Bambi
|
C'l artìcul chè 'l è scrit in
Miranduléś |
 Bambi | ||
| Bambi | ||
 Bambi, Fiōr e Tamburèṅ in na figùra dal film | ||
| Bambi 1942 | ||
|---|---|---|
| Scritōr: Felix Salten | ||
| Regìa: David Hand • James Algar • Bill Roberts Norman Wright • Sam Armstrong Paul Satterfield • Graham Heid | ||
| Senegiadùra: Perce Pearce • Vernon Stallings Larry Morey • Melvin Shaw • Carl Fallberg Chuck Couch • Ralph Wright | ||
| Personâǵ: Bambi • Tamburèṅ • Fiōr • Faline Gran Prìnsip dla furèsta • Grandòć amìg • Ronno | ||
| Mùśica: Frank Churchill • Edward H. Plumb | ||
| Durèda dal cartòun: 70 minût | ||
| Lengua: Ingléś | ||
| Nasiòun/Paēś: Stat Unî | ||
Bambi 'l è 'n cartòṅ animâ dal 1942 diśgnâ e prodòt par l'americàna Walt Disney Productions, vgnû pò fóra tradót anc in dal rèst dal mond, faghénd 'l incàs più grand ad c'l an lè. 'L è 'l 5nt dla série di Clàsic Disney e 'l è trat da 'l rumànś Bambi, la vita di un capriolo ad Felix Salten.
La pelìcula l'è stada candidàda a i Prèmi Òscar p'r al sunòr (Sam Slyfield), par la cansòṅ Love Is a Song e par la culòna sunóra sénsa però purtàr a cà gnint.
In dal 2011 'l è stâ sarnî p'r èsar tgnû dacàt in dal National Film Registry dla Bibliutéca dal Cungrès di Stat Unî.
Sunt
[mudéfica la surzéia]In un dè 'd Primavéra, in na furèsta dal Maine, na sèrva la dà a la luś un serbiàt ciamâ Bambi ch'al s pòrta sèg al scutmàj 'd “al prinsipèṅ” parchè 'l è 'l fiōl dal Gran Prìnsip dla furèsta, un vèć ma fòrt sèruv ch'l è a cap dla sò cumunità par via dal sò savēr e di cunsìli ch'l è bòṅ ad dar a tut. In di sò prim méś ad vita Bambi al s fà subìt amìg c'n un cunèṅ ciamâ Tamburèṅ, ch'al gh inséggna a giràr e a dascórar, e pò c'n un pìcul ad muféta piutòst spauróś ciamâ Fiōr.
Bambi 'l è dimóndi curióś e 'l vrév andàr in gir a scuriuśàr ma sò màdar la 'l mét in guàrdia su i perìcui ad vìv'r in na furèsta. Un dè Bambi 'l incróśa in dla pradarìa na serbiàta dimóndi dōlsa, ciamàda Faline, e finalmènt anc sò pàdar, insém a i masć grand dla sò spécie. In Invèran i rìvan lè di casadōr ch'i cópan sò màdar, in dal mèś dna stagiòṅ dimóndi difìcila par tuti 'l bèsti par via dal fréd e dal magnàr ch'a gh 'n è pôc. Bambi al la pésca dapartùt ma sò pàd'r al riva da lò e al gh diś che sò màdar l'è mòrta e ch'al n l'arvedrà mai piò.
In Primavéra a Bambi i gh sàltan fóra di còran, adès 'l è 'n śōvan dònca, e 'n grandòć sò amìg al gh diś ch'l è rivâ 'l mumènt p'r al bèsti c'n i sò an 'd inamuràr-as, un quèl ch'a sucèd dabòṅ a Tamburèṅ e a Fiōr ma minga a lò ch'l armàgn acsè da par lò, sénsa la cumpagnìa di sò amìg dna vòlta.
Un dè, bvénd in na bòra, al s cata grugn cóntar grugn davànti a la Faline ch'la s è fata granda anc lē. Bambi al capìs ch'al s è inamurâ ma prima 'd avēr-la sèg al gh'à da cumbàt'r un sèruv rivàł, Ronno.
Purtròp par lò i casadōr i èṅ turnâ in dla furèsta par far dal mâł a 'l pòvri bèsti. Sèg i gh'aṅ anc di cagnàs e la sò vita e qvéla dla Faline i èṅ dimóndi in perìcul.