American Dreamz
|
C'l artìcul chè 'l è scrit in
Miranduléś |
 American Dreamz | ||
 La Marcia Gay Harden e Quaid in na figùra dal film | ||
| Sógn americàṅ 2006 | ||
|---|---|---|
| Regìa: Paul Weitz | ||
| Scritōr: Paul Weitz | ||
| Atōr: Hugh Grant • Dennis Quaid • Mandy Moore Willem Dafoe • Chris Klein • Jennifer Coolidge Sam Golzari • Marcia Gay Harden • Seth Meyers Noureen DeWulf • Judy Greer • Winter Jones John Cho • Bernard White • Shohreh Aghdashloo Carmen Electra • Marley Shelton • Jeff Ross | ||
| Müsica: Stephen Trask | ||
| Léngua: Ingléś • Cinéś | ||
| Dürä dal film: 107 minüt | ||
| Nasiōṅ: Stat Unî | ||
American Dreamz (Sógn americàṅ) l'è na cumèdia satìrica americàna dal 2006 scrita, dirèta e prudóta par Paul Weitz ch'la tōś in gir na sèrta America di reality show cuma American Idol o dla sò pulìtica cuma qvéla a i tèmp dal presidènt George W. Bush.
Custâ darsèt migliòṅ ad dòlar, al film al 'n à pò purtâ a cà séd'ś e mèś.
Sunt
[mudéfica la surzéia]Martin Tweed dit Tweedy (Hugh Grant) 'l è 'l preśentadōr cìnig e dimóndi preśuntuóś dla traśmisiòṅ ad sucès American Dreamz, un talent show par śōvan ch'i vōlan far i cantànt e ch'in dal cōrs dal prugràma i vìnan scartâ òṅ a òṅ in fîṅ a che la giurìa e 'l pùblic, druànd al mecanìśum dal televōt, i sarnìs'n al vinsidōr. Par l'edisiòṅ ch'la gh'à d'andàr in ónda, Tweed al s è mis 'd acòrd c'n al cap ad gabinét dla Cà Biànca (Willem Dafoe) par ciamàr cuma òspit in giurìa par l'ultma puntàda al presidènt americàṅ Joseph Staton (Dennis Quaid), un pulìtig minga tant a l'altésa e briśa preparâ su i dossier ch'al fà sèmpar di śbali anc s'l è a 'l sò secónd mandâ, esénd ch'al gh'à biśógn ad dvintàr più simpàtig davànti a 'n pùblic televiśìṿ. Fra 'l àtar American Dreamz l'è na traśmisiòṅ ch'la piàś dimóndi a sò mujēr, la Linda (Marcia Gay Harden).
Dòp 'l inìsi dla guèra dal Gōlf, in dua al śōvan Omer Obeidi (Sam Golzari) 'l à pardû sò màd'r in un bumbardamènt di americàṅ a Bagdad, i terurìsta iślàmic i al màndan in Califòrgna da di sò sîṅ ch'i vìvan là da dimóndi an, Ali Riza (Jay Harik) e la Nazneen (Shohreh Aghdashloo), par védar s'l è pusìbil druàr-'l in séguit par far di atintâ lè, anc s'i n gh'aṅ minga tant fidùcia parchè al ragàs, ch'l è pasiunâ di musical ad Broadway cuma sò màdar, 'l è piutòst imbranâ. Omer, ch'al n diś gnint a i sò parènt "americàṅ", al taca a pasàr dal tèmp c'n i sò cuśèṅ ch'i gh'aṅ i sò an, la Shabnam (Noureen DeWulf) e Iqbal (Tony Yalda), un gay ch'l à fat dmanda par tōr part a American Dreamz.
Anc la Sally Kendoo (Mandy Moore), na ragàsa dimóndi ambisióśa ch'la viṿ in un paiśèṅ d'l Ohio, la gh'à 'n sógn cumpàgn. Quànd i culaburadōr ad Tweed, Frank Ittles (John Cho) e la Deborah Accordo (Judy Greer), i vìn'n a cà sua par dir-ag davànti a 'l telecàmeri ch'l'è stada sarnìda cuma cuncurènta, chi lē la pèrd la tèsta par la cuntintésa, tacànd a sigàr davànti a sò màdar Martha (Jennifer Coolidge). Subìt dòp la mòla 'l sò muróś William Williams (Chris Klein), a sò dita minga a la sò altésa, e la ciàpa 'n agìnt, Chet Krogl (Seth Meyers), par jutàr-la a far i pas giùst in dal mónd dal spetàcul. Krogl al sugerìs a la Sally ad métar-'s incóra insém a William che, dimóndi vilî p'r èsar stâ dascargâ da lē, 'l éra partî vuluntàri par 'l Iràq par pò turnàr subìt a cà frî a 'n bras. A 'l pùblic a gh piaśrà séns àtar la stòria 'd lē cun 'n eróe ad guèra ch'a gh vōl bèṅ.
P'r al prugràma i vìnan ciapâ, fra i àtar, anc al rapper Sholem Glickstein (Adam Busch), ebrèj urtudòs, e Omer, tòlt a 'l pòst 'd Iqbal ch'al n éra minga in cà quànd i éran vgnû a pascàr-al, ma Omer al và bèṅ listés parchè da àrab 'l è 'n bèl caś umàṅ.
Quànd i terurìsta i vìn'n a savēr che chi lò 'l è stâ sarnî cuma cuncurènt e ch'in dla finàl a gh sarà anc al presidènt, i decìd'n ad far-'g avēr na sintùra cun na bómba dèntar, in manéra ad far-al saltàr p'r ària davànti a Staton. A l'ultma sfida deciśìva i rìvan pròpria la Sally e Omer ma chi lò al n gh'à minga tant vója ad dar séguit a 'l atintâ.