Amy Irving
|
C'l artìcul chè 'l è scrit in
Miranduléś |
LʼAmy Irving (Palo Alto, 10 ad Setémbar dal 1953, a s lèś [ˈeɪ.mi ˈɝ.vɪŋ] in ingléś), l'è n'atōra americàna, candidàda a 'l Prèmi Òscar in dal 1984 p'r al film Yentl dla Barbra Streisand.
La gh'à na stéla in dla Hollywood Walk of Fame.
Biugrafìa
L'atōra califurgnàna l'è fiōla 'd art, sò pàdar Jules Irving 'l éra 'n regìsta e prudutōr teatràł méntar sò màdar l'è l'atōra Priscilla Pointer. Sò fradèl 'l è 'l regìsta David Irving, sò surèla la cantànta Katie Irving.
LʼAmy da śōvna l'à studiâ a 'l lìceo artìstic a New York, a 'l cunservatòri a San Francisco e a l'acadèmia 'd mùśica e art dramàtica a Lóndra, pò l'à tacâ a recitàr a teàtar a 'l inìsi di an Stanta.
L'à fat al sò debùt a 'l cìnema in dal 1976 in Carrie - Lo sguardo di Satana ad Brian De Palma, in dla part dla Susy Snell, amìga catìva dla Sissy Spacek. A s l'arcurdém tut quànd chi lē in 'n arbgàt a la fiṅ dal film la la và a catàr par purtàr di fiōr a la sò tómba catànd un scarbòć su la crōś cun scrit „Carrie White la bruśa a 'l Infèran!“ e pò a salta fóra a 'l impruvìś un bras da sottèra dla Carrie ch'la la ciàpa tgnénd-la sòdi. Dū an dòp la cuntìnua la sò culaburasiòṅ c'n al regìsta dal New Jersey girànd al thriller fantàstic Fury, a fiànc ad Kirk Douglas e 'd John Cassavetes.
In dal 1980 la vins un Razzie Awards cuma atōra minga prutagunìsta più trista par la cumèdia muśicàla Accordi sul palcoscenico giràda insém a 'l cantaṿtōr Willie Nelson ch'al dvintarà anc al sò muróś in dla vita par soquànt méś. Dòp cal strabùc chè lʼAmy la s cava però la sudisfasiòṅ 'd èsar candidàda a i Academy Award dal 1983 p'r al musical dramàtic Yentl, ambintâ in dal mónd ebrèj dla Pulógna d'l inìsi dal XX sécul. 'L an dòp la recìta la part dla prinsipésa Anjuli in na série televiśìva ingléśa da 'l tìtul Padiglioni lontani, trata da 'l umònim lìbar dla Mary Margaret Kaye.
In dal 1988 l'à dâ la sò vōś a 'l persunàǵ dla Jessica Rabbit ch'la canta 'l braṅ Why don't you do right in Chi ha incastrato Roger Rabbit mént'r in dal rèst dal film chi lē l'è ardupiàda par la Kathleen Turner. In dal 1989 l'è stada candidàda a i Golden Globe par la sò intepretasiòṅ da prutagunìsta dna dóna puta ebrèja in dla cumèdia rumàntica ad sucès Dall'altro lato della strada, in dua sò nunóna Reizel Bozyk la fà da tut par catàr-ag marè. In dal stés an la tōś part insém a dimóndi àtar persunàǵ famóś a 'l vìddeo ad Liberian Girl ad Michael Jackson.
Fra i sò ùltim film impurtànt a 'rcurdém Harry a pezzi (1997), cun Woody Allen, Billy Crystal e l'Elisabeth Shue, al film ad scarésa Carrie 2 - La furia (1999), in dua lē la tórna in di pagn dla Sue Snell, Traffic (2000) ad Steven Soderbergh e 'l thriller cun Robert De Niro Nascosto nel buio (2005).
In televiśiòṅ l'à recitâ in soquànt telefìlm cuma A tutte le auto della polizia, Pepper Anderson - Agente speciale, Happy Days, Militari di carriera, Anastasia - L'ultima dei Romanov, Law & Order - Unità vittime speciali, Alias, Dr. House - Medical Division, Zero Hour e The Affair - Una relazione pericolosa.
