Bàmbula

C'l artìcul chè 'l è scrit in Miranduléś

«

A gh'è dal bàmbuli stufi ch'i n vōlan briśa śugàr e a gh'è dal bàmbuli migliuràdi sèmpar prònti par tut i tò deśidèri. Kitty gambalùnga l'è na bàmbula Migliorati. Śmingla, śgagiàda, sénsa mai fàdiga, Kitty ch'la s pōl pigàr l'è bòna 'd métar-'s in tut al puśisiòṅ (incruśàr al gambi, pigàr i śnòć, chinàr-'s in avànti, prilàr al cô) par vgnir incónt'r a tuti 'l tò fantaśìi, par śugàr tèg. Sicûra 'd lē, elegànta, spurtìva, sufisticàda, la gh'à di vistî par tuti gl'ucaśiòṅ.»

(Reclàm di an Stanta dla bàmbula Kitty Gambalùnga)

La bàmbula, cgnusùda anc cuma pua, l'è 'n śugàtul ad fórma 'd fantòs fata 'd légn, cartòṅ-pist, plàstica o àtar materiài. La rapreśénta sèmpar na parsòna, granda o piculìna, e la sarvìs par far divertìr e pasàr al tèmp a i putèṅ, specialmènt a 'l fémni ch'acsè i impàr'n a far al mistēr di genitōr cuma badàr-ag, cambiàr-'g i vistî, partnàr-'g i cavìi, métar-li a lèt e via dascurénd. I grand i ténd'n invéci a cumpràr dal bàmbuli par culesiòṅ, specialmènt qvéli più vèci e tgnudi bèṅ i cóstan dimóndi.

Quànd al śugàtul al figùra 'n masć, a s dascór ad bambulòt.

Cal śōg chè al gh'è da i tèmp antîg, al gh'éra bèla in dl'Età dal brónś, méntar la prudusiòṅ mudèrna la nas in dla Germàgna dal XV sécul.

In di tèmp 'd adès i vànan fòrt al bàmbuli in vinîł ch'i pàran véra.

La bàmbula più famóśa a 'l mónd l'è la Barbie (c'n al sò muróś Ken e sò surèla più pìcula, la Skipper) fata par l'americàna Mattel ch'l à dâ vita anc a 'n bambulòt p'r i baghét, Big Jim. In Itàglia i gh'aṅ abû sucès anc al Bratz, al Winx, Cicciobello, la Tanya, la Kitty, la Sbrodolina e la bàmbula Lenci nada a 'l inìsi dal XX sécul a Turèṅ.

At pō dar n'uciàda anc a

Culegamènt estéran

La sò paśna su 'l sit dla Treccani

Wikimedia Commons contiene file multimediali su Bàmbula