Allison Hayes

C'l artìcul chè 'l è scrit in Miranduléś

La Mary Jane Hayes, cgnusùda méj cuma Allison Hayes (Charleston, 6 ad Mars dal 1930 - San Diego, 27 ad Favràr dal 1977), l'è stada n'atōra e mudèla americàna.

Biugrafìa

Uriginària dla Virgìgna Ucidentàla, da śōvna la stùddia a la Calvin Coolidge High School ad Washington. Vinsidōra dal tìtul ad Miss District of Columbia, la tōś part a 'l cuncōrs ad Miss America in dal 1949 p'r i culōr dal Distrét ad Culùmbia, pò la và a star a Hollywood in dua in dal 1954 la firma 'n cuntràt par la Universal Pictures.

La fà 'l sò debùt a 'l cìnema cun na part pìcula in dal film Girls in the Night (1953) méntar 'l an dòp la gh'à na part più impurtànta in Il re dei barbari (1954), a fiànc ad Jack Palance, in dua la fà na siréna ch'la 'l cópa. Durànt cal film chè la s fà mâł e la fà càuśa a la Universal, pò la pasa a la Columbia Pictures ch'la gh fà far la part dna dóna ch'la pésca vindéta cónt'r un gangster ch'al gh'à cupâ sò pàdar in Il sindacato di Chicago (1955). Sèmp'r in c'l an lè la gira Conta fino a 3 e prega! insém a Van Heflin, a Raymond Burr e a la Joanne Woodward. In séguit la Hayes la dirà che cal rōl lè 'l è stâ qvél mijōr dla sò caréra.

In dal 1956 la rècita in soquànt film cuma 'l dramàtic Giungla d'acciaio, e i western La principessa dei Moak e Il mercenario della morte. Su 'l set ad cla pelìcula chè la Hayes la casca da cavàl scavśànd-'s i òs dal bras.

Dū an dòp l'è prutagunìsta ad soquànt film ad série B cuma Wolf Dog e 'l cult Attack of the 50 Foot Woman, in du la fà na dóna dvintàda élta quìndas métar, dòp èsar stada culpìda da di raǵ aglièṅ, ch'la in prufìta par far-'g-la pagàr a sò marè ch'al gh'iva mis i còran.

Manifèst dal film *Atàc dla dóna 'd 50 pē* (1958)

Fra 'l 1963 e 'l 1964 i gh dànan na part in dla soap opera General Hospital, quànd praticamènt la sò caréra a 'l cìnema l'éra finìda anc parchè l'iva tacâ a 'vēr di prubléma a giràr sénsa bastòṅ. La sò ultma part da atōra 'l è dal 1967, in dal telefìlm Gomer Pyle, U.S.M.C., dòp avēr recitâ anc in Gli uomini della prateria, Gli intoccabili e Perry Mason.

Vilìda e sénsa lavōr a gnanc trént'an, cun di prubléma grâṿ ad salùt e dulōr dapartùt, la Hayes la pénsa anc ad tōr-as la vita, prima 'd vgnir a savēr 'd ès'r armàśa uféśa tulénd di integradōr ad cals che dènt'r i gh'ìvan anc dimóndi piómp. C'n al sò còrp ch'al patìva i efèt dal vlenamènt da piómb, la dóna la taca na campàggna par far vietàr l'impurtasiòṅ ad cal prudót lè a la Food and Drug Administration.

C'n al cundisiòṅ ad salùt ch'i vànan sèmpar pèś, la Hayes la s trasferìs a San Clemènt in Califòrgna ma pò l'armàgn invàlida e i dutōr i gh càt'n anc la leucemìa. Sōl dòp la sò mòrt, a quarànta-siē an, la FDA la gh scriv na létra dgénd ch'i èṅ in cōrs dal mudìfichi a la léǵ par métar dal règhli a i integradōr alimentàr ch'i rìvan da 'l èstar.

La Hayes l'è stada saplìda darènt a sò pàdar, in dal campsànt ad Culver City. Òt méś dòp a murrà anc sò màdar.

Filmugrafìa

1963 - Girls in the Night, regìa ad Jack Arnold
1954 - Francis Joins the WACS, regìa ad Arthur Lubin
1954 - Tre americani a Parigi (So This Is Paris), regìa ad Richard Quine
1954 - Il re dei barbari (Sign of the Pagan), regìa ad Douglas Sirk
1955 - Il figliuol prodigo (The Prodigal), regìa ad Richard Thorpe
1955 - La maschera di porpora (The Purple Mask), regìa ad H. Bruce Humberstone
1955 - Detective G. sezione criminale (Double Jeopardy), regìa ad R.G. Springsteen
1955 - Il sindacato di Chicago (Chicago Syndicate), regìa ad Fred F. Sears
1955 - Conta fino a 3 e prega! (Count Three and Pray), regìa ad George Sherman
1956 - Giungla d'acciaio (The Steel Jungle), regìa ad Walter Doniger
1956 - La principessa dei Moak (Mohawk), regìa ad Kurt Neumann
1956 - Il mercenario della morte (Gunslinger), regìa ad Roger Corman
1957 - La sopravvissuta (The Undead), regìa ad Roger Corman
1957 - Il segreto di Mora Tau (Zombies of Mora Tau), regìa 'd Edward L. Cahn
1957 - La casa dei mostri (The Unearthly), regìa ad Boris Petroff
1957 - The Disembodied, regìa ad Walter Grauman
1958 - Attack of the 50 Foot Woman, regìa ad Nathan Juran
1958 - Wolf Dog, regìa ad Sam Newfield
1958 - Cento colpi di pistola (A Lust to Kill), regìa 'd Oliver Drake
1958 - Giungla di spie (Hong Kong Confidential), regìa 'd Edward L. Cahn
1959 - Counterplot, regìa ad Kurt Neumann
1959 - Agente federale (Pier 5, Havana), regìa 'd Edward L. Cahn
1960 - L'occhio ipnotico (The Hypnotic Eye), regìa ad George Blair
1960 - The High Powered Rifle, regìa ad Maury Dexter
1963 - La mano strisciante (The Crawling Hand), regìa ad Herbert L. Strock
1963 - Le 5 mogli dello scapolo (Who's Been Sleeping in My Bed?), regìa ad Daniel Mann
1965 - Per un pugno di donne (Tickle Me), regìa ad Norman Taurog

Culegamènt estéran

(IT) La sò paśna su 'l IMDb

Àtar prugèt

Wikimedia Commons contiene file multimediali su Allison Hayes