Vai al contenuto

Adriana Asti

Da Wikipedia.

C'l artìcul chè 'l è scrit in Miranduléś Emiliàn

L'Adriana Asti tòlta śò in dal 1972


L’Adelaide Aste, cgnusùda méj cuma Adriana Asti (Milàṅ, 30 'd Avrìl dal 1931 - Róma, 31 ad Luj dal 2025, a s lèś [aˈdriːana ˈasti] in itagliàṅ), l'è stada n'atōra e ardupiadōra itagliàna, dimóndi impgnàda anc a teàtar e in dla pròśa.

L'à fat al sò debùt da atōra in dal 1956 tulénd part a 'l film TV Vita col padre insém a Paolo Stoppa par pò catàr spasi in di drama Rocco e i suoi fratelli (1960), cun prutagunìsta Alain Delon, Accattone (1961), a fiànc ad Franco Citti, e Prima della rivoluzione (1964), in dla part dla milanéśa sufisticàda Gina ch'la taca na stòria 'd amōr cun sò anvōd, Francesco Barilli. In séguit a l'ém vista in Metti, una sera a cena (1969), pelìcula cun Jean-Louis Trintignant, Lino Capolicchio, Tony Musante e la Florinda Bolkan.

A 'l inìsi di an Stanta la pasa a la cumèdia eròtica recitànd in Homo Eroticus (1971), cun Lando Buzzanca, e Le notti peccaminose di Pietro l'Aretino (1972), in dla part dna ninéta ch'l'inséggna a sò fiōla Elena Veronese a dar-la via a di burghéś p'r interès. La tórna a 'l cìnema 'd aṿtōr laurànd cun Luchino Visconti in dal stòrig Ludwig (1973), cun Luis Buñuel in dal grutésc Il fantasma della libertà (1974) e cun Mauro Bolognini in Per le antiche scale (1975), drama cun Marcello Mastroianni, Barbara Bouchet e la Lucia Bosè.

In chi an lè l'à tòlt part anc a cumèdi cuma Conviene far bene l'amore (1975), insém a Gigi Proietti, l'Agostina Belli e l'Eleonora Giorgi, Chi dice donna dice donna (1976), cun la Stéphane Audran, la Giovanna Ralli, la Lea Massari e la Janet Agren, e L'affare s'ingrossa (1977), in dla part dla mujēr ad Carlo Giuffré.

Lē insém a la Delia Boccardo

In dal 1977 la vîṅ sarnìda par far la part dla Palma in dal thriller grutésc Gran bollito cun prutagunìsta la Shelley Winters in dla part dna masadōra seriàla dla Basitàglia vgnuda a star in Emìglia, stòria ispiràda a la vita dla Leonarda Cianciulli che fra 'l 1939 e 'l 1940 l'à far a pès e pò bujî i còrp ad tré dóni par far-an di savòṅ e di biscutèṅ da śibìr a i sò òspit. Subìt dòp l'à recitâ in dū film ad Tinto Brass, al stòrig e purnugràfic Caligola (1979), cun Malcolm McDowell in dla part d'l imperadōr Calìgula e lē in qvéla dla sò amànta, l'Ennia Trasilla, e la cumèdia Action (1980), in còpia cun Luc Merenda. Dal 1983 'l è invéci Il petomane cun Ugo Tognazzi in dla part dal scurśòṅ Joseph Pujol.

Fra i sò ùltim film a 'rcurdém tré pelìculi biugràfichi su Pier Paolo Pasolini (Pasolini, un delitto italiano dal 1995, Pier Paolo Pasolini - Una vita spezzata dal 2000 e Pasolini dal 2014), al drama sentimentàł La meglio gioventù (2003), cun Alessio Boni, Luigi Lo Cascio e la Maya Sansa, e 'l dramàtic Gli imperdonabili (2011), film 'd André Téchiné cun la Carole Bouquet.

Fra i sò impégn a teàtar, in dua l'à laurâ cun regìsta cuma Giorgio Strehler, Luchino Visconti, Vittorio Gassman e Luca Ronconi, a psém nutàr òvri cuma Il crogiuolo 'd Arthur Miller, Questa sera si recita a soggetto e Come tu mi vuoi ad Luigi Pirandello, Les bonnes ad Jean Genet e La voce umana/Il bell'indifferente ad Jean Cocteau.

Al sò prim marè 'l è stâ 'l pitōr Fabio Mauri. Dòp avēr divursiâ la gh'à abû na relasiòṅ c'n al regìsta Bernardo Bertolucci par pò spuśàr al regìsta Giorgio Ferrara, ad séd'ś an più śōvan, ch'l è mòrt dū an prima 'd lē, lasànd-la védva. L'è mòrta a nuànta-quàt'r an in dal són e sénsa fiōi, dòp avēr vins in dla sò caréra un Dàvid ad Dunatèl e quàtar Nàstar 'd Argìnt.

Filmugrafìa

[mudéfica la surzéia]
ʼL amōr a cunvîṅ far-al bèṅ (1975)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Adriana_Asti&oldid=168299"