Vai al contenuto

Ava Gardner

Da Wikipedia.

C'l artìcul chè 'l è scrit in Miranduléś Emiliàn

La Gardner tòlta śò in dal 1951


LʼAva Lavinia Gardner, cgnusùda méj cuma Ava Gardner (Grabtown, 24 ad Dicémbar dal 1922 - Lóndra, 25 ad Śnar dal 1990, a s lèś [ˈeɪvə ˈɡɑːrdnər] in ingléś), l'è stada n'atōra americàna, candidàda a i Prèmi Òscar dal 1954 par la pelìcula Mogambo, film ad John Ford che lē l'à girâ insém a Clark Gable e a la Grace Kelly.

Diva fra 'l più impurtànti di tèmp 'd òr a Hollywood, l'è dvintàda famóśa fra i an Quarànta e i an Ssanta par la sò belésa, tant ch'in alóra i la ciavàvan „la bèstia più bèla dal mónd“, e p'r al sò interpretasiòṅ sintìdi e da spés turmintàdi.

Biugrafìa

[mudéfica la surzéia]

Uriginària dla Carulìna dal Nòrd, cun dal raìś ingléśi, la Gardner la taca a far cinéma a 'l inìsi di an Quarànta, sèmpar faghénd dal parti piculìni in dal méntar ch'la studiàva disiòṅ. In dal 1946 la rècita c'n un Burt Lancaster a 'l debùt in I gangsters ad Robert Siodmak, pò cun Clark Gable in I trafficanti e cun Gregory Peck in Il grande peccatore.

In dal 1951 la sa spóśa in tèrsi nósi cun Frank Sinatra, ch'l'iva cgnusû su 'l set dla cumèdia Il bacio di Venere, ma pò i dū atōr i s divìdan sinc an dòp. In c'l an lè cun la Metro Goldwyn Mayer la gira anc soquànti pelìculi cun dal part ad femme fatale cuma Voglio essere tua, in còpia cun Robert Mitchum, Pandora, cun James Mason, e Show Boat ad George Sidney.

L'Ava Gardner

In Le nevi del Chilimangiaro (1952), trat da 'n racònt 'd Ernest Hemingway, l'incróśa incóra Gregory Peck, pò 'l an dòp la riva in Itàglia par giràr La contessa scalza a 'l pòst dla Rita Hayworth, faghénd un lavōr dimóndi fat bèṅ in dla part dla Maria Vargas, a fiànc 'd Humphrey Bogart, ad Rossano Brazzi e dla Valentina Cortese. Recitànd in La capannina (1957) la taca na stòria cun Walter Chiari.

In di an Ssanta la tōś part insém a Richard Burton e a la Deborah Kerr a 'l film La notte dell'iguana (1964), trat da 'n drama 'd Tennessee Williams e girâ in bòna part in Mèsic, e pò a 'l La Bibbia, sèmp'r ad John Huston, faghénd la part dla mujēr 'd Abràm, insém a Richard Harris e a George C. Scott.

Fra i sò ùltim film a 'rcurdém i catastròfic Terremoto (1974), fat insém a Charlton Heston, Cassandra Crossing (1976), in dua la viàśa su 'n trêṅ dla mòrt insém a 'l sò muróś dimóndi più śōvan Martin Sheen, e Città in fiamme (1979), cun Henry Fonda, James Franciscus e la Shelley Winters.

In televiśiòṅ l'à girâ in dal 1985 al série A.D. - Anno Domini, California e La lunga estate calda.

L'è mòrta a ssanta-sèt an par na palmunît. La n cardìva minga in Dio, in dla sò vita l'à sèmpar dâ 'l sò apòǵ a 'l batàj p'r i dirìt sivìl di négar e a qvéli dal partî demucràtic.

'L American Film Institute al l'à misa a 'l 25śum pòst dla lista dal star più grandi dal cìnema. La gh'à na stéla in dla Hollywood Walk of Fame.

Filmugrafìa

[mudéfica la surzéia]
I gangsters (1946)
Al néṿ dal Chilimangiaro (1952)
Mogambo (1953)
La cuntésa dascàlsa (1954)
La spóśa bèla (1960)
Cassandra Crossing (1976)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Ava_Gardner&oldid=162558"