Alexander D'Arcy
|
C'l artìcul chè 'l è scrit in
Miranduléś |
Alexander Sarruf, cgnusû méj cuma Alexander D'Arcy ma anc cuma Alexandre D'Arcy, Alex D'Arcy, Alexandre Darcy e Alex d'Arcy (Al Càir, 10 'd Agóst dal 1908 - West Hollywood, 20 'd Avrìl dal 1996, a s lèś [ˌælɪɡˈzændər dɑːrˈsiː] in ingléś e [ألكسندر صروف] in àrab) 'l è stâ 'n atōr egisiàṅ naturaliśâ americàṅ.
A 'l cìnema 'l à fat da spés la part dal galantóm elegànt o dal furfànt fùrub ch'al t incantàva e a 'l inìsi dla sò caréra 'l éra cunsiderâ cuma 'l sucesōr naturàł ad Rodolfo Valentino o paragunâ a stéli cuma Clark Gable o Errol Flynn.
Dòp soquànt film mut girâ in Frància vèrs la fîṅ di an Vint, al s è spustâ in Inghiltèra par recitàr in dal drama Tabarin di lusso 'd Alfred Hitchcock (1928). In séguit a 'l ém vist in dal cumèdi A me la libertà! ad René Clair (1931), Ce cochon de Morin (1932), cun prutagunìsta Jacques Baumer, e La kermesse eroica (1935).
In dal 1936 'l è partî p'r i Stat Unî in dua al gh l'à cavàda a catàr spasi a Hollywood. In dal 1937 'l à recitâ a fiànc ad Cary Grant in dla cumèdia L'orribile verità méntar dū al dòp 'l à tòlt part a La ragazza della 5ª strada cun la Ginger Rogers. Dal 1944 'l è invéci Il matrimonio è un affare privato cun la Lana Turner.
In dal 1953, dòp èsar turnâ p'r un pôc a lauràr in Európa, 'l à tòlt part a 'l drama Salto mortale 'd Elia Kazan, in dla part 'd un mémbar 'd un cîrc ch'al próa a pasàr la fruntéra blidàda dla Cecuśluvàchia, a 'l noir Hanno ucciso Vicki, cun la Jean Peters, e a la cumèdia sentimentàla Come sposare un milionario in dua 'l fà la cōrt a la Marilyn Monroe.
Vèrs la fîṅ dla sò caréra 'l à catâ spasi in soquànti pelìculi ad Russ Meyer (cuma La cugina Fanny e I 7 minuti che contano) e in film ad scarésa cuma L'abbraccio del ragno (1960), in dua al s trasfórma in un ragn, e Il castello di Dracula (1969), in di pagn dal cònt Dràcula. Impurtànt par lò 'l è anc al biugràfic Il massacro del giorno di San Valentino (1967) in dua 'l à fat la part dal mafióś itagliàṅ Joe Aiello.
D'Arcy al s è spuśâ e divursiâ dó vòlti cun dal culéghi atōri: in dal 1940 cun l'Arleen Whelan e in dal 1964 cun la Yutta Darcy. 'L è mòrt in dla sò cà in Califòrgna a utànta-sèt an.
Filmugrafìa
- 1927 - Il giardino di Allah (The Garden of Allah), regìa ad Rex Ingram
- 1928 - Tabarin di lusso (Champagne), regìa 'd Alfred Hitchcock
- 1928 - Paradise, regìa ad Denison Clift
- 1928 - La Revanche du maudit, regìa ad René Leprince
- 1929 - The Romance of Seville, regìa ad Norman Walker
- 1929 - La figlia del reggimento (Die Regimentstochter), regìa 'd Hans Behrendt
- 1931 - A me la libertà! (A nous la liberté), regìa ad René Clair
- 1932 - Le Roi des palaces, regìa ad Carmine Gallone
- 1932 - Ce cochon de Morin, regìa ad Georges Lacombe
- 1933 - Je vous aimerai toujours, regìa ad Mario Camerini
- 1934 - Poliche, regìa 'd Abel Gance
- 1935 - La kermesse eroica (La kermesse héroïque), regìa ad Jacques Feyder
- 1937 - Stolen Holiday, regìa ad Michael Curtiz
- 1937 - Il prigioniero di Zenda (The Prisoner of Zenda), regìa ad John Cromwell
- 1937 - L'orribile verità (The Awful Truth), regìa ad Leo McCarey
- 1937 - La sua maniera d'amare (She Married an Artist), regìa ad Marion Gering
- 1938 - Women Are Like That, regìa ad Stanley Logan
- 1938 - Flight to Fame, regìa ad Charles C. Coleman
- 1938 - Viaggio nell'impossibile (Topper Takes a Trip), regìa ad Norman Z. McLeod
- 1939 - Una ragazza allarmante (Good Girls Go to Paris), regìa 'd Alexander Hall
- 1939 - La ragazza della 5ª strada (5th Avenue Girl), regìa ad Gregory La Cava
- 1939 - Three Sons, regìa ad Jack Hively
- 1940 - City of Chance, regìa ad Ricardo Cortez
- 1940 - Irene, regìa 'd Herbert Wilcox
- 1941 - The Blonde of Singapore, regìa 'd Edward Dmytryk
- 1944 - Il matrimonio è un affare privato (Marriage Is a Private Affair), regìa ad Robert Z. Leonard
- 1949 - L'Ange rouge, regìa ad Jacques Daniel-Norman
- 1952 - Harriet Quimby, regìa ad William Corrigan – Film tv
- 1953 - Salto mortale (Man on a Tightrope), regìa 'd Elia Kazan
- 1953 - Hanno ucciso Vicki (Vicki), regìa 'd Harry Horner
- 1953 - Come sposare un milionario (How to Marry a Millionaire), regìa ad Jean Negulesco
- 1954 - Les Clandestines, regìa ad Raoul André
- 1955 - Il letto del re (Abdulla the Great), regìa ad Gregory Ratoff
- 1955 - L'avventuriero di Hong Kong (Soldier of Fortune), regìa 'd Edward Dmytryk
- 1960 - L'abbraccio del ragno (Ein Toter hing im Netz), regìa ad Fritz Böttger
- 1961 - The Festival Girls, regìa ad Leigh Jason
- 1964 - La cugina Fanny (Fanny Hill), regìa ad Russ Meyer
- 1965 - The Incredible Sex Revolution, regìa 'd Albert Zugsmith
- 1966 - Stazione Luna (Way...Way Out), regìa ad Gordon Douglas
- 1967 - Il massacro del giorno di San Valentino (The St. Valentine's Day Massacre), regìa ad Roger Corman
- 1968 - Il castello di Dracula (Blood of Dracula's Castle), regìa 'd Al Adamson
- 1971 - I 7 minuti che contano (Seven Minutes), regìa ad Russ Meyer