Analisi di un delitto
|
C'l artìcul chè 'l è scrit in
Miranduléś |
 A Murder of Crows | ||
| Analisi di un delitto | ||
 Cuba Gooding Jr. in na figùra dal film | ||
| Anàliśi 'd un masamènt 1998 | ||
|---|---|---|
| Regìa: Rowdy Herrington | ||
| Scritōr: Rowdy Herrington | ||
| Atōr: Cuba Gooding Jr. • Marianne Jean-Baptiste Tom Berenger • Eric Stoltz • Carmen Argenziano Mark Pellegrino • Ashley Laurence • Doug Wert Jim Meskimen • Gaelle Comparat • Nate Adams Jeremiah Black • Adrian Colon • Lochlyn Munro | ||
| Müsica: Steve Porcaro | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî • Cànada | ||
Analisi di un delitto (Anàliśi 'd un masamènt) 'l è 'n thriller americàṅ e canadéś dal 1998 scrit e dirèt par Rowdy Herrington.
La pelìcula l'è stada giràda c'n un budget ad sèt migliòṅ e mèś ad dòlar fra Key West, New Orleans e Los Angeles.
Sunt
[mudéfica la surzéia]Lawson Russell (Cuba Gooding Jr.) 'l è 'n avucàt dla Luiśiàna impgnâ a diféndar Thurman Parks III (Eric Stoltz), fiōl 'd un pulìtig impurtànt, in un prucès par 'l umisìdi dna dòna viulentàda. Esénd in criśi cun la sò cusìnsia, cardénd-al culpévul dabòṅ, Lawson al decìd ad lasàr 'l incàrag ma 'l giùdas Wiley Banning (Carmen Argenziano), ch'al vōl ch'al sia asòlt da la cōrt, al gh fà presiòṅ par far-al cuntinuàr da 'l mumènt ch'i giùdas in di Stat Unî i èṅ pròpria numinâ da i pulìtig. Durànt 'l interugatòri, Lawson al dà cónt'r a 'l sò cliènt, faghénd-ag dal dmandi dascòmdi, vgnénd acsè parâ via da Banning e pò anc radiâ da 'l órdan di avucàt.
La sōla parsòna ch'la gh'armàgn davśèṅ l'è la sò culéga Elizabeth Pope (Marianne Jean-Baptiste). Lawson al decìd ad cambiàr vita andànd a star in Flòrida par scrìv'r un lìbar e in cal méntar al tira avànti purtànd in gir p'r al Gōlf dal Mèsic i turìsta in mutuscàṿ. Lè al cgnós un pensiunâ armàś véduv e sénsa fiōi ciamâ Christopher ch'al gh fà lèś'r un rumànś ch'l è drē a scrìvar da 'l tìtul “A Murder of Crows” (Un masamènt ad córuv). A s trata 'd un thriller su 'n sasèṅ ch'al decìd ad far fóra sinc avucàt ad Dixie Land ch'i gh 'l aṅ cavàda a far asòlvar di delinquènt tarménd, sénsa dar giustìsia a 'l pòvri vitmi. Lawson al cata cl'òvra lè un caplavōr ma al n fà minga in tèmp a far-'g i cumplimènt parchè al vèć al mōr.
Lawson al decìd ad tgnir par lò al rumànś faghénd finta ch'al sia suo, esénd ch'al gh'à la sìndrum dla paśna biànca. Dòp avēr cupiâ al tèst a computer e avēr bruśâ 'l lìbar, al manda 'l rumànś a soquànt editōr, catànd in dla Janine Devrie (Ashley Laurence) qvéla ch'la gh dà fidùcia. Al rumànś al dvènta 'n best seller e Lawson al taca a far i bèsi, finénd anc a lèt cun la dóna.
Na còpia dal rumànś la vîṅ mandàda da 'n tisi misterióś anc a 'l detective Clifford Dubose (Tom Berenger). Quànd chi lò 'l al lèś al s rénd cònt ch'a n s trata minga 'd finsiòṅ parchè quàtar di sinc avucàt i èṅ mòrt dabòṅ pròpria cuma scrit in dal lìbar. La pulisìa la créd ch'al sasèṅ al sia pròpria Lawson o ch'almànc al sava quèl. Ma lò al n sà gnint, 'l è sicûr che qualchidòṅ 'l al vója incastràr. Dòp èsar scapâ via da la pulisìa, ch'la 'l vliva arestàr, Lawson al próa a 'ndàr-'g in fónd e 'l vîṅ a savēr ch'al pensiunâ al n è mai eśistî e che prima 'd sparìr 'l iva fat dal ciamàdi a 'l telèfun a cà 'd un sèrt Arthur Corvus (Mark Pellegrino), prufesōr universitàri ad létri e recitasiòṅ.