Artigli

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg The Uncanny
Artigli
Artigli.png
Ray Milland e Peter Cushing in na figùra dal film
Śgrinfi
1977
Regia: Denis Héroux
Scritùr: Robert Bloch
Atùr: Peter CushingRay MillandDonald Pilon
Donald PleasenceKatrina Holden Bronson
Chloe FranksJoan GreenwoodJohn Vernon
Samantha EggarRenée GirardJean LeClerc
Müsica: Wilfred Josephs
Lengua: Ingléś
Dürä dal film: 88 minüt
Nasiòṅ: Régn UnîCànada


«
I gat i n èṅ briśa sèmpar gustōś e daśnumōś.»
(Tagline dal film)


Artigli (Śgrinfi) 'l è 'n film ad scarésa ingléś e canadéś dal 1977 ad Denis Héroux girâ c'n un budget 'd un migliòṅ ad dòlar a 'l incìrca o pôc da piò. A s trata 'd un film a epiśòdi cuma in dla tradisiòṅ dl'Amicus (fra i prudutōr a gh'è anc Milton Subotsky).

Sunt

Al scritōr Wilbur Gray (Peter Cushing), dòp avér studiâ soquànt fat ad scarésa sucès in tut al mónd cun prutagunìsta di gat, al s è parsuàś che cal bistiàsi lè i sìan lōr a cmandàr in cà e a far far tut qvél ch'i vōlan a i sò padròṅ. Na nòt al pòrta i sò scrit da 'l editōr Frank Richards (Ray Milland) par far-ag vgnir fóra 'n lìbar. Chi lò al fà però fadìga a créd'r-ag, anc parchè al gh'à 'n bèl gat biànc anca lò ad nóm Sugar. Wilbur al gh cònta dònca tri fat a sò dita sucès dabòṅ.

  • 1912, Lóndra - La sgnóra Malkin (Joan Greenwood), na vècia pîna 'd bèsi ch'l'è custréta a vìv'r a lèt tut al dè, la decìd ad cambiàr testamènt par lasàr incòsa a i sò gat e gnint a sò anvō Michael (Simon Williams) ch'al s 'n è sèmpar fargâ 'd lē. La fà far acsè dū scrit nóṿ a 'l nutàr Wallace (Roland Culver) ma la badànta Janet (Susan Penhaligon), ch'l'è 'd acòrd cun Michael, la pòrta via la còpia ad Wallace ma la n gh la cava minga a sćiancàr qvéla dla vècia parchè quésta chè la s darséd méntar lē l'éra drē a vèrar la casafòrt. Dòp avér-la cupàda c'n un cusèṅ però la gh'à da far i cònt c'n i gat rabî e c'n al lōr ungiàsi, bòni par śgranfgnàr a mòrt lē e cal bòṅdagnìnt dal sò muróś.
  • 1975, Quebec, Cànada - La pòvra putìna Lucy (Katrina Holden Bronson), armàśa òrfna di sò genitōr mòrt in 'n incidènt in aparéć, la và a vìv'r a cà ad sò sia Joan Blake (Alexandra Stewart), surèla ad sò màdar ch'la lśiva vluntéra lìbar ad striarìa parchè la gh cardìva. La baghéta la i s pòrta adrē in dla valìś insém a 'l sò gat négar Wellington. Sò cuśìna Angela (Chloe Franks), pôc più granda 'd lē, la i 'n vrév òṅ anca lē ma sò màdar la i n s cumpatìs briśa parchè i stràmnan un muć ad pēi par cà. Quànd l’Angela la próa a śugàr sèg, al gat al s tira da na banda e alóra lē la fà in manéra, insém a sò màdar, che sò pàdar (Donald Pilon) 'l al purtìs a 'l masèl parchè la fà crédar ch'al sia stâ lò a far di diśàst'r in cà. Na nòt però Wellington al tórna da la Lucy e chi lē la dróa la striarìa négra par réndar cica sò cuśìna par pò spaplàr-la schisànd-la c'n i pē.
  • 1936, Hollywood - Mént'r al gira 'n film ad scarésa, 'l atōr prutagunìsta Valentine De'ath (Donald Pleasence), dit VD, al gh la cava a cupàr sò mujér Madeleine (Catherine Bégin) faghénd finta ch'a sia susèsa na daśgràsia. In cla manéra lè lò al pōl vìv'r in paś cun la sò amànta più śōvna, l’Edina (Samantha Eggar). Ma 'l gat ad sò mujér, da lò ciamâ Śgat da 'l tant ch'al gh'in fargàva, al vōl vindicàr-'s ad lò p'r avér cupâ la sò padròna e anc i sò gatèṅ péna nâ, andgâ śò in dal lìcit.

Finî ad cuntàr incòsa, Wilbur al tórna a cà ma i gat i n vōlan mia ch'a s cònta la véra su 'd lōr e la sò fiṅ l'è sgnada. In cal méntar Sugar c'n al sò uciàdi a Frank, al fà butàr in dal fōg al dossier ch'al scritōr al gh'iva purtâ.

Culegamènt estéran