Amore e mistero
|
C'l artìcul chè 'l è scrit in
Miranduléś |
 Secret Agent | ||
| Amore e mistero | ||
 La Carroll e Peter Lorre in na figùra dal film | ||
| Amōr e mistēr 1936 | ||
|---|---|---|
| Regìa: Alfred Hitchcock | ||
| Scritōr: Campbell Dixon • W. Somerset Maugham Charles Bennett • Ian Hay • Jesse Lasky Jr. | ||
| Atōr: John Gielgud • Madeleine Carroll Robert Young • Peter Lorre • Percy Marmont Florence Kahn • Charles Carson • Lilli Palmer Sebastian Cabot • Tom Helmore • Rene Ray | ||
| Müsica: Louis Levy | ||
| Léngua: Ingléś • Tedésc | ||
| Dürä dal film: 86 minüt | ||
| Nasiōṅ: Régn Unî | ||
Amore e mistero (Amōr e mistēr), cgnusû in Itàglia anc c'n al tìtul ad L'agente segreto, 'l è 'n thriller sentimentàł dal 1936 'd Alfred Hitchcock ch'al fà part dal “perìud ingléś” dal regìsta. 'L è stâ girâ in biànc e négar.
Vgnû fóra dòp chi àtar dū film ad spiunàǵ L'uomo che sapeva troppo (1934) e Il club dei 39 (1935), al gh l'à minga cavàda a 'vēr un sucès cumpàgn.
Sunt
Durànt la prima guèra mundiàla al scritōr britànig Edgar Brodie (John Gielgud) al mōr a 'l frònt e a dita di giurài i èṅ drē a far-'g al funeràł ma l'è tuta na bala parchè lò al lavōra cuma agìnt segrét par "R" (Charles Carson), funsiunàri dal Foreign Office. Druànd al nóm fals ad Richard Ashenden al vîṅ mandâ in Śvisra cun 'l incàr'g ad masàr na spia furastéra.
Al riva acsè a 'l hutèl Excelsior cun sèg la sò culaburatōra Elsa Carrington (Madeleine Carroll) che lò al fà pasàr cuma sò mujēr anc s'a gh'è 'n animardōr ciamâ Robert Marvin (Robert Young) ch'al gh fà la cōrt. Lè Ashenden al s imbàt in un culéga risulèṅ e cun 'l urcèṅ, cgnusû cuma al generàł (Peter Lorre) ch'al gh'à da jutàr-'l in dla sò misiòṅ.
In séguit Ashenden e 'l generàł i vàn'n in na céśa par dascórar cun 'n infurmadōr ma i al càtan mòrt strusâ. In dal pugn al gh'à 'n butòṅ che séns àtar 'l éra dal sò sasèṅ. I suspèt i èṅ tut su 'n turìsta ingléś ciamâ Caypor (Percy Marmont) ch'al s cata a 'l èstar insém a sò mujēr tedésca (Florence Kahn). Sicûr che lò al sia la spia ch'i péscan, Ashenden e 'l generàł i al cópan cuciànd-al śò da na muntàggna ma purtròp al nemìg al n è minga lò.
LʼElsa l'è turmintàda da 'l amōr ch'la sènt par Edgar e la cundàna muràla ad qvél ch'i gh'aṅ da far par cònt dal guèran britànig. Ashenden 'l è prònt a firmàr na létra 'd dimisiòṅ da 'l incàrag ma 'l generàł al pénsa 'd avēr catâ la pista giùsta, na fàbrica 'd ciuculàta lè darènt druàda da i nemìg tedésc.