Vai al contenuto

Anne Heche

Da Wikipedia.

C'l artìcul chè 'l è scrit in Miranduléś Emiliàn

La Heche tòlta śò in dal 2014


LʼAnne Celeste Heche (Aurora, 25 ad Maǵ dal 1969 - Los Angeles, 11 'd Agóst dal 2022, a s lèś [æn heɪtʃ] in ingléś) l'è stada n'atōra americàna.

Biugrafìa

[mudéfica la surzéia]

Uriginària d'l Ohio, l'éra fiōla dla Nancy e ad Donald Heche. Sò pàdar, diretōr 'd un côr, al mōr 'd AIDS quànd lē la gh'iva sōl quatórd'ś an. In dal stés a mōr anc sò fradèl Nate, in 'n incidènt in màchina, dòp che n'atra sò surèla, la Cynthia, l'éra mòrta p'r un prubléma a 'l cōr ch'la gh'iva pôc méś ad vita. In dal 2006 a murrà anc n'atra sò surèla, la Susan, p'r un canc'r a 'l sarvèl.

Dòp tant daspiaśēr la Heche la và a star insém a sò màd'r a Chicago in dua la taca a far la cantànta in di lucài par tiràr avànti in dal méntar ch'a scōla la stùddia recitasiòṅ.

L'atōra a i Emmy Award dal 1997

Dòp ès'r-as diplumàda, la firma 'n cuntràt par lauràr in dla soap opera Destini ambintàda a New York, sità in du la decìd ad spatinàr. La Heche la gira ssanta-nóṿ puntàdi dal telefìlm faghénd la part dla Marley Hudson, fra 'l 1987 a 'l 1991.

Al sò debùt a 'l cìnema 'l è dal 1993 quànd la rècita in dal film 'd aventùra Le avventure di Huck Finn mént'r in dal 1994 la gira insém a la Melanie Griffith e a Ed Harris la cumèdia Lezioni di anatomia.

Dòp èsar-'s impgnàda in soquànti pelìculi indipendènti, la sò caréra la ciàpa 'l vōl in dal 1997 quànd la gira al drama biugràfic Donnie Brasco, ch'al gh'iva un cast cun Johnny Depp, Al Pacino, Michael Madsen e James Russo, al catastròfic Vulcano - Los Angeles 1997, in còpia cun Tommy Lee Jones, al thriller So cosa hai fatto, cun Ryan Phillippe, e la cumèdia satìrica Sesso & potere, cun Robert De Niro e Dustin Hoffman.

'L an dòp la vîṅ sarnìda da Gus Van Sant par far la part dla Marion Crane in Psycho, arfacimènt figùra par figùra ad Psyco dal 1960, caplavōr 'd Alfred Hitchcock, e pò la fà còpia cun Harrison Ford in dla cumèdia Sei giorni, sette notti.

Dòp dū an ch'l'éra insém a 'l sò culéga Steve Martin, l'atōra l'à fat savēr ch'la s éra fata muróśa cun l'Ellen DeGeneres, un quèl ch'l à fat scrìvar dimóndi i giurnài braghēr, specialmènt quànd par la còpia a s è dascōrs ad matrimòni. Al spuśalìsi a gh'è stâ dabòṅ, in dal 2001, ma minga sèg ma c'n al cameraman Coley Laffoon ch'al lauràva in dla sitcom Ellen, in dua la DeGeneres l'éra la prutagunìsta, cun la Heche ch'l'éra da spés su 'l set. Dòp avēr abû un fiōl insém, la còpia la s è separàda in dal 2007 par pò divursiàr dū an dòp.

In dal 2000 la Heche l'à fat al sò debùt a la regìa, girànd al film par la televiśiòṅ Women, séguit ad Tre vite allo specchio in du 'l iva recitâ in dal 1996 e ch'al tratàva 'l argumènt d'l abòrt. In séguit l'à tòlt part a i telefìlm Ally McBeal, Nip/Tuck, Men in Trees - Segnali d'amore e àt'r incóra in dal méntar ch'la recitàva in di film John Q, thriller cun Denzel Washington, Robert Duvall e James Woods, e Birth - Io sono Sean, un śal dramàtic cun la Nicole Kidman e la Lauren Bacall.

L'Anne cun James Tupper
Lē insém a la DeGeneres
L'atōra in dal 2007
Sès & putēr (1997)

Da 'l 2007 a 'l 2018 la s è cumpagnàda cun 'lò atōr James Tupper ch'al gh'à dâ 'n àtar fiōl in dal 2009.

In d'l Agóst dal 2002, méntar la guidàva la sò Mini Cooper blù, la s è stablìda cónt'r un garàǵ, pò la s è ciucàda cóntar n'atra màchina par pò finìr cóntar na cà sfundànd al mur e ciapànd fōg. Purtàda a 'l uśdàł, l'è mòrta soquànt dè dòp. I sò òrgan i èṅ stâ dunâ, cuma la vliva lē.

Filmugrafìa

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Anne_Heche&oldid=163286"