Andrea Occhipinti

C'l artìcul chè 'l è scrit in Miranduléś

Andrea Occhipinti (Róma, 12 ad Setémbar dal 1957, a s lèś [anˈdrɛːa ɔkkiˈpinti] in itagliàṅ) 'l è 'n atōr e prudutōr itagliàṅ, fundadōr insém a Kermit Smith dla Lucky Red, sucietà 'd prudusiòṅ e distribusiòṅ ad film.

In dla sò caréra 'l à vins tri Dàvid ad Dunatèl e 'n Nàstar 'd Argìnt, p'r i film da lò prudót Sulla mia pelle, Freaks Out e Il divo. Fra i sò àtar film impurtànt in dua 'l à tirâ fóra i bèsi a 'rcurdém Apri gli occhi, pelìcula cun Eduardo Noriega e la Penélope Cruz, Mare dentro, in du 'l à recitâ Javier Bardem, Il grande capo e Antichrist ad Lars von Trier, e This Must Be the Place cun Sean Penn.

'L à distribuî in Itàglia dimóndi film fat a 'l èstar cuma I soliti sospetti, In & Out, Priscilla, la regina del deserto, The Others, Magdalene, In the Mood for Love, Old Boy, La marcia dei pinguini, Cous Cous, The Millionaire e Philomena.

Cuma atōr 'l à fat al sò debùt a 'l cìnema a gl'inìsi di an Utànta, catànd spasi in soquànti pelìculi ad scarésa cuma Lo squartatore di New York e La casa con la scala nel buio ma anc in film eròtic cuma Bolero Extasy, in dla part d'l amànt dla Bo Derek, e Miranda cun prutagunìsta la Serena Grandi. In dal 1987 a 'l ém vist in dal drama La famiglia, a fiànc ad Vittorio Gassman, la Stefania Sandrelli, la Fanny Ardant e Sergio Castellitto, e in dal thriller Il giorno prima insém a Ben Gazzara, Burt Lancaster e l'Ingrid Thulin.

In dal 1991 'l à preśentâ 'l Fèstival 'd Sanremo insém a l'Edwige Fenech, pò 'l è turnâ a recitàr in pelìculi cuma Pasolini, un delitto italiano, in di pagn dal giurnalìsta Furio Colombo, e Amor de hombre, pelìcula spagnōla in dua 'l iva fat la part d'l amìg gay dla Loles León. In chi an lè 'l à tacâ a lauràr cun sucès cuma prudutōr, turnànd a recitàr na quàlc vòlta ógni tant.