Alla ricerca dell'assassino
|
C'l artìcul chè 'l è scrit in
Miranduléś |
 Everybody Wins | ||
| Alla ricerca dell'assassino | ||
 Nick Nolte e la Debra Winger in na figùra dal film | ||
| Pascànd al sasèṅ 1990 | ||
|---|---|---|
| Regìa: Karel Reisz | ||
| Scritōr: Arthur Miller | ||
| Atōr: Nick Nolte • Debra Winger • Judith Ivey Will Patton • Kathleen Wilhoite • Jack Warden Frank Converse • Frank Military • Steven Skybell Mary Louise Wilson • Sean Weil • Peter Appel | ||
| Müsica: Mark Isham | ||
| Léngua: Ingléś | ||
| Dürä dal film: 97 minüt | ||
| Nasiōṅ: Stat Unî • Régn Unî | ||
Alla ricerca dell'assassino (Pascànd al sasèṅ) 'l è 'n thriller americàṅ dal 1990 ad Karel Reisz, chè a 'l sò ùltim film.
La pelìcula l'è stada na bómba a 'l butghèṅ avénd fat sù sōl un migliòṅ e tri ad dòlar a frònt 'd un cóst ad daśnóṿ.
Sunt
Par la mòrt 'd un mèdag dal Connecticut ciamâ Victor Daniels, masâ in dla sò cà a scurtlàdi, al prucuradōr distretuàł Charley Haggerty (Frank Converse) al cundàna Felix (Frank Military), un śōvan anvōd dal dutōr che cal dè lè 'l éra andâ a catàr-al esénd che là i pulisiòt i aṅ tirâ sù di sò cavìi. Na sò pasiènta ciamàda Angela Crispini (Debra Winger) la ciàma in ajùt 'n investigadōr privâ, Tom O'Toole (Nick Nolte), par far n'indàśin ch'a pòsa jutàr a far 'n àtar prucès parchè chi lē l'è sicùra ch'al ragàs al sia inusènt e a gh rincrés dimóndi ch'al sia in parśòṅ, inóltar la gh diś anc che lē la sà al nóm dal sasèṅ.
La dóna la 'l manda a far dal dmandi a cà dlʼAmy (Kathleen Wilhoite), n'insiminìda white trash ch'la viṿ in mèś a rusc, pui dapartùt e màchini scasàdi. Subìt dòp però lʼAngela la ciàma 'l detective par dir-ag 'd a n créd'r a na sōla paròla dla ragàsa, cuma s'la s fus pintìda. Tom al decìd 'd andàr avànti listés e lʼAmy la gh cònta che tut i sànan ch'al culpévul 'l è 'n sèrt Jerry (Will Patton), catâ tut muśnènt ad sànguv al dè d'l umisìdi ma pò lasâ lìbar. Chi lò 'l è 'n tisi dimóndi strâṅ ch'l à mis sù un grup 'd èx drugâ, cuma lʼAmy o Montana (Sean Weil), ch'i lavóran sèg in un mulèṅ vèć che lò al vrév far dvintàr na céśa.
Tom e lʼAngela i finìs'n a lèt, cun la dóna ch'a pâr ch'la sava da piò ad qvél ch'la dà a inténdar, un quèl ch'a 'l investigadōr a gh diś anc la Connie (Judith Ivey), sò surèla mistra ch'la viṿ sèg in na cà 'd campàggna. In séguit, dascurénd cun Jerry ma anc scultànd al paròli dla pulisìa e dal cunfesiòṅ dlʼAngela, Tom al vîṅ a savēr che chi lē la fava la putàna e ch'la gh'à abû dal stòri c'n al mèdag e c'n al prucuradōr e che Daniels al s fava purtàr la dròga da Jerry, in manéra 'd psēr cuntrulàr al marcâ ad cal sustànsi lè in sità para far sù di bèsi. Sicûr 'd avēr finalmènt la ciàṿ par dasquaciàr al mónd mars ch'a gh'è fra pulisìa e magistradùra, Tom al và a dascórar c'n un giùdas sò amìg, Harry Murdoch (Jack Warden).