Vita privàda
LʼAmy Irving l'è stada la dóna 'd Steven Spielberg da 'l 1976 a 'l 1979 e pò incóra da 'l 1984 in avànti, spuśànd-'l in dal 1985. Insém i gh'aṅ abû 'n fiōl ciamâ Max Samuel prima dal divòrsi dal 1989. P'r un acòrd pre-matrimuniàł scrit su 'n tṿajōł, arcgnusû vàlid da 'n giùdas, la Irving la s è purtàda a cà sènt migliòṅ ad dòlar da lò.
In dal 1990 l'à cgnusû e spuśâ 'l regìsta braśigliàṅ Bruno Barreto dand subìt a la luś un fiōl masć ciamâ Gabriel Davis. I dū, ch'i ìv'n in cal méntar fat anc un parcōrs prufesiunàł insém, i aṅ divursiâ in dal 2005. In dal 2007 l'atōra la s è spuśàda c'n al regìsta ad ducumentàri Kenneth Bowser Jr..
Filmugrafìa
- 1976 - James Dean, regìa ad Robert Butler – Film TV
- 1976 - Dinastia (Dynasty), regìa ad Lee Philips – Film TV
- 1976 - Il duello (Panache), regìa ad Gary Nelson – Film TV
- 1976 - Carrie - Lo sguardo di Satana (Carrie), regìa ad Brian De Palma (1976)
- 1977 - I'm a Fool, regìa ad Noel Black – Film TV
- 1978 - Fury (The Fury), regìa ad Brian De Palma
- 1979 - Voices, regìa ad Robert Markowitz
- 1980 - Accordi sul palcoscenico (Honeysuckle Rose), regìa ad Jerry Schatzberg
- 1980 - Competition (The Competition), regìa ad Joel Oliansky
- 1983 - Yentl, regìa dla Barbra Streisand
- 1984 - Micki e Maude (Micki + Maude), regìa ad Blake Edwards
- 1987 - Il potere magico (Rumpelstiltskin), regìa ad David Irving
- 1988 - Dall'altro lato della strada (Crossing Delancey), regìa ad Joan Micklin Silver
- 1990 - Prova di forza (A Show of Force), regìa ad Bruno Barreto
- 1993 - Beneficio del dubbio (Benefit of the Doubt), regìa ad Jonathan Heap
- 1994 - Ai confini della realtà - I tesori perduti (Twilight Zone: Rod Serling's Lost Classics), regìa ad Robert Markowitz – Film TV
- 1995 - Cleptomania (Kleptomania), regìa ad Don Boyd
- 1996 - Giorni di passione (Carried Away), regìa ad Bruno Barreto
- 1996 - Una coppia di scoppiati (I'm Not Rappaport), regìa 'd Herb Gardner
- 1997 - Harry a pezzi (Deconstructing Harry), regìa ad Woody Allen
- 1998 - Poliziotto speciale (One Tough Cop), regìa ad Bruno Barreto
- 1998 - The Confession, regìa ad David Hugh Jones
- 1999 - Carrie 2 - La furia (The Rage: Carrie 2), regìa dla Katt Shea
- 1999 - Blue Ridge Fall, regìa ad James Rowe
- 1999 - Bossa Nova, regìa ad Bruno Barreto
- 2000 - Traffic, regìa ad Steven Soderbergh
- 2001 - Tredici variazioni sul tema (Thirteen Conversations About One Thing), regìa ad Jill Sprecher
- 2002 - Tuck Everlasting - Vivere per sempre (Tuck Everlasting), regìa ad Jay Russell
- 2005 - Nascosto nel buio (Hide and Seek), regìa ad John Polson
- 2009 - Adam, regìa ad Max Mayer
- 2018 - Unsane, regìa ad Steven Soderbergh
- 2020 - Confetti, regìa dl'Ann Hu
- 2021 - L'ombra del passato (A Mouthful of Air), regìa dl'Amy Koppelman
Culegamènt estéran
Àtar prugèt
Wikiquote contiene citazioni di o su Amy Irving
Wikimedia Commons contiene file multimediali su Amy Irving
