìa ad Peter Hyams - Film TV
- 1973 - Savage, regìa ad Steven Spielberg - Film TV
- 1973 - L'estate in cui i ragazzi non c'erano (A Summer Without Boys), regìa ad Jeannot Szwarc - Film TV
- 1979 - La collina dei morti viventi (Don't Go Near the Park), regìa ad Lawrence David Foldes
- 1981 - The Harlem Globetrotters on Gilligan's Island, regìa ad Peter Baldwin - Film TV
- 1989 - Teste rasate (Skinheads), regìa ad Greydon Clark
- 1989 - L'originale (Trust Me), regìa ad Robert Houston
- 1990 - I visitatori del sabato sera (The Spirit of '76), regìa ad Lucas Reiner
- 1998 - Animals (Animals with the Tollkeeper), regìa ad Michael Di Jiacomo
- 1998 - Gideon, regìa dla Claudia Hoover
- 1998 - Icebergs: The Secret Life of a Refrigerator, regìa ad Nicola Hart - Film TV
- 2000 - Panic, regìa 'd Henry Bromell
- 2000 - Bel Air, regìa ad Christopher Coppola
- 2002 - American Gun, regìa 'd Alan Jacobs
- 2003 - Tracey Ullman in the Trailer Tales, regìa dla Tracey Ullman - Film TV
- 2006 - Trapped!, regìa ad Rex Piano - Film TV
- 2008 - Haunted Echoes, regìa 'd Harry Bromley Davenport
- 2009 - Forget Me Not, regìa ad Tyler Oliver
- 2009 - Political Disasters, regìa ad Zach Horton
- 2010 - Nothing Special, regìa dl'Angela Garcia Combs
- 2016 - Silver Skies, regìa dla Rosemary Rodriguez
- 2020 - On the Rocks, regìa dla Sofia Coppola
Culegamènt estéran
Àtar prugèt
Wikimedia Commons contiene file multimediali su Barbara Bain
