Adam Sandler

C'l artìcul chè 'l è scrit in Miranduléś

Adam Richard Sandler (New York, 9 ad Setémbar dal 1966, a s lèś [ˈædəm ˈsændlər] in ingléś) 'l è 'n atōr, còmig, muśicìsta e prudutōr americàṅ, candidâ a 'n Golden Globe in dal 2003 par la cumèdia Ubriaco d'amore giràda in còpia cun l'Emily Watson. Al gh'à na stéla in dla Hollywood Walk of Fame e 'l è laureâ a la New York University.

A la fiṅ di an Utànta a 'l ém vist in quàt'r epiśòdi dla sitcom I Robinson pò 'l à fat al sò debùt a 'l cìnema cun la cumèdia Going Overboard in dua lò al fà 'n camarēr ch'al pésca 'l sucès da còmig.

In di an Nuànta 'l à laurâ, prima cuma aṿtōr e pò cuma mémbar dal cast, in dal prugràma còmig dla NBC Saturday Night Live par pò tacàr na caréra da atōr girànd di film ad sucès cuma la cumèdia spurtìva Un tipo imprevedibile, Billy Madison, 50 volte il primo bacio, a fiànc dla Drew Barrymore, Waterboy, cun la Kathy Bates, e Big Daddy - Un papà speciale.

'L è piaśû a i crìtic in dal thriller Diamanti grezzi dal 2019 ma minga tant in àtar sò lavōr cuma Jack e Jill (2011) in dua 'l à vins un Razzie Award cuma atōr più lòfi e anc cuma atōra. I sò film i èṅ stâ bòṅ ad far sù da piò ad dū migliàrd ad dòlar in tut al mónd.

Cuma muśicìsta 'l à fat vgnir fóra sinc àlbum fra 'l 1993 e 'l 2005. Sandler 'l è registrâ cuma republicàṅ e in dal 2007 'l à ślungâ di bèsi a Rudolph Giuliani par la sò campàggna presidensiàla prima ch'al s ritirìs par lasàr strada a John McCain.

Filmugrafìa

Discugrafìa

1993 – They're All Gonna Laugh at You!
1996 – What the Hell Happened to Me?
1997 – What's Your Name?
1999 – Stan and Judy's Kid
2005 – Shhh...Don't Tell

Culegamènt estéran

(IT) Filmugrafìa in s'l IMDb

Àtar prugèt

Wikiquote contiene citazioni di o su Adam Sandler
Wikimedia Commons contiene file multimediali su Adam Sandler