Annientamento (film)
|
C'l artìcul chè 'l è scrit in
Miranduléś |
 Annihilation | ||
| Annientamento | ||
.png) La Leigh e la Portman in na figùra dal film | ||
| Distrusiòṅ 2018 | ||
|---|---|---|
| Regìa: Alex Garland | ||
| Scritōr: Alex Garland • Jeff VanderMeer | ||
| Atōr: Natalie Portman • Jennifer Jason Leigh Tessa Thompson • Oscar Isaac • Sonoya Mizuno David Gyasi • Benedict Wong • Gina Rodriguez John Schwab • Tuva Novotny • Sammy Hayman Josh Danford • Kristen McGarrity • Kola Bokinni | ||
| Müsica: Geoff Barrow • Ben Salisbury | ||
| Léngua: Ingléś | ||
| Dürä dal film: 115 minüt | ||
| Nasiōṅ: Stat Unî • Régn Unî | ||
Annientamento (Distrusiòṅ) 'l è 'n film fantàstic e 'd scarésa americàṅ dal 2018 'd Alex Garland trat da 'n rumànś ad Jeff VanderMeer. A séguit d'n acòrd cun Netflix, la pelìcula l'è stada fata védar da 'l 28 ad Favràr dal 2018 in di cìnema sōl in di Stat Unî, Cànada e Cina mént'r in dal rèst dal mónd l'è stada misa diretamènt in dla piatafórma televiśìva darsèt dè dòp.
'L à muciâ sù quarànta-tri migliòṅ ad dòlar in dal sali a frònt 'd un budget ad quarànta.
Sunt
[mudéfica la surzéia]La Lena (Natalie Portman) l'è na biòluga e insgnànta americàna spuśàda c'n al militàr Kane (Oscar Isaac), cgnusû quànd anc lē l'éra impgnàda in d'l eśèrcit. Un dè chi lò al partìs a 'l impruvìś par na misiòṅ segréta sénsa piò turnàr e tut i crédan ch'al sia mòrt. I pàs'n i méś e la Lena la taca na relasiòṅ ad sès c'n al sò culéga Daniel (David Gyasi) ma pò la s pintìs, in fîṅ tant che Kane al tórna a cà da lē cuma s'a n fus sucès gnint e sénsa cuntàr-ag quèl. Tut 'd un trat 'l óm al gh'à di śbóc ad sangṿ viulènt e sò mujēr la ciàma subìt n'ambulànsa p'r andàr a 'l uśdàł in présia. Lung la strada però i dū i vìnan farmâ da di óm d'l eśèrcit ch'i i pòrtan via.
La Lena la s déśda in na strutùra militàra cun davànti a lē la psicòluga dutōra Ventress (Jennifer Jason Leigh) ch'la gh cònta che tri an prima un còrp celèst 'l éra presipitâ lung la còsta di Stat Unî in un sit ciamâ Àrea X dand vita a di fenòmen biulògic e eletromecànig misterióś tut 'd intóran ch'i éran bòṅ ad blucàr tut al cumunicasiòṅ vèrs 'l estéran e anc i drôṅ. Ad qvél ch'a sucéd lè dèntar a n s sà gnint, a s véd sōl ch'al sit 'l è drē a ślargàr-as sèmpar da piò e a 'l cunfîṅ a gh'è 'n luśōr culurâ ch'a gh fà da schérum. La Ventress la diś che Kane, adès in còma, al fava part 'd un grup ad suldâ ch'l iva pasâ cal cunfîṅ lè p'r andàr a védar da 'd là ma pò a n è turnâ indrē ninsòṅ a part lò.
La Ventress la śibìs a la Lena ad śuntàr-'s a lē p'r andàr a védar cuś a gh'è da 'd là da 'l “Luśōr”. Dal grup i fànan part anc la fìśica Josie Radeck (Tessa Thompson), la geomurfóluga Cass Sheppard (Tuva Novotny) e la mèdaga Anya Thorensen (Gina Rodriguez). Quànd al sinc dóni i pàs'n al cunfîṅ i càtan na natùra salvàdga e strâna, cuma se piànti e bèsti i ìsan patî dal mutasiòṅ o i gh'ìsan di càncar. Al piànti i faṅ di but ad fiōr difarènt, lung i mur i s fōrman dal mufi misterióśi, in dal padól a gh'è 'n aligadōr gigànt cun di dènt ch'i pàran qvéi 'd un squâl.
Al grup al cata pò 'n filmâ in du a s véd Kane c'n un curtèl in maṅ vèrar la pansa 'd un suldâ ch'a 'l pòst dal budèli al gh'iva di urganìśum viṿ ch'i parìvan di vérum gigànt ch'i s śliciàv'n adòs in dal méntar ch'i s muìvan dènt'r a 'l sò còrp. La Josie la pénsa ch'al “Luśōr” al sia bòṅ 'd urganiśàr in na manéra difarènta al DNA di èsar vivènt, cuma 'n priśma ch'al divìd la luś, par dar vita a di urganìśum mutâ. Al risć 'l è ch'a pòsa sucèd'r un quèl cumpàgn anc a che lōr.